Ƀă hnoăng cheăng pêi, mâu kăn Kuô̆k hô̆i kong pơlê Gia Lai hiăng tăng ngăn, tơpui tơno ƀă tối tơbleăng 21 tơdroăng pơkâ ki kal, tung mê, ai 2 pơkâ tơdjâk troh tơdroăng ‘na mơngế, 7 tơdroăng pơkâ ‘na troăng hơlâ pơ’lêh xúa tro tơdroăng xúa kong chiâng xúa tơdroăng ki ê vâ pêi mâu tơdroăng tơkêa bro tung kong pơlê, ƀă tâi tâng tơnêi rơdâ lối 161 ha kong, mâu pơkâ mê xêt sap hâi lơ 9/2/2026.

Tơbleăng a  rôh  mơgêi  hôp, pôa Rah Lan Chung, Phŏ kăn hnê ngăn Tỉnh ủi, Kăn hnê ngăn ngăn Hô̆i đong kuăn pơlê kong pơlê Gia Lai tối nhên, klêi hôp tơdrêng ƀă tơdroăng tơbleăng Pơkâ hneăng hôp mâu kăn tung tung lâp tơnêi têa rôh má 14 dêi Đảng ƀă pơkâ hneăng hôp kân Đảng bô̆ kong pơlê rôh má 1, Vi ban hnê ngăn kuăn pơlê, mâu tíu pêi cheăng ƀă cheăm bêng tơkŭm pêi tơƀrê mâu tơdroăng cheăng ki kal, tơniăn mâu pơkâ rĕng xúa tung rêh ối.