A rôh tơdah, pôa Phạm Minh Chính, Ngế pro xiâm hnê ngăn tơnêi têa tối kal vâ ‘nâi plĕng khât ƀă tối tơdroăng ki ôh tá tơniăn a kơpong Kung King kố; rơhêng vâ rơtế ƀă Qatar veăng tí tăng troăng hơlâ hơniâp lĕm, tơniăn ăm kơpong Trung Đông. Ngế pro xiâm hnê ngăn tơnêi têa ăm ‘nâi hiăng ai rôh tơpui phôn ƀă Ngế pro xiâm hnê ngăn, Ngế xiâm tơpui kâ Qatar, Việt Nam tối ƀă mâu kong têa kơpong Kung King, tơdrêng amê hlối Pơkâ dêi Khu lâp kong têa pơkâ thế pơtê rôh plâ ƀâ a mâu kong têa; pơkâ thế ôi tá lăm plâ a mâu tíu kuăn pơlê ối.

Ngế pro xiâm hnê ngăn tơnêi têa tối Việt Nam cho tơnêi têa ki tro tơdroăng tơplâ ton xŏn, tro mơdât, xua mê hlê plĕng nhên ki kơnía ki hơniâp lĕm; rơhêng vâ rêm pâ tăng hlo troăng hơlâ hơniâp lĕm, pơtê rôh tơplâ. Pôa Phạm Minh Chính, Ngế pro xiâm hnê ngăn tơnêi têa rơhêng vâ  rĕng pơtê tơplâ vâ mâu hngêi kơmăi a Qatar rĕng ‘mâi mơnhông mơjiâng pro, tê mơdró têa châu têa kơxăng.

Tối nhên kal tăng troăng hơlâ ‘mâi rơnêu tơdroăng kố, Ngế pro xiâm hnê ngăn tơnêi têa rơhêng vâ Qatar ƀă ki rơkê, ivá pêi cheăng dêi tơná, tŏng gum, ‘no liăn a Việt Nam pro mâu hnôu ‘măn têa châu têa kơxăng gum ăm hngêi kơmăi nhiê̆t điê̆n têa châu têa kơxăng xuân môi tiah tê têa châu têa kơxăng ăm kơpong.