Hâi apoăng Rơnó Hơngui kố, pó vâi krâ-nhŏng o ƀă pú hmâ kô rơtế tơmâng ngin tơpui tơno ƀă ngế rơtăm ki kơhnâ rơkê kố.

-Koh kơ ngoh A Định ƀă vâi krâ-nhŏng o a pơlê Têa Pong, méluâ ối a kơpong ki malối xahpá la pơlê pin xuân hiăng châ ƀlêi chiâng mâu hnoăng cheăng pêi pro, xua pơla hdrối kố nah, kơxô̆ rơpŏng ki kơtiê hiăng chu kơdroh rĕng ƀă rế hiá rế ai hên mâu rơpŏng ki ai tơdroăng rêh ối chía tơtêk iâ! Ô ngoh, Ki ƀlêi chiâng má môi dêi vâi krâ-nhŏng o tung thôn pin tung hơnăm kố nah cho tơdroăng ki klâi hah?

Ngoh A Định: Mơnê malối tung hơnăm 2025, Đảng, Tơnêi têa hiăng tŏng gum vâi krâ-nhŏng o ‘na tah lôi hngêi pơtân, hngêi xi kơchoh. Vâi krâ-nhŏng o vâ môi tuăn, rak vế, pêi pro tiô troăng tơdjâ dêi Đảng, Tơnêi têa. Dếkố, ngin xuân hiăng vêh mơnhên tiah kố, vâi krâ-nhŏng o ai tơdroăng rêh kâ ối châ mơnhông ƀă phâi tơtô bu ai môi troăng hơlâ, mê cho: “Mơhriâm tâp”. Vâi krâ-nhong o a thế tơmiât, tôu tuăn, tŏng gum ăm tơdroăng ki tơniăn má môi ăm kuăn ‘nĕng chiâ mơhriâm troh a tui lui, ai tuăn ngôa rơkê plĕng ‘nâi vâ mơnhông dêi rơpŏng hngêi ƀă pơlê pơla rế hía rế châ tơtêk, ai kế kâ, ai kế ‘măn kơdĭng, vâ rơpŏng hngêi phâi tơtô-hơniâp ro. Lâp cheăm athế pêi pro hnoăng cheăng rak vế hneăng mơhnhôk pêi pro pơhlêh “tuăn tơmiât, túa pêi” dêi mơngế hdrông kuăn ngo ki iâ mơngế, pro ăm kuăn pơlê hdrông kuăn ngo kơdo mơ-eăm mơnhông cheăng kâ vâ hluăn ing kơtiê tơniăn ton”.

-Ing hơnăm 2023, ngoh A Định hiăng hâk phiu xua châ Ngế pro xiâm hnê ngăn Chin phuh diâp ƀâng kơdeăn khĕn ‘na mâu hnoăng cheăng tung rak vế, pêi pro tiô troăng tơdjâ, troăng pơkâ dêi Đảng, Tơnêi têa a pơlê cheăm dêi tơná. Mê ngoh mơnúa tối nhên ‘na mâu tơdroăng cheăng ki mê ga trối lâi?

Ngoh A Định: Ahdrối tơná vâ hnê tối ăm vâi krâ-nhŏng o loi tơngah, mê tơná pin athế kơdo mơ-eăm ahdrối, malối cho mơnhông ‘na pêi cheăng kâ. Trối rơpŏng á mơnhông pêi cheăng kâ, pêt mơjiâng hdrê loăng ton hơnăm trối kơxu, kơphế, mắc ca tơdrêng amê xuân păn chu hdrê rơkái, kéa ‘ngré ‘ngró, păn í, păn ká vâ ai kế tơmeăm tung rơpŏng hngêi. Tơná á ƀă rơpŏng hngêi xuân kơdo mơ-eăm vâ mơnhông pêi cheăng kâ vâ vâi krâ-nhŏng  hlo ki tơƀrê dêi túa cheăng kâ mê vâ pêi pro ƀối. Tơkéa vâ tối, mâu tơdroăng ki tơná pin athế pêi pro ahdrối vâ vâi krâ hlo ki pin hiăng chiâng pêi pro mê vâ ing mê, chiâng ivá ki mơhnhôk vâi krâ-nhŏng o kơdo mơ-eăm pêi pro ƀối. Trối Pôa Hồ Chí Minh hiăng hnê tối: “Đảng viên prôk ahdrối pơlê prôk tiô kơ’nâi”, á kơdo mơ-eăm tung rêm kơvâ cheăng.

-Tiô tơdroăng châ ‘nâi, ngoh Định hiăng mơhriâm ƀă mơgêi Hngêi trung Đăi hok Luât, la nốkố, prếo vêh a pơlê vâ pêi cheăng kâ, ƀă hnối veăng gum mơjiâng pơlê pơla. Tung pơla mê, dế nôkố, hên vâi kuăn ‘nĕng hiăng lo ing pơlê lăm troh pêi cheăng a pơlê kong kân vâ tí tăng pêi tơdroăng cheăng vâi. Mê ngoh ai tơmiât trối lâi ‘na tơdroăng kố?

Ngoh A Định: Dế kố, vâi droh rơtăm tung thôn hlo hiăng ai hên ngế lo lăm pêi cheăng kâ hơngế a Bình Dương, Đồng Nai, Sài Gòn. Tiô á, ki tro má môi khu droh rơtăm mê athế kơdo mơ-eăm pêi cheăng kâ dêi a pơlê cheăm tơná. Trối á hlo dế kố, mâu tơdroăng ki vâ mơnhông cheăng kâ ga ai hên, ki má môi tơnêi tíu vâi krâ-nhŏng o hiăng ai, ki má péa, mâu vâi droh rơtăm ai ivá cheăng kô chiâng vâ pêi kâ, ki má pái cho kế tơmeăm ki mơjiâng pro dêi xêh. Dế kố, Đảng, Tơnêi têa hiăng tŏng gum hên tơdroăng, ki xiâm dêi Hnoăng cheăng xiâm Tơnêi têa ai veăng gum hên ăm kế tơmeăm, ki má pŭn, pơhlêh tuăn tơmiât túa pêi kâ dêi vâi krâ kuăn pơlê akố hiăng pơhlêh hên. ‘Na mơnhông pêi cheăng kâ a thôn pơlê trối á hlo nôkố hiăng ai hên vâi droh rơtăm rơkê, xua hên ngế kơhnâ rơkê tung pêt mơjiâng loăng kơphế, kơxu xua mê, pêi lo liăn ngân, kế tơmeăm tơniăn. Hên rơpŏng hngêi pêi châ lo liăn tơniăn tâ tâng vâ pơchông ngăn ƀă mâu ngế ki lăm pêi cheăng kâ a pơlê kong kân.

Ngoh A Định: Tung tơdroăng ki mơjiâng túa vêa dêi thôn ngin xuân hiăng pâ phêp, tơpui tơno ƀă vâi krâ-nhŏng o, tơpui tơno klêi mê, Chi ƀô̆ xuân hôp, vâ môi tuăn, Măt trâ̆n, khu râ cheăng thôn xuân athế môi tuăn, kơ’nâi mê nếo lăm nap túa vêa mê ăm cheăm, kong pơlê ăm phêp ‘nôi. Tiô túa vêa dêi thôn, mê rêm khế thôn tơkŭm hôp môi xoh ƀă vâi krâ-kuăn pơlê a kuât. Tung mê, ki má môi cho hnê mơhno tối vâi krâ-nhŏng o ‘na mơnhông pêi cheăng kâ, pêi lo kế tơmeăm, ki má péa hnê tối ăm kuăn pơlê rak vế, pêi pro troăng tơdjâ dêi Đảng, troăng pơkâ ‘na luât dêi Tơnêi têa, ki má pái cho hnê vâi krâ-nhŏng o tung pơlê ôh tá khoh ăm vâi droh rơtăm tá hâi tro hơnăm mơjiâng on veăng, ƀă mơdât  tơdroăng ki xo dêi pó achê môi mơheăm chhá, môi jâ pôa. Ing mâu tơdroăng hnê tối dêi khu râ kăn hnê ngăn cheăng kal kí a thôn pơlê, tung mê ai: chi hô̆i ngăn vâi Kơdrâi, Khu ngăn vâi lêng hơnăm hiăng krâ, Măt trâ̆n, Krâ pơlê ƀă  Mơngế ki châ kuăn pơlê loi tơngah, tiah mê, dế kố tung thôn pơlê ôh pa ai xếo tơdroăng ki mâu droh rơtăm ta hâi tro hơnăm rĕng xo dêi pó, ôh tá ai xếo mâu vâi droh rơtăm môi jâ môi pôa xo dêi pó.

-Ngoh A Định hiăng mơjiâng môi kơbong ki krê tung hngêi vâ pơkuâ ngăn dêi tơdroăng cheăng

-Tơdrêng ƀă tơdroăng rêh kâ ối, pêi cheăng kâ rế hía rế xông tơtêk, mê vâi krâ-nhŏng o tung thôn pơlê pin hiăng mơjiâng túa tơlá rêh ối tiô túa lĕm tro nếo. Mê êh mơnúa tối ngăn i nhên tâ ‘na tơdroăng ki mê?

Ngoh A Định: Dế nốkố, thôn ngin rêm hơnăm xuâ ối rak vế tĭng kâ báu nếo, rak vế khu tôu chêng kơhnhon xuăng mê cho khôi túa, vêa vong dêi mơngế Rơteăng pin sap ing nah troh nôkố, mê athế hnê tối ăm vâi krâ-nhŏng o pơtối rak vế, pêi pro. Ki rơhêng vâ tối, á đi đo mơhnhôk vâi krâ-nhŏng o veăng gum dêi tuăn mơno ƀă ivá cheăng vâ mơjiâng thôn pơlê, tơveăng gum ăm vâi krâ-nhŏng o pêi lo kế tơmeăm châ tê mơ’no dêi kế tơmeăm pêi lo ing chiâk deăng. Mơhnhôk vâi krâ-nhŏng o hnê tối, ăm djâ dêi kuăn ‘nĕng lăm troh a hngêi trung, rơpŏng ki lâi ai kuăn ‘nĕng hmâ to lo pơtê hriâm mê ngin kô tối inâi pơtâng tối a loa dêi thôn, xua ing tơdroăng ki mơjiâng pro túa vêa dêi thôn mê á hlo mâu tơdroăng pơkâ dêi thôn hiăng châ ai pơxúa păng ‘nâng”.

-Hôm! Pâ mơnê kơ ngoh A Định! Drêng mot tung hơnăm nếo Bính Ngọ, rơkâu êh ngoh ƀă vâi krâ-nhŏng o a pơlê Têa Pong ai tơdroăng rêh ối phâi tơtôu, kro niân, hơniâp ro!