*Mơngế M’Nông a cheăm Quảng Trực, kong pơlê Lâm Đồng đi đo hâk tơngăm dêi pơlê cheăm cho kơpong pro kăch măng. Tơmâng ngăn troh kơpong tơkăng kong kố, mâu hơnăm hdrối mê hía nah, Tơdroăng pơkâ dêi Tơnêi têa ‘na kơdroh kơtiê krá ton hiăng ‘no liăn pro klêi mâu troăng prôk, hno têa; rơtế ƀă tơdroăng têa tah hngêi ối pơtân xi kơchoh, gum kuăn pơlê hmiân tuăn pêi cheăng kâ. Jâ Thị Brao, ngế ki châ kuăn pơlê loi Ƀon Bu Prăng 1, cheăm Quảng Trực ăm ‘nâi, kuăn pơlê M’Nông đi đo mơdêk khôi hmâ kăch măng, tơrŭm mơjiâng pơlê cheăm rế hía rế kro mơdrŏng lĕm.

“Drêng troh hơnăm nếo, á rơhêng vâ vâi krâ kuăn pơlê đi đo mo sêi, tơrŭm, pâ nhuô̆m tŏng gum dêi pó, pôi tá pơrah, rơtế ƀă dêi rơpó mơ-eăm mơnhông cheăng kâ ƀă rak vế túa lĕm tro dêi pơlê cheăm. Ƀon Bu Prăng 1 ngin kố cho kơpong pro kăch măng, sap ing to lâi rơxông vâi krâ kuăn pơlê đi đo rak vế ƀă mơnhông ki lĕm tro tơmeăm kơnía git khôi hmâ lĕm tro tơniăn lĕm. Tơdroăng rêh kâ ối dêi vâi krâ nhŏng o rế hía rế tơniăn, vâi krâ nhŏng o đi đo tơmâng ngăn, mơhnhôk kuăn ‘nĕng kơhnâ hriâm tâp, hriâm ƀối khoa hok kih thuât, xúa tung pêi chiâk pêi deăng vâ mơdêk ki lĕm dêi loăng kơxu, kơphế. Ing mê, veăng mơjiâng tơdroăng rêh kâ ối rế hía rế phâi hơtôu, hơniâp lĕm”.

*Kuăn pơlê Bơhnéa a cheăm Ia Băng kong pơlê Gia Lai, tơdah hơngui hơnăm nếo Bính Ngọ ƀă tơdroăng xôk ro hiăng pơ’lêh tâi tâng. Ing tơdroăng bú ‘nâi to pêi chiâk pêi klâng pêt báu, nôkố kuăn pơlê  hiăng ‘nâi hriâm, xúa khoa hok kih thuâ̆t păn mơnăn, pêt loăng plâi ton hơnăm... châ xo liăn hên. On tơhrik, troăng prôk, hngêi trung, hngêi pơkeăng châ ’no liăn pro lĕm, krúa, hên rơpŏng hiăng rôe ôtô, kơmăi vâ pêi chiâk ƀă mâu tơmeăm xúa tung rơpŏng hngêi... Tơdroăng rêh ối châ mơnhông, tuăn loi a Đảng, Tơnêi têa, thăm krá. Mơhno ăm hlo ki hiăng pơ’lêh mê, pôa Đư̆nh, kuăn pơlê ối a pơlê Biă Tih, cheăm Ia Băng, ăm ‘nâi:

“Nôkô, kơnôm pêt kơphế, yă kơphế to kơnâ, hên kuăn pơlê a mâu pơlê, ngế ki ‘nâ rôe ô tô, rôe rơxê pơchoh chêk, krê rơxế hon đa vâ tối hngêi ki lâi xuân ai, tung rơpŏng hngêi ki ai to lâi ngế mê ai rơxế to mê há. Tơdroăng rêh ối nôkố hiăng tơƀrê, tơdroăng mê kơnôm ‘nâi hriâm ing mơngế Xuăn mê nôkố tơdroăng rêh ối hiăng mơnhông tơƀrê tâ”.

*A cheăm Ngọk Tụ, kong pơlê Quảng Ngãi, ngoh A Xương, mơngế Rơteăng, cho đảng viên hơnăm ối nếo, Ngế cheăng Măt trâ̆n hlối Tôh trưởng Tôh Gâk kring thôn Têa Pong. Ngoh ăm ‘nâi, thôn mơnhông krá tơniăn cho kơnôm ing rế hía rế pơhlêh túa tơmiât, túa pêi; pin pro tro ‘ló troăng hơlâ pơkâ dêi Đảng, luât dêi Tơnêi têa; tơrŭm, tŏng gum dêi rơpó tung rêh kâ ối. Ngoh A Xương ăm ‘nâi:

“Nôkố, vâi krâ kuăn pơlê tung thôn xuân hiăng châ ‘nâi hên tơdroăng hnê tối, pơhlêh kơxô̆ ƀă hên ki ê. Drêng ai troăng hơlâ pơkâ dêi Tơnêi têa ngin hnê tối ăm vâi krâ kuăn pơlê hriâm tâp, hlê plĕng ‘na kong ngê̆ kơxô̆, túa ki po ngăn mâu tơdroăng ki kal ‘na tíu kuăn pơlê rêh ối, hnê ăm kuăn pơlê hlê ƀă xúa kong ngê̆, tiah app VNeID, hnê ăm vâi krâ kuăn pơlê tơ’lêi tung tơdroăng ki po ngăn troăng hơlâ tŏng gum dêi Tơnêi têa ‘na tơdroăng tung thôn, mâu hlá mơ-éa dêi tơná, ƀă dêi rơpŏng ƀă hên ki ê. Á xuân ro nôkố mâu rơpŏng tung thôn hiăng ‘nâi “pơhlêh túa tơmiât, túa pêi”, khên tơnôu pơhlêh mâu hdrê pêt ki ôh tá dâi lĕm tung ƀăng tơnêi vâ pêt mâu hdrê pêt ton hơnăm tê châ yă kơnâ môi tiah kơxu, kơphế ƀă mâu hdrê pêt ki ê. Vâi krâ kuăn pơlê môi tuăn, tơkŭm pêi chiâk deăng, mơ-eăm pro kro mơdrŏng”.

*Phiu ro hlo tơdroăng rêh ối rế pơ’lêh, jâ Nay H’Thu, Phŏ kăn hnê ngăn chi ƀô̆ buôn Tong Sê, cheăm Ia Pa, kong pơlê Gia Lai, sôk ro ăm ‘nâi, đảng viên kal pêi pro ahdrối tơdroăng lĕm tro tung mâu tơdroăng cheăng vâ pơlê thăm rế phâi tơtô.

“Hơnăm ton hiăng luâ, hơnăm nếo troh, hên tơdroăng púi vâ dêi rơpŏng hngêi mo lĕm đi đo, rêh ối tơniăn. A púi vâ mâu vâi muăn kuăn cháu nguăn loi, kơhnâ hriâm vâ xo ah hmôi chiâng mơngế ki ai pơxúa ăm pơlê pơla. Á xuân đi do tơbâ ăm tơná thế rêh ối lĕm kơhnâ, hvái ngăn ‘na ngiâ, pro troăng lĕm ăm kuăn pơlê tung pơlê pêi pro ƀối, rơtế ƀă dêi rơpó mơnhông cheăng kâ, mơjiâng tơdroăng rêh ối lĕm tâ”.

*Hơ’muăn ‘na tơdroăng kâ Têt, pôa Y Tloi Niê, Ngế pơkuâ ƀuôn Čư̆ Păm, cheăm Dang Kang, kong pơlê Dak Lak ăm ‘nâi, hơnăm hdrối nah vâi krâ kuăn pơlê tung pơlê trâm hên xơpá xua kong prâi. Châ tơdroăng tơmâng ngăn, tŏng gum dêi Tơnêi têa, ‘na tơdroăng rêh kâ ối, vâi krâ kuăn pơlê hiăng tơniăn vâ tơdah rơnó hơngui. Pôa rơhêng vâ hơnăm nếo tơdroăng rêh kâ ối dêi kuăn pơlê mâu kơpong ki têa lân lu kô tơniăn ro tâ.

“Á loi tung hơnăm nếo kố, Tơnêi têa pơtối tơmâng ngăn, tŏng gum vâ vâi krâ kuăn pơlê tơmiât troh tơdroăng phâi hơtôu. Pakĭng mê, á xuân rơhêng vâ ai tơ’nôm mâu troăng hơlâ tŏng gum mâu ngê̆ nhân ki tŏn chêng koăng, gum vâi ai tơ’nôm ivá vâ rak vế ƀă mơnhông túa lĕm tro hdroâng kuăn ngo”.

*Hơnăm 2025, Đoân Droh rơtăm cheăm Hòa Ninh, kong pơlê Lâm Đồng  hiăng tơbleăng hên tơdroăng ai pơxúa khât a tơdroăng rêh ối. Khu kăn hiăng tơrŭm ƀă Hngêi trung Đại học Đà Lạt mơjiâng 2 tơmeăm khoăng “Bâ eăng thôn pơlê” a thôn 5a ƀă 10a; pakĭng mê, diâp ăm hrĭng kơxu tơmeăm mê cho hlá mơ-éa chêh, tơmeăm xua tung hriâm ăm mâu hok tro kơtiê ki mơ-eăm hriâm rơkê; Tơkŭm po hnê tối ‘na hbrâ mơdât ma tŭi, tơhôu tơpâm dêi rơpó tung hngêi trung ƀă mâu vâi o phô̆m xông kân. Đoân Droh rơtăm cheăm veăng rak ngăn kơxô̆ liăn ki mung ing hngêi rak liăn  kum mâu kơtiê ƀă ki chĕn vâ chê 30 rơtal liăn kum hrĭng ngế hơnăm ối nếo ai tíu tơngah krá vâ mơnhông tê mơdró. Nâ Ka Sôi - Kăn hnê ngăn Đoân Droh rơtăm cheăm Hòa Ninh, kong pơlê Lâm Đồng, ăm ‘nâi:

“Vâ mơnhông tơdroăng rêh ối dêi kuăn pơlê kong ngo, á púi ngah Tơnêi têa pơtối a mâu luât pơkâ mơhno túa lĕm tro hlối hnê mâu kăn ƀô̆ kuăn ngo a pơlê cheăm. Ƀă khu droh rơtăm, á đi đo hnê pơchân ăm mâu vâi thế chôu pâ rơkong Pôa Hồ hnê ‘na tơdroăng thế ‘nâi rak vế  rơdêi ki tơrŭm dêi rơpó. Rêm ngế hơnăm ối nếo cho mơngế ki djâ troăng ahdrối kơhnâ pêi cheăng kâ, ‘nâi plĕng hnoăng tơná ki kum veăng mơjiâng pơlê xiâm tơná. Bú ai tơrŭm môi tuăn dêi rơpó mê pin nếo kâi rak khôi túa, vêa vong mơnhông dêi pơlê rế xông tơƀrê”.

*Klêi kơ’nâi ‘mot tơkŭm sap ing mâu cheăm Gia Bắc, Sơn Điền (hdrối nah), cheăm Sơn Điền nếo ối tung cheăm malối xơpá dêi kong pơlê Lâm Đồng, ƀă hên hdroâng kuăn ngo. A kơpong hngế hngo, droh rơtăm tung cheăm dế ‘no dêi ivá hơnăm ối nếo vâ mơjiâng pơlê cheăm. Nâ Ka Hành - Ƀí thư Đoân Droh rơtăm cheăm Sơn Điền, ăm ‘nâi, chôu rơkong hnê pơchân dêi Pôa “Môi hơnăm pơxiâm sap ing rơnó Hơngui, plâ rơxông pơxiâm sap ing mâu hơnăm ối nếo. Hơnăm ối nếo cho hơngui dêi pơlê pơla”... khu droh rơtăm djâ troăng ahdrối tung mâu tơdroăng tơ’noăng:

“Tung hơnăm nếo 2026, á rơhêng vâ pêi châ hên tơdroăng ki nếo. Mê cho mơhnhôk mâu kơxô̆ liăn veăng tơlo vâ tŏng gum ăm mâu vâi o hok tro ki xơpá, tơkŭm po mâu tơdroăng túa lĕm tro, tơ’noăng ivá, xuân môi tiah tơmiât vâ pro kâu lak ƀô̆ tŏn chêng koăng ăm mâu vâi o a tíu kố. Mâu tơdroăng ki ngin tơmiât vâ pro tŭm tơmeăm droh rơtăm: troăng kơtúa hlá cơ “bâ-drêh-krúa-lĕm”, pêt reăng a Tíu meăn tơbâ mâu ngoh khên tơnôu cheăm Sơn Điền; tơkŭm po tơdroăng hnê ‘na hbrâ ví klâk têa ăm mâu vâi o ki kŭn. Á rơhêng vâ droh rơtăm pin kô mơeăm hriâm tâp troh tui lui vâ hlê plĕng mâu tơdroăng rêh kâ ối, ‘nâi túa pêi cheăng kâ, mơnhông mơdêk rơpŏng hngêi ƀă pơlê cheăm tơná.

*Nâ H’Vinh, ngế hơnăm ối nếo cheăm Đức An, kong pơlê Lâm Đồng cho môi tung mâu ngế hơnăm ối nếo, kơhnâ veăng mâu tơdroăng tơ’noăng a kong pơlê. Pơtối rak ki môi tuăn dêi rơpó hơnăm ối nếo tung pêi pro pơkâ hôp Đảng rêm râ, H’Vinh rơtế ƀă hên đoân viên, droh rơtăm tung pơlê djâ troăng ahdrối tung pêi cheăng kâ, mơjiâng tơdroăng rêh ối nếo, veăng mơjiâng pơlê rế ton rế hơ’lêh nếo, mơnhông tơƀrê. Nâ H’Vinh, tối:

“Hơnăm 2025 cho môi hơnăm ƀlêi trâng dêi tơnêi têa, hdró ki ƀlêi trâng klêi tơniăn dêi hneăng hôp Đảng. Ing mâu troăng hơlâ ki tro dêi Hneăng hôp, tơdrêng ƀă kăn hnê ngăn, pơkuâ nhên khât dêi Đảng ủi râ cheăm, bêng, kong pơlê hiăng mơ-eăm tâi tâng troh mơnhông cheăng kâ, túa lĕm tro, tơdroăng rêh ối dêi kuăn pơlê, ing mê pro xiâm mâu rôh pơ’lêh nếo, tơƀrê nhên tung tơdroăng rêh ối dêi kuăn pơlê. Cho droh rơtăm, tơná á kô ôh tá la lâi pơtê kô mơ-eăm hriâm, rơnêu pât, kơhnâ veăng pêi tơdroăng cheăng Đoân a  cheăm bêng kong pơlê, pơtối rak vế ki rơhêng vâ dêi hơnăm ối nếo, veăng ‘no hnoăng kŭn kĭn tơná tung mơnhông dêi pơlê xiâm tơná”.