A cheăm Sa Loong, kong pơlê Quảng Ngãi kơdrâm phiu ro tơdroăng tơdah môi rơnó hơngưi krip má môi – Hơngưi Gâk tơkăng kong hơtô hiêm mơno kuăn pơlê. Tơdroăng xua Khu pơkuâ Mô đô̆i gâk tơkăng kong kong pơlê Quảng Ngãi tơrŭm ƀă Viƀan cheăm Sa Loong tơkŭm po, pêng păm tơdroăng tuăn pâ mô đô̆i kuăn pơlê tíu tơkăng kong. Mô đô̆i gâk tơkăng kong kong pơlê Quảng Ngãi pơtroh mâu thái pơkeăng, ƀok pơkeăng rơkê khăm pơlât troh khăm pơlât, hnê mơhno ƀă xing xoăng pơkeăng tê kơtê ăm kuăn pơlê.

Jâ Lường Thị Lá, ối a thôn Hào Phú, cheăm Sà Loong, tối ăm ‘nâi:

‘’Á tro châi mơheăm kơtâu têi, châi kơxêng chêng, châi kơƀrĕn chêng kŏng. Á lăm a kố mê khăm, mê mô đô̆i gâk tơkăng kong khăm ăm á, mê châ pơkeăng. Mâu tơdroăng châi á drêng tơbleăng tối mê ƀok thái pơkeăng xuân xing xoăng pơkeăng. Klêi roh Têt kố mê mơni kô phiu ro, châ mô đô̆i gâk tơkăng kong, tối tơdjuôm cho râ kăn kơpêng tơmâng tŏng gum mê á mơnê hên ‘nâng’’.

Tơdroăng tơdah Têt thăm kơdrâm phiu ro ƀă mâu tơdroăng kơxuô kơƀăn chưng, kơƀăn tét ƀă roh kơchơ ‘’0 liăn’’. Mâu ngế lêng Gâk tơkăng kong rơtế kuăn pơlê kơxuô rêm to kơƀăn, diâp rêm kơxuô tơmeăm, djâ troh ăm kuăn pơlê môi Têt hơtô.

Tung tơdroăng ‘’Hơngưi gâk tơkăng kong hơtô hiêm mơno kuăn pơlê’’ hơnăm 2026, Khu hnê mơhno Mô đô̆i gâk tơkăng kong Quảng Ngãi rơtế mâu tíu pêi cheăng rơtế diâp 450 kơxuô tơmeăm, ki kơnâ vâ chê 300 rơtuh liăn diâp mâu rơpŏng ai hnoăng tơnêi têa, rơpŏng kơtiê ƀă vâi hdrêng ai tơdroăng rêh ối pá puât.

Đông mô đô̆i gâk tơkăng kong Sa Loong ối tŏng gum môi rơpŏng kơtiê môi to ro hdrê, tăng cheăng pêi vâ kuăn pơlê hlŭn ing kơtiê. Đăi tă Trương Thiên An, Kăn pơkuâ hnê ngăn Đảng ŭy, Chính ŭy Mô đô̆i gâk tơkăng kong kong pơlê Quảng Ngãi tối ăm ‘nâi:

‘’Ing mâu tơdroăng, Mô đô̆i gâk tơkăng kong kong pơlê Quảng Ngãi hiăng mơhnhôk tŏng gum diâp kơxuô tơmeăm Têt ăm dâng 2.000 rơpŏng kuăn pơlê ai tơdroăng rêh ối pá puât, rơpŏng kơtiê ƀă rơpŏng ai hnoăng tơnêi têa tung pơlê; tŏng gum tăng cheăng pêi ăm lối 10 rơpŏng. Mâu muăn hok tro tung tơdroăng ‘’Gum o troh hngêi trung’’, ngin mơhnhôk pơlê pơla veăng tơlo tơmeăm khoăng, liăn mâ vâ mâu vâi o ai liăn vâ rôe tơmeăm, hmân ếo, kơxôp mơ-éa pơtối hriâm tâp’’.