Klêi kơ’nâi Roh hôp tơpui tơno má pái, kong pơlê Lâm Đồng hiăng môi tuăn rah xo, chêh inâi 21 ngế chiâng vâ tơbleăng tơbriât to pro kăn teăng mâ Kuô̆k hô̆i hneăng má XVI ƀă 133 ngế kăn chiâng vâ tơbleăng tơbriât to pro kăn Hô̆i đong kuăn pơlê kong pơlê Lâm Đồng hneăng hơnăm 2026 – 2031, tơniăn tiô pơkâ rah xo, mâu kăn ki vâ rah xo tiô pơkâ.

Lâp kong pơlê hiăng mơjiâng 124 Vi ƀan tâ phĭu rah xo kăn râ cheăm; 6 Khu tâ phĭu rah xo kăn teăng mâ Kuô̆k hô̆i ƀă 38 Khu tâ phĭu rah xo kăn teăng mâ Hô̆i đong kuăn pơlê kong pơlê. Tiô jâ Phạm Thị Phúc, Phŏ Kăn pơkuâ hnê ngăn cheăng Đảng kong pơlê, Kăn hnê ngăn Vi ƀan Măt trâ̆n Tơnêi têa Việt Nam kong pơlê Lâm Đồng, tơdroăng pêi kêi đeăng tơpui tơno roh má pái cho ki xiâm ki kal vâ kong pơlê pơtối pêi pro mâu troăng pơtối tung tơdroăng tâ phĭu rah xo kăn teăng mâ, hâk vâ chê troh roh tâ phĭu kuăn pơlê pơkuâ dêi hnoăng cheăng, tro luât, tơniăn ƀă păng ‘nâng cho hâi xah hêi ro dêi tâi tâng kuăn pơlê.