Koh hmât pó vâi krâ nhŏng o, vâi pú, mâu lêng tung lâp tơnêi têa ƀă kuăn pơlê pin ối a kong têa ê !

Rơnó Hơngui hiăng troh, tung chôu phut tâi hơnăm ton vâ lo hơnăm nếo, a rơkâu tâi tâng kuăn pơlê, vâi pú, mâu lêng tung lâp tơnêi têa ƀă mâu kuăn pơlê pin ki rêh ối a kong têa ê pakĭng rơkâu hơnăm nếo trâm tơdroăng lĕm tơniăn, mo sêi ƀă hơniâp ro. A pâ pơtroh kơ tâi tâng kuăn pơlê, vâi pú kong têa ê mâu rơkong rơkâu ki lĕm tro má môi, rơkâu môi hơnăm nếo tơniăn, hơniâp ƀă rơtế mơnhông tơtêk.

Hơnăm Ất Tỵ 2025,  tơnêi têa pin hiăng tơkâ luâ môi hơnăm hdró hên tơdroăng ki kal kân, ai pơxúa kân ƀă hiăng pêi châ hên tơdroăng ki tơxâng hâk tơngăm; pakĭng mê, xuân cho môi hơnăm tơnêi têa pin athế tơkâ luâ hên tơdroăng xơpá, pơloăng mơnúa, ƀă mâu tơdroăng pơ’lêh rĕng, ai hên tơdroăng pá, ôh ta ‘nâi hdrối mâu tơdroăng tung lâp plâi tơnêi ƀă tung kơpong, tơdrêng ƀă hyôh kong prâi pro ôh tá tơniăn, pro lŭp hên tơmeăm khoăng, pro hên tơdroăng châi heăng, sĭng hơ’nêng ăm kuăn pơlê pin.

Ƀăng hiâm mơno khên tơnôu, tuăn mơ-eăm, rế hiá rế ó rơdêi, tâi tâng Đảng, tâi tâng kuăn pơlê, tâi tâng mâu lêng pin hiăng tơrŭm dêi rơpó, tơdjuôm ivá môi tuăn môi mơno, pơtối rak ivá ó rơdêi tâi tâng hdrông mơngế ƀă ai veăng gum dêi vâi pú lâp plâi tơnêi, pin hiăng pê klêi tâi tâng mâu tơdroăng pơkâ ki hiăng tơbleăng pêi, ƀă hên tơdroăng hdró ăm hlo pơxúa khât: Tơniăn krê, pơkuâ dêi, tâi tâng tơrŭm môi, tơniăn lâp tơnêi têa, châ rak ki hơniâp lĕm krá; ki tơrŭm cheăng kâ má môi lâp plâi tơnêi, chiâng tơnêi têa pê lo liăn hên; tơdroăng rêh ối châ tơmâng khât; tơdroăng kal kí, pơlê pơla tơniăn; cheăng lêng, châ kring tơniăn ƀă mơdêk; tơpui tơno, tơrŭm tơrôa ƀă lâp plâi tơnêi; pro xiâm ki kal vâ tơnêi têa mot tung chal nếo mơnhông tơƀrê.  

Mot tung hơnăm nếo Bính Ngọ 2026 – Hơnăm ki apoăng pêi pro Pơkâ Hneăng hôp XIV dêi Đảng, ƀă tơdroăng tiah hmâ pâ nhuô̆m tơnêi têa, hiâm mơno tơrŭm, tuăn ngoâ khên tơnôu ƀă rơhêng vâ mơnhông rơdêi, tâi tâng Đảng, tâi tâng kuăn pơlê, tâi tâng lêng pin kô pơtối tơrŭm, tơdjuôm ivá môi hiâm mơno, pro pơxúa ing rôh ki tơ’lêi hlâu, tơkâ luâ mâu tơdroăng xơpá, pơloăng mơnúa, mơdêk rơdêi tuăn mơno loi tơngah, tơdroăng ki pơkuâ séa ngăn xêh, ivá mơeăm xêh, hâk tơngăm hdroâng mơngế, ôh tá la lâi pơtê pơhlêh nếo tơmiât pêi rơkê, pêi pro kơhnâ vâ pơhlêh chiâng ƀlêi chiâng pơkâ pêi mơjiâng tơnêi têa Việt Nam hơniâp lĕm, tơniăn krê, kro mơdrŏng, ó rơdêi, rơkê plĕng, hơniâp lĕm.

Tung tơdroăng ro tơdah rơnó Hơngui nếo, môi xôh nếo, Á rơkâu kuăn pơlê, mâu vâi pú, mâu lêng tung lâp tơnêi têa ƀă kuăn pơlê pin ki rêh ối cheăng kâ a kong têa ê hơnăm nếo ƀlêi chiâng nếo, hdroâng mơngế ƀă kuăn pơlê pin rế hía rế kro mơdrŏng, ai tơdroăng rêh ối phâi hơtôu, tơniăn krê, hơniâp lĕm.

Koh mơnê ƀă khŏm ƀlêi trâng!