A rôh tơdah, Ngế pro xiâm hnê ngăn tơnêi têa tối nhên: Việt Nam dế tung hneăng mơnhông tơƀrê vâ mơnhông ƀă pêi châ mâu tơdroăng pơkâ pêi tâk péa kơxô̆ tung hơnăm 2026 – 2030 vâ pêi pro pơhlêh 2 tơdroăng pơkâ pêi ki xiâm: troh hơnăm 2030 cho tơnêi têa dế mơnhông, pêi châ liăn chía hên; ƀă hơnăm 2045 cho tơnêi têa mơnhông pêi châ liăn hên. Xua mê, tơdroăng ki mơdêk ivá tơxup tơbriât, vêh pơkâ pêi cheăng kâ ƀă xúa mâu rôh ki tơ’lêi hlâu sap ing rôh mot tơrŭm cheăng lâp plâi tơnêi vâ pêi châ tơƀrê mâu tơdroăng pơkâ mơnhông krá tơniăn cho ki xiâm kal châ pêi tơƀrê.

Ngế pro xiâm hnê ngăn tơnêi têa pơkâ thế Ƀơrô cheăng tê mơdró ƀă Kơmăi kơmok Nhuk, xuân môi tiah Vi ƀan Cheăng kâ Nhuk – Mekong pơtối tơrŭm ƀă Khu xiâm ngăn liăn ngân Việt Nam ƀă mâu kơ koan ki ai tơdjâk pro kông tơdjêp mơdêk ‘no liăn cheăng dêi khu mơdró kâ Nhuk, mơdêk tâ nếo ki rơkê tung ‘no liăn pêi cheăng, pro kơdroh hâi khế pơkâ mâu tơdroăng vâ ‘no liăn pêi cheăng, malối cho kal mơdêk rơdêi hnê tối ‘na kong ngê̆ ƀă tŏng gum khu mơdró kâ Việt Nam mơdêk ivá tơxup tơbriât veăng trâu hngế tung tơdroăng ki kơnía dêi mâu khu mơdró kâ, grup ki kân dêi Nhuk.