Hâi lơ 16/3, a Hà Nội, pôa Lê Hoài Trung, Kăn cheăng tung Khu xiâm kal kí, Ngế xiâm tơpui kâ, pôa Phan Văn Giang, Ngế xiâm pơkuâ mô đô̆i ƀă pôa Lương Tam Quang, Ngế xiâm pơkuâ Kŏng an hiăng rơtế ƀă pôa Vương Nghị, Ngế xiâm tơpui kâ kong têa Sinuâ, pôa Đổng Quân, Ngế xiâm tơpui kâ kong têa Sinuâ ƀă pôa Vương Tiểu Hồng, Ngế xiâm pơkuâ Kŏng an kong têa Sinuâ rơtế pơkuâ Hneăng hôp roh má môi Tơpui tơno troăng pêi cheăng ton xŏn 3 tơ’nôm 3 râ Ngế xiâm tơpui kâ, Gâk kring tơnêi têa ƀă Kŏng an Việt Nam – Sinuâ.

A roh hôp, péa pâ môi tuăn mơnhên troăng mơnhông mơdêk tiô troăng ‘’6 hôm tâ’’ dêi tơrŭm cheăng Việt Nam – Sinuâ tung pơla kố nah. Tối ‘na tơdroăng rĕng, ai hên tơdroăng pá dêi tơdroăng lâp plâi tơnêi, kơpong tung pơla kố nah, péa pâ môi tuăn tơdroăng péa tơnêi têa thăm tơrŭm môi tuăn, tơrŭm cheăng, pro krá tơniăn tơdroăng loi tơngah kal kí, pêi pro tâi tâng pơla mơnhông mơdêk ƀă gâk kring, mơ-eăm prôk tiô troăng xah hô̆i chuh ngiah, tơdjuôm ivá rơtế mâu kong têa lâp plâi tơnêi hbrâ ví mâu pơloăng mơnúa tơdjuôm ‘na gâk kring ƀă mơnhong mơdêk tiô tơdroăng ki tơtro ƀă luât lâp plâi tơnêi ƀă Luât Khu lâp kong têa rế hía rế thăm thâ.

Pái Ngế xiâm peăng kong têa Sinuâ mơnhên Sinuâ nhuô̆m ƀă hbrâ rơtế Việt Nam pêi pro tơdroăng hlê plĕng tơdjuôm râ kân, hriâm a dêi pó, tối ăm dêi pó túa ki rơkê tơtro ‘na mơjiâng Đảng, pơkuâ tơnêi têa, gâk kring krá tơniăn ki pơxúa gâk kring ƀă mơnhông mơdêk dêi rêm tơnêi têa.