Tiah mê, pơkâ thế Hải Phòng ‘mâi mơnhông túa ki thăm mơnhông tơtêk ngăn tung tơdroăng ki rơkê plĕng, khoa hok kong ngê̆ ƀă pơhlêh nếo tơmiât pêi rơkê. Tối nhên túa tơmiât, Pơkâ Hneăng hôp XIV dêi Đảng, mâu Pơkâ pêi tung la ngiâ dêi Khu xiâm cheăng kal kí ƀă pơkâ pêi thăm mơnhông péa kơxô̆ kal châ pêi pro pơhlêh chiâng tơdroăng pêi pro rơkê, tro tơdâng tơ’mô ƀă vê séa ngăn nhên tơƀrê, Kăn xiâm pơkuâ hnê ngăn cheăng Đảng pơkâ thế tơdroăng pêi pro dêi Hải Phòng kal châ pêi pro pơhlêh tâ nếo, tá mâu hâi khế, tá tơdroăng ki rak vế tơniăn nhên mơngế, nhên tơdroăng cheăng, nhên hâi khế, nhên hnoăng pơkuâ, nhên hnoăng cheăng pôu râng, nhên tơmeăm pêi, tro ƀă troăng hơlâ séa ngăn ƀă mơnhên tối rêm khế vâ teăm ‘mêng rơnêu drêng kal.

Pôa Tô Lâm, Kăn xiâm pơkuâ hnê ngăn cheăng Đảng tối nhên, Hải Phòng athế pro mơnhông tơƀrê tung mơjiâng pro kơmăi kơmok chal nếo, tơdroăng ki kal cho kơmăi kơmok tiô rơxông nếo, uâ pơliê tơmeăm ƀă kơmăi kơmok xúa ki ai kơnía ki ê, mơjiâng túa cheăng kơmăi kơmok rơkê plĕng, ing tơdroăng ki rah xo ki rơkê plĕng dêi khu ki ‘no liăn pêi cheăng, kong ngê̆ ƀă túa ki xúa tung la ngiâ.