Sap ing kơxo má, krâm kuăn pơlê hiăng tơkŭm troh a plông Hngêi kuăn pơlê tơkŭm hôp a bon Jarah, cheăm Nâm Nung, kong pơlê Lâm Đồng vâ veăng leh mơdĭng Tam Blang Mprang ƀon. Tung hâi sôk ro tâng idrâp chêng, mơngiơk ếo pơtâk lĕm vâi xâp, kuăn pơlê nâ tó kơ’nhŏn xuăng tiô idrâp chêng “Tơdah tơmối”. Môi ngế rơtăm M’Nông tối inâi dêi tơná:

“Inâi a Y Bằng, hâi kố a veăng rơtế ƀă mâu khu tung ƀon Jarah tơkum xah hêi ro leh mơdĭng “Tăm blang mprang ƀon”  a ƀon Jarah vâ rơkâu pâ ăm kong mêi tro, tô ‘ló, rêh ối tơniăn lĕm ôh tá tro pơreăng kâ, ƀă vâ kuăn pơlê rêh ối hơniâp lĕm ƀă hlối rơkâu pâ pêi cheăng pon mơhúa vâ kuăn pơlê châ sôk ro, kuăn pơlê akố đi đo rak túa lĕm tro ing nah, hên ăm rơxông kô troh rơxông kơ’nâi, túa vêa vong lĕm tro ton nah ôh tá la lâi lôi”.

A plông ‘na ngiâ Hngêi kuăn pơlê bon Jarah hmâ tơkŭm hôp dêi cho kâng ki vâi tâp tiô khôi hmâ ing nah dêi mơngế M’Nông rơnuâ krip. Akố, mâu tơmeăm têk pleăng xối xeăng hiăng châ kuăn pơlê hbrâ.  Mâu tơmeăm pleăng mê ai 3 xiâm drôu, môi to ko chu, on trĭng, kơchâ lŭm kơpêi, môi kât prế bông pik mơheăm í, um pro mâu kuăn kiâ ki păn mê cho kơpôu, ro, chu, pupái, mâu tơmeăm pê lo ing chiâk ƀă mâu kơchâi kâ tiô khôi hmâ dêi mơngế M’Nông. Ƀă mâu tơmeăm ki ôh tá chiâng lôi, mê cho loăng pleăng, xú vâ pro kơnâng dêi pơlê. Tung pơla tĭng, pôa pơchâu rơkâu pâ:

“Ô mâu xeăng ngo, xeăng têa, xeăng kong... hâi ki kố á xối kô kuăn pơlê pâ mâu xeăng troh vâ mơnhên pro mơdĭng xối ăm kơnâng pơlê pêt, pâ mâu xeăng rak ngăn loăng ăm xông drêh lĕm. Ngin kuăn xuân pâ mâu xeăng rak ngăn tơdroăng rêh ối dêi kuăn pơlê mo lĕm châ, ôh tá châi tamo. A tíu ki kố, ngin kuăn pro mơdĭng pâ krếo mâu xeăng troh akố vâ ôu drôu xiâm, kâ hơ’nêh chu bă kuăn pơlê.

Klêi rơkâu pâ, pôa pơchâu krếo Krâ pơlê râng triăng drôu, tơbleăng tơdroăng pro mơdĭng “Tăm  Blang Mprăng ƀon”. Khu tŏn chêng ƀă khu kơ’nhon xuăng têk kŏng dêi rơpó xuân rơtâ tá mâu ƀai ki ro.

Pôa pơchâu xối a tíu po leh mơdĭng ki kal mê cho jâ H’Đêm, môi ngê̆ nhân rơkê hên tơdroăng ối a ƀon Jarah, cheăm Nâm Nung. Kuăn pơlê ăm ‘nâi “Leh mơdĭng Tam Blang Mprang ƀon” châ tơkŭm po klêi mơgêi rơnó. Peăng tơdroăng pro leh ai 2 leh ki xiâm apoăng cho xối ăm jâ pôa, klêi mê xối ăm chiâk deăng, rơkâu ivá, ƀă mơ’nui cho leh mơdĭng Tam Blang Mprang ƀon. Klêi xối xeăng, pôa “xo prế kât a kŏng rơkâu pâ ăm trâm tơdroăng hơniâp, ăm kuăn pơlê mo lĕm châ ƀă tơmối troh veăng xah hêi. Klêi pêt loăng pleăng a ngiâ bo cheăng hngêi kuăn pơlê tơkŭm hôp dêi bon Jarah, ja H’Đêm tối:

“Tung pro leh mơdĭng Tăm Blang Mprang ƀon”, a teăng mâ kuăn pơlê tung pơlê rơkâu pâ xeăng pôi tá ‘nhó mâu tơdroăng xôi dêi kuăn pơlê pro ƀă pâ xeăng kring vế kuăn pơlê châ hơniâp tơniăn”.

Ngê̆ nhân Ưu tú Y Xuyên, krâ pơlê ƀon Jarah, ăm ‘nâi: kô cho mơdĭng hmâ pro ing nah dêi mơngế M’Nông, mơhno tơdroăng ki ro kơ’nâi môi hơnăm pêi cheăng kâ hên, nhŏng o tung pơlê mo lĕm châ, hlối tơngah hơnăm nếo trâm tơdroăng ki lĕm nếo. Pôa Y Xuyên hâk tơngăm: “Leh mơdĭng Tăm Blang Mprang ƀon” nếo châ Khu xiâm ngăn Túa lĕm tro Tơ’noăng Ivá ƀă ôm hyô mơnhên tối cho tơmeăm khoăng ton nah ki kơnía dêi tơnêi têa.

“Ki pơxúa khât “Tăm Blang Mprang ƀon” cho vâ kring vế, ôh tá ăm mâu ki ‘mêi châ chông djâ, pro tơ’nhiê pơlê dế lĕm ro, ƀă púi vâ ăm mâu kuăn cháu pôi tá châi tamo, kuăn pơlê mo lĕm châ, rêh ối hơniâp ro; Pêi chiâk deăng ôh tá tro kơnái kơnot chêm chok chăm chói kâ ‘nhiê. Kố cho túa lĕm tro ing nah dêi mơngê M’Nông ngin”.

Leh mơdĭng “Tăm Blang Mprang ƀon” dêi mơngế M’Nông ối a kơpong xiâm kăch măng Nâm Nung, kong pơlê Lâm Đồng hiăng  mơgêi tung idrâp chuât xơtó chêng ƀă rơkong tríu hâk tó dêi kuăn pơlê. Tơdroăng leh mơdĭng mê troh pro sôk ro tâ, tâi tâng mơhno ki púi vâ ‘na môi hơnăm nếo kong mêi tro tô ‘lo, pêi cheăng châ xo hên, pơlê pin hơniâp lĕm, ivá mo sêi, tâi tâng tơrŭm dêi rơpó ƀă pơtối tơrŭm  kring vế, rak tơmeăm ki kơnía ing nah dêi pâ pôa.