A Hngêi hôp thôn 2, cheăm Phú Xuân, kong pơlê Dak Lak hên kuăn pơlê rơtế ƀă Khu pơkuâ ngăn thôn dế pêi pro klêi cheăng hbrâ rơnáu ăm tíu tâ phĭu kơxô̆ 10. Ƀăng rôl, khâuh hiê̆u, hlá cơ châ kơtúa krâu lĕm; kơthung ki tâ phĭu, kơƀăng tăng, on tơhrik têa, hngêi mơdrah pơrá châ hbrâ rơnáu tŭm, krúa. Pôa Trần Văn Hùng, ngế ki ối tung Tôh tâ phĭu kơxô̆ 10 ăm ‘nâi, hâi lơ 15/3 la ngiâ, 1.060 ngế kuăn pơlê kô lăm tâ phĭu akố. Kơnôm ing rĕng pêi pro, cheăng hbrâ rơnáu mâu tơmeăm ƀă túa pơkâ rak vế tơniăn hiăng châ pêi pro a hâi leh kân dêi kuăn pơlê.

“Ing mâu inâi kuăn pơlê châ pơkâ têa a hô̆i trương thôn 2 mâu hâi hdrối kố nah, ngin xuân hnê tối, hnê mơhno ăm vâi krâ kuăn pơlê tăng ‘nâi nhên mâu ngế ki tơbriât to pro kăn. Ing mê, rah xo mâu ngế ki ai tŭm tơdroăng ki kuăn pơlê kal, tơdroăng ki hriâm ƀă tơdroăng ki rơkê tung pêi cheăng vâ pôk xo mot cheăng tung Kuô̆k hô̆i xuân môi tiah Hô̆i đong hnê ngăn rêm râ”.

Cheăm Phú Xuân châ mơjiâng sap ing tơdroăng ‘mot tơkŭm 3 to cheăm Ea Púk, Ea Dăh ƀă Phú Xuân (ối tung tơring Krông Năng ton). Tâ phĭu pôk kăn teăng mâ Kuô̆k hô̆i hneăng XVI ƀă Hô̆i đong hnê ngăn rêm râ pơla hơnăm 2026 – 2031, cheăm ai dâng 25 rơpâu ngế kuăn pơlê lăm tâ phĭu a 7 tíu pôk, 19 tíu tâ phĭu. Pôa Nguyễn Tiến Ấn, Phŏ hnê ngăn Vi ƀan cheăm, ngế ki cheăng tung Vi ƀan tâ phĭu cheăm ăm ‘nâi, troh nôkố, 19/19 hiăng pêi pro tâi tâng mâu tơmeăm ki hbrâ rơnáu, gâk kring tơniăn, têa mâu inâi dêi mâu ngế ki vâ to pro kăn châ têa tơbleăng tơdrêng ƀă tơbleăng ing hyôh internet; mâu rôh hôp trâm kuăn pơlê xuân hiăng châ tơkŭm po klêi, hbrâ rơnáu ăm hâi leh kân dêi tâi tâng kuăn pơlê.

“Vi ƀan hnê ngăn cheăm Phú Xuân hiăng hbrâ rơnáu ‘mêng rơnêu, rơnuâ têa mâu ƀâng rôl, khâuh hiê̆u, kơthung tâ phĭu ƀă hên ki ê a mâu tíu tâ phĭu tro tiô pơkâ dêi Hô̆i đong tâ phĭu Tơnêi têa. Troh nôkố, mâu tơdroăng ki hbrâ rơnáu ăm rôh tâ phĭu hiăng klêi. Tơdroăng pơkâ tơniăn mâu inâi têa tơbleăng a mâu tíu tâ phĭu xuân dế châ pêi pro ƀă hbrâ rơnáu ăm rôh tâ phĭu”.

A cheăm MDrak, kơtăn ing tíu pêi cheăng kong pơlê Dak Lak dâng 90km, tơdroăng ki hbrâ rơnáu ăm rôh tâ phĭu xuân hiăng hlo hơniâp ro há. Pôa Nguyễn Đức Thảo, Kăn hnê ngăn Vi ƀan cheăm, Kăn hnê ngăn Vi ƀan tâ phĭu cheăm ăm ‘nâi, rôh tâ phĭu pôk kăn teăng mâ Kuô̆k hô̆i hneăng XVI ƀă Hô̆i đong hnê ngăn rêm râ a cheăm ai dâng 15.800 ngế kuăn pơlê lăm tâ phĭu a 10 to tíu ối tung 8 to tíu pôk. Troh nôkố, cheăng hbrâ rơnáu ăm rôh tâ phĭu hiăng klêi tâi tâng, hbrâ rơnáu ăm hâi tâ phĭu. Pôa Nguyễn Đức Thảo tối:

“Nôkố, ngin hiăng têa tŭm inâi mâu ngế ki tơbriât to pro kăn a mâu tíu tâ phĭu, mâu kơpong rêh ối tơdjuôm ƀă tíu pêi cheăng Vi ƀan hnê ngăn cheăm. Tơkŭm po klêi rôh hôp tơkêa má 3 ƀă tơbleăng inâi ki păng ‘nâng cho 40 ngế tơbriât to pro kăn pôk xo 24 ngế kăn Hô̆i đong hnê ngăn cheăm pơla hơnăm 2026 – 2031”.

Tiô jâ Cao Thị Hòa An, Ngế cheăng tung tíu xiâm Đảng, Phŏ pơkuâ ngăn Đảng kong pơlê, Kăn hnê ngăn Vi ƀan tâ phĭu kong pơlê Dak Lak, vâ ăm dâng 2,42 rơtuh ngế kuăn pơlê, kong pơlê hiăng mơjiâng 102 Vi ƀan tâ phĭu râ cheăm, bêng, xoăng 2.119 kơpong tâ phĭu. Troh nôkố, tâi tâng kơpong tâ phĭu hiăng hbrâ rơnáu klêi tíu tâ phĭu mâu kơƀăng tăng, rak tơniăn tŭm tơdroăng; mâu hvêa prôk tơkêa, têa inâi kuăn pơlê ƀă tơkŭm po rôh trâm kuăn pơlê vâ kăn cho ngế ki to briât to pro kăn tối tơbleăng tơdroăng pêi pro tro pơkâ, hbrâ rơnáu ăm hâi tâ phĭu.

Kăn hnê ngăn Vi ƀan tâ phĭu kong pơlê Dak Lak pơkâ thế mâu khu râ, kơvâ cheăng ƀă Vi ƀan hnê ngăn mâu cheăm, bêng pơtối séa ngăn krá tơniăn inâi kuăn pơlê, rak tơniăn ăm kuăn pơlê ai tŭm tơdroăng pơrá châ lăm tâ phĭu.

“Athế tơtrŏng séa ngăn nhên inâi kuăn pơlê, vâ rak tơniăn pôi tá ăm ai tơdroăng ki ối piu ngế ki lâi. Malối cho kuăn pơlê dế ối pêi cheăng a mâu kơpong pêi cheăng, tíu pêi cheăng, lăm pêi cheăng hngế; kuăn pơlê cho hok tro, sinh viên; xuân môi tiah mâu ngế ki tá hâi ai căn cước công dân, dế pơlât a mâu tíu khăm pơlât xuân athế châ séa ngăn tŭm, rak vế hnoăng kuăn pơlê tâi tâng pơrá châ veăng lăm tâ phĭu”.

Ƀă tơdroăng ki hbrâ rơnáu tŭm, tơniăn sap ing kong pơlê troh cheăm bêng, 102 to cheăm bêng a Dak Lak hiăng hbrâ rơnáu ăm hâi kuăn pơlê lăm tâ phĭu. Sap ing tơdroăng ki hbrâ rơnáu klêi mâu kế tơmeăm troh séa ngăn tơrêm ngế inâi kuăn pơlê, tâi tâng pơrá tơmiât troh ki xiâm cho ôh tá ăm tro piu ngế ki lâi. Hâi lơ 15/3 la ngiâ, rơtế ƀă kuăn pơlê tung lâp tơnêi têa, lối 2,42 rơtuh ngế kuăn pơlê Dak Lak kô châ veăng tung hâi leh kân dêi tơnêi têa.