Pêi cheăng hlối rơkâu Têt Đảng ƀô̆, mâu kăn ƀă kuăn pơlê kong pơlê Tây Ninh, pôa Tô Lâm pơtroh rơkong rơkâu ăm mâu vâi pú kăn xiâm kăch măng, mâu Jâ Nôu Việt Nam khên tơnôu, mâu lêng tơplâ khên tơnôu dêi kuăn pơlê, mâu ngế pêi cheăng kơhnâ rơkê, ƀă hên mâu kăn ƀô̆, mâu lêng ki tơplâ bă kuăn pơlê dêi kong pơlê Tây Ninh kơ-êng, hơlêm hiâm tuăn, hlối rơkâu hơnăm nếo mo sêi, hơniâp lĕm, pêi cheăng tơƀrê.

Kăn xiâm pơkuâ hnê ngăn Đảng tối nhên, sap nôkố ta troh hơnăm 2030 ƀă hơngế tâ cho ta troh hơnăm 2045 ai pơxúa pakĭng ƀă tơdroăng mơnhông dêi tơnêi têa. Tung pơla mê, Tây Ninh ai  hnoăng kal ôh ti xê to mơnhông krê dêi kong pơlê, mê ối ƀă tá kơpong ƀă lâp tơnêi têa. Tây Ninh, ai hnoăng cheăng kal krá a tíu tơkăng kong, hlối cho tíu ki pơtó tơdế Đông Nam Ƀộ ƀă Tây Nam Bộ; hlối cho tíu rak tơniăn, hơniâp, tơrŭm, hlối cho tíu mơnhông tơƀrê nếo ‘na kơmăi kơmok, tê mơdró, ôm hyô, logistics ƀă cheăng kâ tíu tê mơdró tơkăng kong.

Kăn xiâm pơkuâ hnê ngăn Đảng pơkâ thế, cheăm bêng kong pơlê ki pêi tro tơdroăng tâ phĭu rah xo kăn Kuô̆k hô̆i hneăng 16 ƀă Hô̆i đong kuăn pơlê rêm râ hneăng hơnăm 2026-2031; rah xo mâu kăn ki rơkê khât, teăng mâ ăm tuăn mơ-eăm, ki púi vâ dêi Kuăn pơlê, veăng ‘no hnoăng pêi tơƀrê dêi mâu kơ koan kuăn pơlê rah xo; hlối tơkŭm tơmâng pơla mâu lêng kring tơniăn pơlê pơla, malối a drô tíu tơkăng kong; mơjiâng troăng tơkăng kong hơniâp, tơrŭm tơrôa mơnhông tơbrê.