Tung rôh pêi dêi hnoăng cheăng a Pơlê kong kân Hồ Chí Minh klăng rôh Têt tiô khôi hmâ dêi hdroâng mơngế - Rơnó Hơngui Bính Ngọ 2026, tung tơdroăng ki hâk phiu Đảng – hâk phiu Rơnó Hơngui, a kơxê hâi lơ 11/2, pôa Phạm Minh Chính, Ngế pro xiâm hnê ngăn tơnêi têa hiăng troh pôu, rơkâu Têt mâu kăn pơkuâ Đảng, Tơnêi têa hneăng hdrối ƀă têk nhang ăm mâu kăn pơkuâ Đảng, Tơnêi têa ki hiăng hlâ a Pơlê kong kân Hồ Chí Minh.

Pôa Phạm Minh Chính, Ngế pro xiâm hnê ngăn tơnêi têa ƀă khu kăn ki pêi dêi hnoăng cheăng hiăng troh pôu, rơkâu Têt pôa Nguyễn Minh Triết, kăn xiâm hnê ngăn tơnêi têa hneăng hdrối; pôa Trương Tấn Sang, Kăn xiâm hnê ngăn tơnêi têa hneăng hdrối; pôa Nguyễn Tấn Dũng, Ngế pro xiâm hnê ngăn tơnêi têa hneăng hdrối.

A mâu tíu pôu, drêng hơnăm nếo Bính Ngọ 2026, pôa Phạm Minh Chính, Ngế pro xiâm hnê ngăn tơnêi têa rơkâu mâu kăn pơkuâ Đảng, Tơnêi têa rơtế ƀă tâi tâng rơpŏng hngêi vâi ivá mo sêi, hơniâp ro mâu tơdroăng cheăng ƀlêi chiâng; rơhêng vâ mâu kăn pơkuâ hneăng hdrối kố veăng gum tơdroăng tơpui hnê tối khŏm mơ-eăm, kơnía git xua tơdroăng mơnhông dêi tơnêi têa, xua phâi hơtôu, hơniâp ro dêi kuăn pơlê. Ôu, rơkâu têt rơpŏng ƀă têk nhăng mâu kăn xiâm pơkuâ Đảng, Tơnêi têa ki hiăng hlâ, pôa Phạm Minh Chính, Ngế pro xiâm hnê ngăn tơnêi têa rơkâu mâu ngế tung rơpŏng pôa Nguyễn Văn Linh, Kăn xiâm pơkuâ hnê ngăn cheăng Đảng ki hiăng hlâ, pôa Phạm Hùng, Kăn xiâm hnê ngăn Hô̆i đong Ƀô̆ trưởng ki hiăng hlâ, pôa Võ Văn Kiệt, Ngế pro xiâm hnê ngăn tơnêi têa ki hiăng hlâ, pôa Phan Văn Khải, Ngế pro xiâm hnê ngăn Chin phuh ki hiăng hlâ, tŭm tâi tâng hdrông hdrê mâu kăn ki mê tung rơpŏng hngêi ivá mo sêi, tơniăn, hơniâp ro, tơdah Têt Bính Ngọ 2026 tơrŭm, hơtôu, hơniâp ro, hơnăm nếo tơniăn lĕm, kro mơdrŏng.