Mâu hâi hiăng vâ troh Têt Bính Ngọ 2026, drô péa pâ têa kroăng Dà Nhim, vâi krâ kuăn pơlê pêt kơchâi, plâi pôm a mâu cheăm D’ran, Ka Đô, Đơn Dương, kong pơlê Lâm Đồng xuân ối kơhnâ lăm lo dêi a klâng. Laga, teăng ăm tơdroăng ki hơniâp ro pui xo mâu kơchâi vâ tê ăm kơchơ rôh Têt môi tiah mâu hơnăm hdrối mê hía nah, dế nôkố, kuăn pơlê a tíu kố mê vâi tơkŭm po pông tơnêi, krâ ‘măn triăng vâ tôh têa ƀă mơdâ hdrê pêt ki nếo.

Pôa Phạm Bích, a thôn Đường Mới, cheăm D’ran ăm ‘nâi, kong mê têa kân a mơ’nui hơnăm 2025 pro hên ƀăng tơnêi pêt kơchâi a kĭng têa kroăng Dà Nhim tro mâu tơnêi trâp tâp kơđu, ai tíu ki ‘nâ tơnêi tơhnah tơhnâp ki ó. Tơdroăng ‘mâi mơnhông pêi klâng tiah mê gá chiâng mơdoh hên hâi ƀă kơxô̆ liăn ‘no hrê. Ki hdrối tâ, hên rơpŏng kuăn pơlê rah xo túa pơkâ po pông tơnêi troh lâi, pêt kơchâi troh mê:

“Ai ngế ki ‘nâ mê pêt su hào, pêt kơchâi hơpê vâ pro chôu, pêt plâi tô mat, pêi hăng kân. Tiah mê, mê tơnêi vâ pêt hơlât ki kố. Cho a khế mơniâ khế 1 hiăng châ tê. Nôkố ôh tá châ tê tung rôh Têt xua kơchâi ôh tá teăm kân”.

Tung rôh kong mê têa kân a mơ’nui hơnăm 2025, cheăm D’ran cho môi tung mâu cheăm ki tro tơ’nhiê hên tơmeăm má môi dêi kơpong ki pêt kơchâi Đơn Dương ƀă vâ chê 300ha kơchâi tro têa mơhiu tâi. Pôa Trương Quang Kiên, Phŏ kăn hnê ngăn Vi ƀan cheăm D’ran ăm ‘nâi, tung pơla ‘mâi pêt, kăn pơkuâ cheăm hiăng rơtế prôk ƀă kuăn pơlê, tŏng gum tơdroăng ki ôh tá ai tơnêi vâ kơđu, tơnêi pêt hdrê kơchâi vâ po pông ƀăng klâng. Tơdrêng amê cheăm xuân pơkâ mơ’no mâu troăng hơlâ tŏng gum vâ ăm vâi krâ nhŏng o rĕng ‘mâi mơnhông tơdroăng pêt kơchâi:

“Khu râ Đảng, kăn pơkuâ hiăng krếo thế pêi cheăng ƀă mâu khu tơrŭm hngêi rak liăn pro tơ’lêi hlâu ăm kuăn pơlê châ mung liăn ƀă liăn laih rơpâ vâ ‘mâi pêt dêi mâu hdrê kơchâi klêi kơ’nâi kong mê têa kân lân lu. Râ ủi, kăn pơkuâ cheăm hiăng mơhnhôk vâi krâ kuăn pơlê pêi dêi tơnêi vâ pêt mâu kơchâi tiô rơnó, mâu kơchâi ki iâ khế vâ rĕng châ tâ, châ xo liăn. Troh nôkố, tơdroăng ki ‘mâi mơnhông dêi klâng chiâk klêi kơ’nâi kong mêi khía mơhot têa kân lân lu a ƀăng tơnêi hiăng châ 70%”.

Maluâ Têt kố, hên rơpŏng pêt kơchâi a kơpong ki xiâm cho Đơn Dương ôh ti ai kơchâi vâ tê ăm kơchơ, la a mâu ƀăng klâng ki hdrối nah tro tơnêi tâp kơđu, mâu kloăng hiăng châ mơdâ hiăng hlo drêh ngiât. Mê cho tơdroăng ki pơxúa dêi tơdroăng ‘mâi mơnhông ƀă kuăn pơlê pêi chiâk kơpong pêt hên kơchâi dêi kong pơlê Lâm Đồng.