Kăn xiâm hnê ngăn Kuô̆k hô̆i tối ăm ‘nâi, hneăng tâ phĭu rah xo kăn Kuô̆k hô̆i hneăng 16 ƀă Kăn Hô̆i đong hnê ngăn kuăn pơlê rêm râ hneăng 2026-2031 hiăng klêi tơniăn ƀă hên kơxô̆ kuăn pơlê lăm tâ phĭu tung lâp tơnêi têa, dâng 99,69%; ôh tá êa tơkŭm tâ phĭu nếo a tíu ki lâi tâ phĭu tung lâp tơnêi têa.

Nôkố, mâu kong pơlê dế pơtối tơkŭm, tăng ngăn nhên vâ tơbleăng ăm Hô̆i đong tâ Phĭu tơnêi têa. Tiô tối hdrối hâi lơ 22/3, Hô̆i đong tâ phĭu Tơnêi têa kô tơbleăng kơxô̆ phĭu, Vi ƀan pêi cheăng dêi mâu kăn kô mơnhên.

‘Na tơdroăng tơkêa bro troăng hơlâ mơjiâng luât hneăng Kuô̆k hô̆i 16 pơtroh ăm Khu xiâm kal kí, tiô Kăn xiâm hnê ngăn Kuô̆k hô̆i, tơdroăng chêh tung tơdroăng tơkêa pro hiăng pêi tro tơdrăng, troăng hơlâ ki kal tung tơdroăng cheăng dêi hneăng hôp mâu kăn tung lâp tơnêi têa rôh má 14 dêi Đảng, hlối pêi pro tơdroăng kal, troăng hơlâ  ƀă tơdroăng kal dêi Khu xiâm Kal kí tơdjâk troh pê klêi luât ƀă mơnhông tơnêi têa tung pơla mâu hơnăm nếo. 

Kăn xiâm hnê ngăn Kuô̆k hô̆i pơkâ thế, Kuô̆k hô̆i kal séa ngăn mơhno tíu ki vâ tối tung tơdroăng pêi pro cho ‘nâi nhên tơdroăng cheăng pê klêi luât, luât cho tơdroăng ki tơƀrê vâ mơnhông tơnêi têa; hlê nhên luât thế chiâng tơdroăng pêi pro vâ tơƀrê.