Tơdroăng “Rơnó Hơngui tơdjuôm ivá rak têa kơxĭ – Têt pêng păm tuăn pâ pơla khu mô đô̆i ƀă kuăn pơlê’’ tơkŭm po tung tơdroăng hơtô lĕm, tuăn mơjo pâ. Mâu tơdroăng rơhdruê xuăng kheăn kơdeăn têa kơxĭ, rơlố pơlê xiâm, um méa dêi mơngế lêng Gâk kring têa kơxĭ pêi pro hnoăng a mâu toăng tuk gâk vế pêi cheăng, rơ’jíu, tíu kơmăi radar, hngêi trá đông pêng têa DK1… ƀă rơnó Hơngui tơnêi têa chôu ‘măn ăm hên tơdroăng tâ phoih rơrêk tung hiâm mơno trâu hơngế, veăng gum tơrŭm tuăn pâ pơla khu mô đô̆i ƀă kuăn pơlê tíu kơpong têa kơxĭ, rơlố, kơpong tơnêi peăng Hdroh dêi Tơnêi têa. Đăi tă Phạm Ngọc Quý, Kăn pơkuâ Kal kí kơpong 2 Lêng gâk kring têa kơxĭ tối ăm ‘nâi:

“Tơdroăng ‘’Rơnó Hơngui tơdjuôm ivá rak ngăn têa kơxĭ – Têt pêng păm tuăn pâ pơla khu mô đô̆i ƀă kuăn pơlê klăng roh Têt Lo hơnăm nếo vâ tơbâ mâu rơpŏng ai hnoăng ƀă tơnêi têa dêi pơlê, tíu cheăng, tơdrêng amê, tŏng gum mâu kơxuô tơmeăm ki kal xúa rêm hâi ăm mâu ngế lêng ai tơdroăng rêh ối pá puât. Ƀă mâu vâi muăn kuăn cháu dêi kuăn pơlê tơnăng ká xi xŏng mê tíu cheăng ối tơdah râng ko, xuân pói vâ gum mâu vâi muăn ƀă rơpŏng tơdah Têt tơkŭm dêi pó, tŭm têk tâ. Ing mê, thăm rak krá tơniăn tung tơrŭm môi tuăn khu lêng kuăn pơlê tung pêi pro mâu hnoăng cheăng ki xiâm hơnăm 2026.''

Tiô Đăi tă Đỗ Hoàng Duyên, Phŏ Chính ủi Kơpong 2 Lêng gâk kring têa kơxĭ: Tơdroăng ‘’Rơnó Hơngui tơdjuôm ivá rak têa kơxĭ – Têt pêng păm tơdroăng tuăn pâ khu lêng kuăn pơlê’’ cho roh vâ kăn ƀô̆, mâu lêng rơtế kuăn pơlê rơtế gum dêi pó mâu tơdroăng phiu ro koh tơdah Têt, troh lâp lu tuăn pâ, têk tơdroăng hơtô rơnó Hơngui a ko têa kơxĭ, a tíu ai khía tơlâu tơlŏn hên. Ing mê, veăng gum pơtâng tối, hnê hriâm tơdroăng ki lĕm tiô khôi vâi nah Khôi túa lĕm tro Têt tiô khôi vâi krâ nah dêi hdroâng mơngế, mơnhông hiâm mơno tŏng gum dêi pó, pâ dêi pó tung rêm ngế kăn ƀô̆, đoân viên droh rơtăm.

Veăng tung tơdroăng phiu ro tung hnoăng cheăng, jâ Bùi Thị Thu Hương – Phŏ Kăn hnê ngăn Vi ƀan cheăm Long Sơn, Pơlê kong kân Hồ Chí Minh, tối ăm ‘nâi: pêi pro khu râ kăn pơkuâ cheăm, kong pơlê 2 râ, mô đô̆i khu lêng gâk kring têa kơxĭ đi đo rơtế kuăn pơlê tung hên tơdroăng pêi cheăng:

‘’Kơpong kố đi đo ai tơdroăng tơrŭm pơla khu lêng ƀă kuăn pơlê, kuăn pơlê tơnăng ká xi xŏng lo lăm tung dế têa kơxĭ tơnăng ká xi xŏng, rêh ối kơnôm to ing têa kơxĭ. Kơpong tơmâng tŏng gum kuăn pơlê, tŏng gum kuăn pơlê ing rak tơniăn a têa kơxĭ troh tơdroăng rêh ối hiâm mơno xuân môi tiah kế tơmeăm’’.

Djâ troh tơdroăng phiu ro ăm mâu rơpŏng ai hnoăng tơnêi têa, ối pơtối gum ivá ăm mâu vâi o hok tro cho kuăn ‘nĕng, cháu chái dêi kuăn pơlê tơnăng ká xi xŏng châ Kơpong 2 Khu lêng gâk kring têa kơxĭ tơdah roăng rak. O Lê Triệu Tuấn Việt, hok tro Hngêi trung râ má péa phôh thong Bình Châu 2, phiu ro tối:

“Á châ tơdah kơxuô tơmeăm dêi mâu tăm á phiu ro ‘nâng, hâk vâ ‘nâng. Á châ mâu tăm tŏng gum tung tơdroăng hriâm tâp, hơnăm kố nah á châ do inâi hok tro chía hôm.  Xông kân ah á vâ pro mô đô̆i Kring vế gak ngăn Têa kơxĭ, lơ mô đô̆i ki ê, xua á châ mâu vâi tăm tơdah roăng rak vâ la ngiâ ah drêng xông kân hdrah a xuân veăng gum gâk kring Tơnêi têa, vâ ai tơdroăng tơniăn, hơniâp ro’’.

Rơtế ai i hiâm mơno ki phoih rơrêk, nâ Ngô Thị Quốc, rơrêk tung hiâm mơno tối:

‘’Á hơniâp ro ‘nâng ƀă mơnâ mâu mô đô̆i hiăng tá hiâm mơno tŏng gum ƀă tơdah xo roăng rak. Rêm hơnăm troh hâi Têt, Kơpong 2 Khu lêng gâk kring têa kơxĭ pơrá mơhnhôk ƀă ai mâu kơxuô tơmeăm rơkâu Têt ăm rơpŏng, tơdroăng ki kố pơxúa ‘nâng, gum rơpŏng á kơdroh hên tơdroăng ki hngăm. Á ai ki klâi ôh pakĭng rơkong mơnê hên troh mâu lêng kring vế, gak ngăn têa kơxĭ, rơkâu mâu vâi meh, mâu vâi tăm môi rơnó hơngui phiu ro păng ‘nâng’’.

Tơdroăng “Rơnó Hơngưi tơdjuôm ivá mơno rak ngăn têa kơxĭ – Têt pêng păm tuăn pâ pơla khu mô đô̆i ƀă kuăn pơlê” cho tơdroăng pêi djâ ki rơkê trâu hơngế, mơhno tối tơdroăng ki lĕm “Khoh niân tiah hâi kố kơnôm hnoăng vâi krâ nah’’, tiô khôi vâi krâ nah, “Khu mô đô̆i ƀă kuăn pơlê pơrá ai tơdroăng ki kơdo mơ-eăm’’, ing mê, pơtối mơnhên hnoăng, tuăn pâ ƀă tơdroăng ki loi tơngah dêi mâu kăn ƀô̆, mâu lêng Kơpong 2 Khu lêng kring vế têa kơxĭ ƀă kuăn pơlê tung cheăm bêng ƀă kuăn ‘nĕng vâi krâ kuăn pơlê tơnăng ká xi xŏng - mâu ngế dế plâ hâi plâ măng tơnăng ká tung dế têa kơxĭ, kring vế têa kơxĭ, rơtế ƀă Khu lêng kring vế, gak ngăn têa kơxĭ Việt Nam tiô hnoăng pơkuâ rak têa kơxĭ, rơlố krih tơviah ki tơniăn lĕm dêi Tơnêi têa.