A cheăm tơkăng kong Ia Chia, mâu hâi kố, tơdroăng hbrâ ăm tâ phĭu tơkŭm po thâ. Sap ing kơxo má, kăn ƀô̆, mâu mô đô̆i Đông Mô đô̆i gâk tơkăng kong Ia Chia hiăng ai mâ a mâu thôn, pơlê, tơrŭm rơtế mâu pơlê pơtâng tối, mơhnhôk kuăn pơlê ‘na hnoăng cheăng gâk kring hnoăng pơkuâ tơnêi tơníu, gâk kring tơkăng kong tơnêi têa; hnoăng ƀă hnoăng dêi kuăn pơlê tung pêi pro tơdroăng tâ phĭu. Pôa Phạm Văn Phúc, Kăn pơkuâ Chi ƀô̆ pơlê Kom Yố, cheăm Ia Chia tối ăm ‘nâi, ing rêm roh pơtâng tối, kuăn pơlê ôh tá xê to hlê plĕng nhên tâ hnoăng ki pơxúa, hnoăng dêi tơná ƀă ối thăm loi tơngah a tơdroăng pơkuâ dêi Đảng, tơdroăng pơkuâ dêi khu râ kăn pơkuâ cheăm.

‘’Troh nôkố hiăng pơtâng tối tâ phĭu châ 3 roh, nôkố a thôn pơlê, tôh tâ phĭu kơxô̆ 5 hiăng kêi đeăng tơdroăng tĕm inâi kuăn pơlê. Hâi tâ phĭu tro hâi lơ 15/3/2026 hiăng pơtâng tối tâi tâng kuăn pơlê ‘nâi nhên mâu tơdroăng xiâm tung tơdroăng tâ phĭu’’.

Tung pơlê pơla, hnoăng dêi mâu krâ pơlê, mâu ngế ki kuăn pơlê loi tơngah pơtối châ pêi pro, tơdrêng pơtâng tối ‘na ki kơnâ tâ phĭu, mơhnhôk kuăn pơlê rơkê tung rah xo kăn teăng mâ tơxâng, tơdrêng amê mơdêk kơchăng mâu tơdroăng ki tối ôh tá troh, pro tơklâ tơdroăng tơrŭm môi tuăn hdroâng mơngế. Krâ pơlê Rơ Châm Chích, pơlê Beng, cheăm Ia Chia tối:

‘’Á  tối rơdêi hên tơdroăng vâ kuăn pơlê hlê plĕng, vâ rơkê rah xo mâu ngế ki ai hiêm mơno lĕm, tuăn ngôa rơkê, ai hiâm ki vâ ƀă mơ-eăm tâi hiâm mơno ƀă tơdroăng pêi cheăng vâ tŏng gum kuăn pơlê. Ngin cho tíu cheăm tơkăng kong xua mê kal kơchăng mâu tơdroăng ki ‘nhê tơdroăng hơniêp lĕm ƀă pro tơxul tơxal rôih hnâp dêi mâu ngế ki hêng hôu tơnêi têa, ôh tá tơmâng tiô, ôh tá tiô, thế pêi kơtăng mâu troăng hơlâ dêi Đảng, troăng hơlâ luât dêi Tơnêi têa ƀă mâu pơkâ dêi kong pơlê’’.

Thiê̆u tă Nguyễn Thanh Bảo, Cheăng kal kí Đông Mô đô̆i gâk ngăn tơkăng kong Ia Chia tối ăm ‘nâi: Pêi tiô hnê mơhno dêi mâu râ kơpêng, đông lêng tơdrêng troh rêm rơpŏng kuăn pơlê vâ tơno, hnê mơhno inhên, gum kuăn pơlê hlê plĕng ki kơnâ, ki kal dêi roh tâ phĭu; mơdêk hiêm mơno kơchăng, rak tơdroăng tơrŭm môi tuăn tâi tâng hdroâng mơngế tíu tơkăng kong.

‘’Mơdêk hlê plĕng dêi kuăn pơlê hlê plĕng nhên tơdroăng ki vâ pêi pro, ki kơnâ, tơdroăng ki xiâm dêi roh tâ phĭu. Ing mê kuăn pơlê rơkê rah xo mâu kăn teăng mâ ki ai hiêm mơno lĕm, rơkê, teăng mâ ăm rơkong tơpui dêi kuăn pơlê tung cheăm, ki rơhêng vâ tối cho cheăm tơkăng kong. Kuăn pơlê xuân mơhno tơdroăng ki khŏm mơ-eăm xuân môi tiah tơdroăng môi tuăn, kuăn pơlê pơkuâ dêi hnoăng cheăng tung hlá phĭu dêi tơná. Ngin pơtâng tối vâ kuăn pơlê mơdêk hlê plĕng kơchăng; pêi kơtăng mâu troăng prôk, troăng hơlâ dêi Đảng, luât dêi Tơnêi têa ƀă hbrâ, mơdât mâu tơdroăng pêi dêi mâu ngế ki hêng hôu tơnêi têa, tơtrâ, pro tơklâ tơdroăng tơrŭm môi tuăn hdroâng mơngế’’.

Cheăm Ia Chia hiăng pêi pro 6 tíu tâ phĭu  a 10 thôn, pơlê; kêi đeăng mâu khu cheăng tơdroăng kal pơtâng tối, tơniăn gâk kring, tơleăng tơdroăng xăm tối, xăm tơkêng…Ƀă lối 70% pơ’leăng mâ mơngế cho hdroâng kuăn ngo, tuăn ngôa rơkê ôh tá tơdâng tơ’mô, tơdroăng pơtâng tối châ mơnhên cho hnoăng cheăng ki xiâm, ƀeăn ƀĕng, tơtro nôkố. Pôa Nguyễn Công Hòa, Kăn hnê ngăn Viƀan cheăm Ia Chia tối ăm ‘nâi:

‘’Mâu khu pêi cheăng ai pơkâ pêi, ai tơdroăng pơkâ , ai xing xoăng hnoăng cheăng ăm rêm ngế. Mâu khu cheăng tơrŭm, ai khu Mô đô̆i gâk tơkăng kong, Kŏng an, Khu pơkuâ Mô đô̆i cheăm…hiăng hôp, xing xoăng hnoăng vâ tơniăn gâk kring hdrối, tung ƀă kơ’nâi tâ phĭu Kuô̆k hô̆i hneăng má XVI ƀă Hô̆i đong kuăn pơlê mâu râ hneăng hơnăm 2026 – 2031 châ lĕm tro ƀă tơniăn păng ‘nâng ‘na gâk kring tung cheăm tơkăng kong’’.

Drêng tơkăng kong tơniăn lĕm, kuăn pơlê vâ môi tuăn, rêm kơtâ phĭu tíu tơkăng kong thăm ai kơnâ. Rêm kơtâ phĭu tíu tơkăng kong ôh tá xê to tơdroăng rah xo kăn teăng mâ, mê ối cho tơdroăng ki mơnhên hnoăng pơkuâ, cho tơdroăng ki mơhno dêi khu tơrŭm môi tuăn tâi tâng hdroâng mơngế. Ing tơdroăng ki veăng tơdâng tơ’mô dêi khu cheăng kal kí rơtế hiêm mơno pôu râng hnoăng cheăng dêi rêm ngế kuăn pơlê tơkăng kong dế mơjiâng xiâm kối krá tơniăn vâ Hâi xah hêi ro tơnêi têa tơkŭm po tơniăn, kuăn pơlê pơkuâ dêi hnoăng cheăng, tro tiô luât./.