Ing môi to kong têa ki rôe ‘mot hên kế tơmeăm ing kong têa ê, Việt Nam hiăng pơhlêh chiâng môi tơnêi têa ki mơ’no tê kế tơmeăm hên ăm kong têa ê; hơnăm 2025 vêh mơnhên ngăn hơnăm má 10 mơ’no tê hên kế tơmeăm pơtối, riân sap ing hơnăm 2016. Mâu kong têa ki pin châ mơ’no tê dêi hên kế tơmeăm má môi mê kơxô̆ liăn pêi lo châ lối 1 rơal USD xuân tâk rế hên, ing 27 to kong têa a hơnăm 2013 nah mê hiăng tâk troh 36 to kong têa a hơnăm 2025 ki tơnêi têa pin châ tê dêi kế tơmeăm hên.

Hơnăm 2026, cho hơnăm ki kal kân, hơnăm apoăng pơkâ pêi pro tung mơnhông pêi cheăng kâ-rêh ối pơlê pơla tung plâ 5 hơnăm, sap ing hơnăm 2026 troh a hơnăm 2030; mâu tơdroăng cheăng ki pin mơ’no tê dêi kế tơmeăm  pơtối kal mơdêk hnoăng cheăng cho ki xiâm, ki păng ‘nâng, tơdrêng amê athế pơhlêh ó rơdêi ing tơdroăng ki pêi lo hên kế tơmeăm chiâng túa ki tê kế tơmeăm ki dâi lĕm, tơhluâ ƀă krá tơniăn ton, hnối tơdjêp ƀă hnoăng cheăngu ki châ tê kế tơmeăm ƀă yă to kơnâ khât, klêi mê, ai tá hnoăng cheăng kŏng ngê̆ ƀă ivá cheăng ing tơná pin pơkuâ xiâm dêi tơdroăng pêi cheăng kâ. Pôa Trần Thanh Hải-Phŏ Kăn hnê ngăn Khu xiâm mơ’no tê kế tơmeăm, Khu xiâm ngăn ‘na kơmăi kơmok ƀă tê mơdró tối tiah kố, pakĭng tơdroăng ki pêi pro châ tơƀrê mê kơchơ ki rôe kế tơmeăm tiô khôi hmâ hdrối mê hía nah, Việt Nam pơtối kal athế châ tơrŭm tê mơdró mơ’no dêi hên kế tơmeăm troh a hên mâu kong têa, kơdroh tơdroăng ki tơkôm tơngah to môi kong têa ki kro mơdrŏng kân.

“Kal athế tơrŭm ƀă hên mâu kong têa ki pin vâ châ tê mơ’no dêi kế tơmeăm, kố xuân cho môi troăng hơlâ ki vâ pin kơdroh tơdroăng ki trâm xía vâ ki tơkôm tơngah lối hên a tơrêm hngêi kơchơ dêi kong têa, ing mê, thăm nếo, mê cho mâu kong têa ki pin hmâ tê mơdró kân má môi hdrối mê hía nah. Drêng hiăng ai kong têa rôe mê pin athế pêi pro pơtối, mê cho hnoăng cheăng ki vâ mơdêk luâ tâ kơ mê. Pơhlêh nếo hnoăng cheăng ‘na mơdêk tê mơdró kâ, tung mê, ai tá hnoăng cheăng mơjiâng inâi kế tơmeăm ƀă xúa mâu túa cheăng ki tí tăng séa mơnhên ngăn tíu xiâm lơ ki xiâm dêi kế tơmeăm mê, kố xuân cho hnoăng cheăng ki gum ăm hnoăng cheăng tê mơdró kâ pin kô châ tơhluâ hên tâ nếo”.

Tung pơla cheăng kâ lâp plâi tơnêi ối trâm hên ki xahpá,. Ƀă tê mơdró tung lâp plâi tơnêi dế mot tung tơdroăng ki vâ pơhlêh nếo, tơdroăng tê mơ’no, rôe ‘mot kế tơmeăm hiăng râng vế dêi hnoăng cheăng ki kal ƀă tơdroăng thăm pêi lo kế tơmeăm, liăn ngân ing peăng Việt Nam, laga, tơdroăng pơkâ thế mê hiăng phá tâ hneăng hdrối mê hía nah. Pôa Cấn Văn Lực-Tiê̆n sih-Ngế ki hriăn cheăng ‘na Cheăng kâ khu ngăn ‘na Hngêi rak liăn BIDV, cheăng tung Hô̆i đong hnê ngăn troăng hơlâ dêi Ngế pro xiâm hnê ngăn Chin phh ai tối ăm ngin ‘nâi, thăm mơdêk mơ’no tê kế tơmeăm tung hneăng la ngiâ ôh tá xê tot pơtê to dâng tơdroăng khŏm pêi lo liăn ngân hên tâ, mê kal athế pơhlêh hên, nhên ki kơnía, ki dâi lĕm tung pêi lo hên liăn ngân, kế tơmeăm; pơkal athế ai hnoăng ki tơrŭm cheăng krá kâk tung tê mơdró kâ, ing mê, khŏm châ tê mơ’no hên kế tơmeăm, mơnhông cheăng pêi ing pơxiâm apoăng tá troh tŭm têk logistics, kơxô̆ liăn ki tŏng veăng ƀă ki rơhêng vâ tối, mê cho thăm mơdêk tơdroăng cheăng kâ ki tro tiô luât pơkâ ƀă tơkŭm tơdjâ pơkuâ ngăn tơtro tơdroăng.

“Pin athế thăm mơdêk hnoăng cheăng ing tơná, nôkố, athế kơdroh dêi tơdroăng cheăng ki krá tơniăn ton, tơkéa vâ tối cho ki kal, athế pêi pro ton. Pin athế xúa pêi pro mâu tơdroăng cheăng lĕm tro tâ mâu FTA, thăm mơdêk mơ’no tê dêi kế tơmeăm, mơnhông châ tơhluâ tơdroăng tê mơdró kâ tơmeăm, inâi ki kal xiâm dêi tơnêi têa ƀă hên mâu tơdroăng ki ê”.

Mot tung chal ki nếo, tơdroăng mơ’no tê kế tơmeăm cho ki xiâm ki kal thăm mơdêk tê mơdró dêi kế tơmeăm, laga, pơtối kal athế ai troăng ki vâ mơnhông, rơkê plĕng ƀă tơtro hnoăng cheăng ki pêi pro tung chal nếo. Tiô tơdroăng pơkâ kơxô̆ 01/NQ-CP a hâi lơ 8 khế 1 hơnăm 2026 dêi Chin phuh, ki xiâm dêi tơdroăng pêi lo liăn ngân, kế tơmeăm tung hơnăm 2026 châ dâng 15 troh16% tâng vâ pơchông ngăn ƀă hơnăm 2025, tơdâng ƀă kơxô̆ liăn pêi lo châ 546 troh a 550 rơtal USD. Vâ khoh kâi chiâng pêi pro troh a kơlo ki kố, mê kơxô̆ kế tơmeăm ki tê mơ’no ăm kong têa ê rêm khế kal athế châ sap ing 45 troh a 46 rơtal USD-môi kơlo ki châ ngăn cho pá puih păng ‘nâng, pơkal athế tâi tâng khu râ, kơvâ cheăng ki mot cheăng, pêi pro kơtăng ó khât dêi rêm khu râ, kơvâ cheăng, kong pơlê, pơlê kong kânk ƀă khu mơdró kâ ing mâu khế apoăng hơnăm. Tiô mâu ki hriăn plĕng tối ăm ‘nâi, vâ pêi pro troh tơdroăng ki thăm mơdêk nếo  pơkal thế ai tơdroăng ki pơhlêh ing tuăn tơmiât troh a mâu cheăng pêi. Drêng hiăng châ pêi pro, tê mơdró kâ ki dâi lĕm khât, tơ’lêi hlâu ƀă pêi cheăng kơxô̆ chal nếo, mê tơdroăng tê mơ’no kế tơmeăm dêi Việt Nam kô thăm rế châ hên ƀă krá tơniăn ton.