Tâ phĭu pôk kăn – hâi leh kân dêi kuăn pơlê, cho tơdroăng ki hdró roh tơniăn lĕm, cho tơdroăng vâ mơjiâng môi Tơnêi têa luât pơkuâ krá rơdêi, môi pơlê pơla tơdâng tơ’mô, rơkê plĕng. Kố cho rôh hnoăng châ pơkuâ dêi Kuăn pơlê châ mơhno tơdrêng má môi, châ tối mơnhên ƀă tơdroăng pêi pro tro tung rêm kơtâ phĭu. Yăo sư, Tiê̆n sih Nguyễn Minh Đoan, giảng viên cao cấp hngêi trung Đại học Luật Hà Nội tối: Ing tơdroăng tâ phĭu, Kuăn pơlê veăng lăm tâ tơdrêng tung tơdroăng pơkâ mâu tơdroăng pơkuâ ki kal dêi tơnêi têa ƀă kong pơlê; veăng tơdrêng tung pơkuâ ngăn tơnêi têa ƀă pơlê pơla ing mâu kơ koan pơkuâ xiâm xua tơná pôk xo:

“Kố cho rôh kuăn pơlê mơhno hnoăng pơkuâ dêi tơná ing tơdroăng ki rah xo mâu ngế ki ai tuăn ngoâ rơkê, ai hiâm mơno lĕm lơ pin khĕn cho mâu ngế ki kơhnâ rơkê dêi mâu rơxông phá tơ-ê dêi rơpó tung pơlê pơla vâ veăng pêi cheăng tung mâu kơ koan pơkuâ cheăng, kơ koan teăng mâ dêi kuăn pơlê. Ƀă drêng gá ai pơxúa khât tơdjâk troh ki pơxúa ôh tá xê to dêi tơnêi têa mê dêi rêm ngế kuăn pơlê mê drêng mê kuăn pơlê hlo tơdroăng lăm tâ phĭu môi tiah môi hâi leh kân la tơdrêng amê vâi hlối hlo tơdroăng tâ phĭu mê gá pơxúa khât”.

Rôh tâ phĭu pôk kăn Kuô̆k hô̆i hneăng XVI ƀă kăn Hô̆i đong hnê ngăn kuăn pơlê hơnăm 2026–2031 po tung pơla tơnêi têa mot tung môi hneăng mơnhông tối cho ivá mơnhông. Tá hâi la lâi Việt Nam trâm hên rôh tơ’lêi tung tơdroăng cheăng la ngiâ môi tiah nôkố: tíu ối ƀă tơdroăng châ kong têa vâi ê loi nhuô̆m châ mơnhông; tơdroăng púi rơhêng vâ mơnhông tơtêk ó rơdêi, kro mơdrŏng chiâng ivá hiâm mơno ó rơdêi; khoa hok – kong ngê̆, pơhlêh kơxô̆, cheăng kâ kơxô̆ po troăng ăm mâu rôh mơnhông mơdêk nếo, pơhlêh nếo pơkuâ ngăn tơnêi têa châ mơhno ăm hlo nhên.

Tung pơla tơdroăng mê, rôh tâ phĭu pôk xo kăn rôh kố ôh ti xê djâ ki pơxúa ăm hneăng cheăng 5 hơnăm mê cho tơdroăng rah xo ăm troăng prôk dêi tơnêi têa, ăm tơdroăng ki rơkê plĕng dêi tơdroăng pơkuâ ngăn tơnêi têa, ăm kơlo pêi pro pơhlêh tơdroăng púi rơhêng vâ mơnhông tung hên hơnăm pơtối. Tiô Tiê̆n sih Nguyễn Viết Chức – Phŏ pơkuâ Vi ƀan Túa lĕm tro, Yăo yuk, Droh rơtăm, Phô̆m vâ xông kân ƀă Vâi hdrêng dêi Kuô̆k hô̆i hneăng hdrối, tung pơla mê pâ thế rêm ngế kuăn pơlê hlê plĕng nhên tâ tơdroăng dêi tơnêi têa ƀă tơdroăng mơnhông dêi tơnêi têa tro ƀă hnoăng cheăng pôu râng rah xo dêi tơná:

“Pin dế mot tung môi chal athế pêi pro tơdroăng púi rơhêng vâ dêi hdroâng mơngế, troh hơnăm 2045 chiâng môi tơnêi têa mơnhông. Pơkâ mơ’no mâu tơdroăng pơkâ thế pêi gá hên ƀă pâ thế mâu kăn Kuô̆k hô̆i athế ai hiâm mơno lĕm, tuăn ngoâ rơkê tâ, ivá khŏm mơ-eăm vâ pêi cheăng ƀă athế tơviah tâ. Ƀă kuăn pơlê athế rế hlê plĕng hnoăng cheăng pôu râng ƀă hnoăng pơxúa dêi tơná drêng tâ phĭu pôk xo kăn. Mê hâi leh kân kố cho hâi ki tơviah. Rêm ngế kuăn pơlê athế mơdêk hnoăng cheăng dêi tơná vâ rah xo ƀă hlê plĕng kố cho hnoăng pơxúa la rế cho hnoăng cheăng pôu râng ƀă tơdroăng mơnhông dêi tơnêi têa”.

Rôh tâ phĭu pôk kăn Kuô̆k hô̆i hneăng 16 ƀă kăn Hô̆i đong hnê ngăn kuăn pơlê rêm râ hơnăm 2026 – 2031 rế ai pơxúa ó khât drêng po tung pơla Hneăng hôp khu kăn lâp tơnêi têa rôh má XIV dêi Đảng ƀlêi chiâng tơniăn lĕm, mơnhên nhên troăng ngăn, tơdroăng pơkâ pêi mơnhông tơnêi têa tung hneăng nếo ƀă rah xo mâu ngế cheăng tung la ngiâ ai hiâm mơno khên tơnôu ‘na cheăng kal kí, hiâm mơno lĕm tơdrăng, túa tơmiât pơhlêh nếo ƀă púi vâ pleăng.

Pôa Nguyễn Văn Phúc, Phŏ pơkuâ Vi ƀan cheăng kâ dêi Kuô̆k hô̆i hneăng hdrối tối tiah kố: ƀlêi chiâng dêi Hneăng hôp ôh ti xê pro chiâng ivá ƀlêi chiâng ‘na cheăng kal kí krá rơdêi, mê ối ‘mâi mơnhông tơdroăng loi dêi Kuăn pơlê tung tơdroăng pơkuâ dêi Đảng – tơdroăng rơkê plĕng tung pơkâ mâu tơdroăng ƀlêi chiâng dêi kăch măng Việt Nam.

“Hneăng hôp Đảng rôh má 14 pơla hdrối nah ƀlêi chiâng tơniăn lĕm hiăng po môi chal mơnhông nếo, chal mơ-eăm tơná dêi hdroâng mơngế Việt Nam. Kuăn pơlê loi khât tung tơdroăng pơkuâ dêi Đảng ƀă loi khât a Kuô̆k hô̆i cho kơ koan teăng mâ kân má môi dêi kuăn pơlê, kơ koan pơkuâ xiâm Tơnêi têa kân má môi. Kuăn pơlê kô rah xo tro, pôk ‘ló mâu ngế ki tơxâng veăng cheăng tung Kuô̆k hô̆i vâ pêi pro tro, xêt tơƀrê, rơkê tung pái kơvâ cheăng ki kal má môi dêi Kuô̆k hô̆i, ing mê, veăng gum pêi pro mâu hnoăng cheăng xua Hneăng hôp rôh má 14 dêi Đảng hiăng mơ’no”.

Drêng Kuăn pơlê lăm tâ phĭu pôk kăn tung tơdroăng ki loi a troăng hơlâ hiăng châ Hneăng hôp Đảng mơnhên, ƀă drêng kơ koan cheăng tơnêi têa châ mơjiâng tung tơdroăng mê, mê cho ivá rơdêi, pro chiâng ivá mơ-éa kân vâ tơnêi têa krá rơdêi mơnhông tung hneăng mơnhông nếo.