Kơno tuk ká tung mâu hâi achê Têt, tơdroăng pêi cheăng a mâu kơno ká a peăng mâ hâi lo Dak Lak thăm rế kơdrâm, phiu ro. Hrĭng toăng tuk ká lo lăm tơnăng ká xi xŏng a Trường Sa, hrĭng toăng tuk ki ê hiăng vêh, tung tuk pêng ká xi xŏng kơnâ liăn. Kơbố xuân phiu ro xua tơdah hơnăm nếo ƀă kơxuô tơmeăm dêi têa kơxĭ:

‘’Hơnăm kố apoăng hơnăm tơdroăng tơnăng ká tơ’lêi hlâu ăm kuăn pơlê, hlo xuân phiu ro, nếo mot môi toăng mê tơpah tơheăm chât tâi tâng, a ngiâ cho mơnê kô xeăng ‘nâng. Châ xuân hên ‘nâng. Yă mê gá xuân tá hâi to lâi, xuân tơniăn’’.

‘’Hơnăm kố tơ’lêi hlâu, khía lĕm, ká lo. Á lăm péa to lâi hâi châ lối péa tâ̆n, xoăng môi ngế dâng 15, 16 rơtuh, nhŏng o ai liăn xúa, pêi kâ hôm, nhŏng o pêi lo liăn’’.

Tơmot chiâng môi, mâu kong pơlê Tây Nguyên, môi tiah Dak Lak, Gia Lai, Lâm Đồng pơrá ai têa kơxĭ. Têa kơxĭ ôh tá xê to kế ki ai tơmeăm khoăng, xi xŏng mê ối cho tíu tê ngi kong têa ê ki má môi tơmeăm pêi lo ing chiâk deăng kân a peăng kơpong kân rơdâ, ƀă kơphế, tiu, sầu riêng, kơchâi drêh, reăng pơrá cho hên kơxô̆ tơmeăm lâp tơnêi têa.

Tiô pôa K’Bril – Kăn pơkuâ thôn Kambute, cheăm Đơn Dương, kong pơlê Lâm Đồng tối, râ ki kân nếo dêi tơdroăng pêi chiâk deăng -  cheăng kâ rak ngăn kong – ká xi xŏng Tây Nguyên ôh tá xê to riân  ing ƀăng deăng, mê ối riân ƀă tơdroăng châ tơƀrê hôm tung pêi chiâk deăng rơkê.

‘’Nôkố kuăn pơlê hiăng xúa kơmăi pơchoh chiâk kân, mơ’no pro troăng klông ki tôh rơkê, kih thuât pêt rak ngăn rế hía rế châ mơdêk… Thôn Kambute ki hên hdrối nah cho hngêi pơtân, nôkố cho hngêi 2 râ, 3 râ, kơxô̆ rơpŏng kuăn pơlê ai rơxế ô tô to cho hên’’.

Mơgêi 2025, krê ki kơnâ pêi chiâk deăng – cheăng kâ rak ngăn kong – ká xi xŏng dêi Tây Nguyên – Nam Trung bộ hiăng châ 140.000 rơtal liăn tiô yă pro pơhlêh chiâng troăng kân ăm phêp rơxế kơtâu têi Khánh Hoà – Buôn Ma Thuột hiăng klêi mơjiâng pro hên kơpong; troăng kân ăm phêp rơxế kơtâu têi Pleiku - Quy Nhơn hiăng klêi mơjiâng pro, gum tơmeăm pêi lo ing chiâk deăng – cheăng kâ rak ngăn kong – ká xi xŏng châ hên dêi Tây Nguyên tơ’lêi hlâu troh a kơno tuk ká.

Phŏ Yăo sư - Tiê̆n sih Lê Đức Niêm, Phŏ Kăn pơkuâ Hngêi trung Đăi hok Tây Nguyên tối, Tây Nguyên nôkố hiăng ai tơdroăng cheăng kâ tŭm tâ.

‘’Tây Nguyên ôh tá xê to cho kơpong pêi chiâk deăng lơ on tơhrik ki vêh bro, mê hiăng tơdjêp krá tơniăn ƀă logistic, cheăng kâ têa kơxĭ, kơmăi kơmok pro tơmeăm kâ dêi Duyên hải Nam Trung bộ. Xua tơdroăng ki hên mê hiăng chiâng ai tơnêi tơníu ki rơlối kân vâ mơjiâng mâu tơdroăng cheăng ki kơnâ tŭm tâi tâng’’.

Rơtế ƀă kế tơmeăm ki rơdêi dêi kơpong pêi chiâk deăng – cheăng kâ rak ngăn kong – ká xi xŏng ƀă hên má môi lâp tơnêi têa, Tây Nguyên nếo u ối lối 1.000 km kĭng têa kơxĭ, ƀă mâu ‘núa têa kơxĭ ối tung tíu ki lĕm má môi lâp plâi tơnêi. Hyôh khía pê ngiâ têa kơxĭ, chêng koăng chuât a kơpong kân rơdâ, ôm hyô dêi Tây Nguyên kô rĕng chiâng môi trang ki nếo. Tiô pôa Lương Nguyễn Minh Triết, Kăn pơkuâ hnê ngăn cheăng Đảng kong pơlê Dak Lak, vâ pêi pro mâu tơmeăm ki ai hlâu mơnhông mơdêk, xúa mâu tơmeăm ki rơdêi dêi kơpong, mâu cheăm bêng dế tơkŭm ivá tung pơhlêh xúa kŏng ngê̆ ƀă hngêi trăng, troăng klông tơdjêp Peăng mâ hâi Lo – Peăng mâ hâi Luô. A Dak Lak, pơhlêh xúa kŏng ngê̆ hiăng chiâng pơkâ thế pêi pro:

“Thâ mơjiâng pơkâ pêi mơnhông khoa hok kŏng ngê̆ hneăng hơnăm 2026 – 2030… pêi pro mâu ƀai toăn ki kân dêi kong pơlê môi tiah pro mơ-éa cheăng kâ rêh ối ƀă tơnêi têa, pro mơ-éa tơnêi têa, ‘na mơnhông pêi chiâk deăng, ôm hyô rơkê; hbrâ ví kong prâi pro ôh tá tơniăn, pơkuâ gâk ngăn kong’’.

Ing mâu roh lo lăm tơnăng ká xi xŏng plâ Têt a têa kơxĭ, mâu ‘núa têa kơxĭ xŏn prêi rơbông lĕm troh mâu chiâk deăng kơphế kân rơdâ ƀă mâu kơdrum kân rơdâ pro hngêi nhĕng, hngêi hlâm ki rơkê, um ‘na môi kơpong cheăng kâ ki ƀeăn ƀĕng rơkê Nam Trung Bộ - Tây Nguyên dế hlo nhên. Drêng têa kơxĭ râng kŏng kong’’ ing mâu troăng kân ăm phêp rơxế kơtâu têi ƀă troăng klông, kơpong kố ôh tá xê to mơdêk tơdroăng rêh ối ăm kuăn pơlê mê ối hbrâ vâ xông mơ-eăm chiâng môi tơdroăng ki tơtêk nếo, gum tơxâng tung tơdroăng tơmiât chal xông mơ-eăm xêh dêi hdroâng mơngế.