Pôa Phạm Minh Chính, Ngế pro xiâm hnê ngăn tơnêi têa kheăn kơdeăn mâu khu xiâm, kơvâ cheăng, kơ koan ki tơdjâk hiăng teăm pêi pro tơdrêng mâu hnê mơhno dêi Ngế pro xiâm hnê ngăn Chin phuh ƀă tơkŭm po pêi pro tơdroăng tơniăn ai têa châu têa kơxăng vâ tê, tơniăn yă têa châu têa kơxăng tung pơla ai tơdroăng tơplâ Trung Đông kơtăng râ ó.

Tối rơdêi ôh tá lôi ăm ai tơdroăng ôh tá tŭm têa châu têa kơxăng, Ngế pro xiâm hnê ngăn tơnêi têa pơkâ pơkuâ yă têa châu têa kơxăng tiô kơchơ ƀă Tơnêi têa; pêi pro mâu troăng tơniăn yă tơtro má môi, châ tơƀrê; tơniăn ƀă tơtro pơxúa Tơnêi têa, kuăn pơlê ƀă khu tê mơdró; mơdât tơdroăng kơtôa têa châu têa kơxăng, mơdêk yă ƀă pro pơxúa troăng hơlâ vâ pơxúa ăm dêi tơná, pro ôh tá tơniăn kơchơ mơdró.

Ngế pro xiâm hnê ngăn tơnêi têa hnê mơhno mâu khu xiâm kơvâ cheăng, kơ koan ki tơdjâk, tung mê, ai Khu xiâm pơkuâ Kŏng an mot séa ngăn, mơnhên ngăn ƀă pơxâu phâk mâu tơdroăng ki xôi tâng ai.

Ngế pro xiâm hnê ngăn tơnêi têa pơkâ séa ngăn ƀă kơdroh mâu tơdroăng xo hnoăng mơhá, kơxô̆ liăn ki tơdjâk troh têa châu têa kơxăng vâ tŏng gum khu tê mơdró ƀă kuăn pơlê tung pơla nôkố, tơbleăng hdrối hâi lơ 20/3. Tung tơdroăng ki kal, tâng tơdroăng tơplâ a Trung Đông ton, kal séa ngăn, tơkŭm tâi tâng tơbleăng ai hnoăng séa ngăn xing xoăng kơxô̆ liăn vâ tŏng gum tơniăn yă têa châu têa kơxăng.