A kơno ká xixŏng Đông Tác ối tung bêng Phú Yên, kong pơlê Dak Lak, 22 toăng tuk tơnăng ká xi xŏng tơnăng tung dế têa kơxĭ hiăng troh a kơno ká, djâ hên chât tâ̆n ká ngừ têa kơxĭ vâ tê ăm mâu khu tê mơdró ká xi xŏng, tơdâng sap ing 2,5 troh 3 tâ̆n ká. Ki phá môi tiah tuk dêi pôa Phùng Hồng Ánh tơnăng ká 90 tâ̆n ká ngừ. Tuk pôa Bùi Văn Xông tơnăng châ lối 70 to. Yă ká ngừ mơná trĭng apoăng hơnăm châ mâu khu tê mơdró rôe lối 100 rơpâu liăn/kg, tơdâng mâu hơnăm hdrối.

Kơxô̆ ká hên, yă tơniăn, kuăn pơlê tơnăng ká xixŏng pêi lo liăn châ hên. Pôa Bùi Văn Xông, bêng Phú Yên, kong pơlê Dak Lak phiu ro tối ăm ‘nâi:

‘’Hơnăm kố apoăng hơnăm tơdroăng tơnăng ká xi xŏng tơ’lêi hlâu ăm kuăn pơlê, hlo xuân phiu ro, nếo kâng mê môi to kâng chât tơheăm chât to ká mê cho mơnê xeăng hên ‘nâng. Kơxô̆ ká châ hên. Yă ká mê xuân tơniăn’’.

Ngế pơkuâ tuk châ liăn laih, mơngế pêi cheăng tung tuk xuân châ kơxô̆ liăn hên, ai kơxô̆ liăn mơ’no hrê tung roh têt Bính Ngọ. Kuăn pơlê tơnăng ká xi xŏng Phạm Đắc Dũng, kơpong kơphô̆ 4, bêng Phú Yên phiu ro:

‘’Hơnăm kố kong prâi lĕm, ká lo. Á lăm to lâi hâi châ péa tâ̆n to lâi, klâ xoăng môi ngế dâng 15 – 16 rơtuh liăn. Nhŏng o pêi cheăng kâ chia hôm, nhŏng o pêi lo liăn hên’’.

Tiah hmâ, sap apoăng khế 12 mơ’nui hơnăm troh khế môi âm lĭt cho roh ká ngừ lo hên. Klêi kơ’nâi roh mơhot pơtối, têa kơxĭ hiăng vêh lĕm, ká ngừ lo hên hiăng gum kuăn pơlê tơnăng ká xi xŏng tơnăng châ hên, kơnôm mê kuăn pơlê hâk vâ lo lăm a têa kơxĭ tơnăng ká tung mâu hâi têt  ƀă tơdah lo hơnăm nếo a têa kơxĭ. Môi ngế kuăn pơlê tơnăng ká xi xŏng tối ăm ‘nâi:

‘’Klêi kơ’nâi kâng tê ká klêi, kuăn pơlê tơnăng ká xi xŏng hmâ pơtê dâng 1 măng tĭng klêi mê kuăn pơlê pơtối lo lăm tơnăng ká xi xŏng, kâ têt a têa kơxĭ, xua tung môi hơnăm bu to lâi khế kố cho rơnó châ ká hên má môi’’.

Kuăn pơlê xuân pói vâ tung hơnăm nếo 2026 kơvâ pêi chiâk deăng kong pơlê Dak Lak pro tơ’lêi hlâu tah lôi pơkâ chư chêh pơtroh ƀă teăng mê séa ngăn troăng prôk vâ tơ’lêi hlâu ăm kuăn pơlê tung pro mơ-éa tŏng gum têa kơxăng têa châu dêi Chin phuh. Pôa Đăng Cu Em, pơkuâ tuk ká PY91008TS ai tối:

‘’Kơmăi chêh chư pơtroh lối chât hơnăm nôkố hiăng ôh tá tro xếo, chêh chư pơtroh ôh tá tŭm chư. Xua mê pói vâ kơvâ cheăng ăm tah lôi tơdroăng chêh chư pơtroh, xúa ƀă troăng séa ngăn troăng prôk dêi kuăn pơlê’’.

Mâu hâi têt Bính Ngọ hiăng vâ chê troh xuân cho drêng mâu kơno ká ai kơdrâm kơdrěng phiu ro tuk mot lo. Kuăn pơlê pói vâ hơnăm la ngiâ kong prâi tơniăn, kâng châ hên ká, theh trĭng Châu Âu châ tah lôi vâ yă ká ngừ tê ngi kong têa ê châ to, gum kuăn pơlê tơnăng ká xi xŏng tung dế têa kơxĭ kơdroh mâu tơdroăng pá puât klêi môi hơnăm pơla kố nah hên tơdroăng kong prâi pro ôh tá tơniăn. Hơnăm nếo tâi tâng rơtế tơdjuôm ivá djâ tơdroăng tơnăng ká xi xŏng dêi kong pơlê Dak Lak mơnhông mơdêk krá tơniăn.