Mơ’nui chôu kơxê, drêng vâi krâ kuăn pơlê vêh ing chiâk deăng, mâu ngế cheăng tung khu pơkuâ ngăn ƀuôn Ea Bông, bêng Buôn Ma Thuột klâ pro tơrêm khu ki kŭn troh rêm hngêi hnê tối ‘na hâi tâ phĭu pôk kăn cho a hâi lơ 15/3 la ngiâ. Tơdroăng kal ôh ti xê tối ‘na hâi khế, tíu tâ phĭu mê ối tơpui tối leăng nhên hnoăng cheăng, tơdroăng cheăng dêi kuăn pơlê, tơdroăng pơkâ ai tŭm dêi ngế ki vâ pro kăn ƀă mâu tơdroăng ki kal dêi Luât Tâ phĭu. Jâ H’Chuyên Êñuôl, Ngế pơkuâ ƀuôn Ea Bông tối, túa pêi kố tơ’lêi tiô túa cheăng dêi kuăn pơlê tung pơlê.

“Xua vâi krâ kuăn pơlê ki hên pêi chiâk pêi deăng, mê pin hnê tối a kơxê, ai khu ki ‘nâ vâi lăm troh a 5 lơ 10 toăng hngêi vâ hnê tối”.

Ƀă tơdroăng ki hnê tối tơdrêng, tơdroăng ki hnê tối tơdroăng kal ối châ pêi pro tung mâu rôh hôp pơlê ƀă ing mâu tíu ki tối tơbleăng tơdjuôm dêi pơlê. Vâ rak vế tơniăn ăm rêm ngế pơrá ‘nâi nhên tơdroăng, túa ki hnê tối ăm kuăn pơlê xuân châ ‘mêng rơnêu ăm tơtro. Pôa Y Sil Êñuôl, ngế ki châ kuăn pơlê loi tung ƀuôn Ea Bông ăm ‘nâi, cheăng hnê tối châ hnê ƀă péa nâl Xuăn ƀă Rơđế vâ tơtro ăm rêm ngế.

“Hnê tối ăm vâi krâ kuăn pơlê ƀă nâl Xuăn ƀă nâl hdroâng kuăn ngo. Xua tối tơdjuôm ƀă nâl Xuăn tâi mê drêng ‘nâ vâi krâ pá ôh ti hlê, drêng tơpui ƀă nâl hdroâng kuăn ngo mê vâi krâ kuăn pơlê hlê ƀă xuân ‘nâi nhên hiâm mơno tơchĕng tơmiât, rơhêng vâ rah xo ngế ki tơxâng”.

Cho kuăn pơlê tiô khôp a bêng Ea Kao, jâ H’Pliêr Niê Kdăm tối, tối tơbleăng ‘na rôh tâ phĭu xuân châ tối tung mâu hngêi khôp ƀă trâm mâ kuăn pơlê a cheăm bêng.

“Xuân ai mâu rôh hnê tối, trâm mâ kuăn pơlê a mâu thôn, pơlê. Tung hngêi khôp mê ƀok xối, yao phu xuân vêh hnê tối ăm kuăn pơlê mê troh hâi mê ah athế lăm tâ phĭu tŭm tâi tâng”.

Ƀok xối Nguyễn Minh Hảo, Ƀok pơkuâ ngăn Hngêi khôp tơring Khôp Mẫu Tâm, Kong pơlê Khôp Ban Mê Thuột tối tiah kố, rêm ngế ki tiô khôp hlối cho môi ngế kuăn pơlê ƀă tơdroăng ki lăm tâ phĭu athế pêi pro tro hnoăng cheăng ƀă tơnêi têa.

“Mâu tơdroăng loi tĭng tiô khôp pơrá cho kuăn pơlê ƀă xua mê hiâm mơno kuăn pơlê phiu ro khât drêng ai môi rôh tâ phĭu nếo. Á hâk tơngăm veăng lăm tâ phĭu vâ mơhno tâi ivá dêi môi ngế kuăn pơlê tơná. Tơná kuăn pơlê mê athế tâi tá hiâm mơno, mê cho môi tơdroăng luât dêi Bôl Êklêdia”.

A mâu cheăm tơkăng kong, xua tơnêi tơníu kân rơdâ, kuăn pơlê ối tơprâ tơprŭng, cheăng hnê tối châ tơbleăng rơkê tâ. Tiô nâ Lang Thị Son, Kăn hnê ngăn Vi ƀan Măt trâ̆n Tơnêi têa Việt Nam cheăm Ia Lốp, kăn ƀô̆ Măt trâ̆n tơrŭm ƀă ngế pơkuâ thôn, ngế ki châ kuăn pơlê loi troh a kơpong kuăn pơlê ối, xing xoăng hlá mơ-éa, hnê vâi krâ kuăn pơlê séa ngăn inâi kuăn pơlê châ chêh tơdrăng.

“Cheăm Ia Lốp cho cheăm kân rơdâ, kuăn pơlê rế ối tơprâ tơprŭng mê ôh ti xê hnê tối a mâu rôh hôp lơ hnê tối tung loa dêi cheăm, mê ối xoăng hlá mơ-éa ăm rêm rơpŏng hngêi kuăn pơlê. Troh nôkố kuăn pơlê hiăng ‘nâi nhên tơdroăng ‘na tâ phĭu hiăng vâ troh la ngiâ”.

Hâi lơ 15/3 la ngiâ, kuăn pơlê tung lâp tơnêi têa kô lăm tâ phĭu pôk kăn Kuô̆k hô̆i hneăng XVI ƀă kăn teăng mâ Hô̆i đong hnê ngăn rêm râ, hơnăm 2026-2031. Tơdroăng ki hnê tối rôh tâ phĭu pôk kăn Kuô̆k hô̆i hneăng XVI ƀă kăn teăng mâ Hô̆i đong hnê ngăn kuăn pơlê rêm râ, pơla hơnăm 2026 – 2031. Tơdroăng ki hnê tối tơdroăng kal troh rêm pơlê cheăm, tíu tiô khôp a Dak Lak veăng gum mơdêk rak vế rêm ngế kuăn pơlê châ ‘nâi tŭm tơdroăng pơkâ dêi luât ‘na rôh tâ phĭu. Ing mê, pêi pro tŭm hnoăng ƀă tơdroăng cheăng dêi kuăn pơlê tung rôh po tơdroăng kân krip dêi tơnêi têa.