Tơdroăng tơkêa bro troăng kân ăm phêp rơxế kơtâu têi Quy Nhơn – Pleiku, ai tâi tâng ki xŏn dâng 125 km, prôk tơkâ hluâ 16 cheăm, bêng; châ pro 4 hơlâ troăng, kơtâi têi 100km/chôu, ƀă tâi tâng kơlo liăn mơ’no vâ chê 44.000 rơtal liăn. Kố cho troăng kân châ khu râ kăn pơkuâ ƀă kuăn pơlê kong pơlê Gia Lai pói tơngah kô mơjiâng ivá ăm tơdroăng pro tơniăn tơdjêp troăng klông, mơdêk tê mơdró ƀă mơnhông cheăng kâ – rêh ối pơlê pơla a pơlê.

Kơnôm ki kơnâ mê, tơdroăng pêi pro tơdroăng tơkêa bro châ tơdroăng môi tuăn dêi kuăn pơlê tung kơpong ki tơdjâk. Hên rơpŏng kuăn pơlê ai tơnêi ối tung khu ki xo tơvêh hiăng hbrâ tơrŭm, rĕng pơcháu ăm ƀăng tơnêi vâ troăng kân châ mơjiâng pro tơ’lêi hlâu. Khu râ kăn pơkuâ mâu cheăm, bêng tíu ai mâu tơdroăng tơkêa troăng kân ăm phêp rơxế kơtâu têi Quy Nhơn – Pleiku, prôk tơkâ hluâ xuân dế mơ-eăm pêi pro tăng tơ’nêi vâ rĕng pơcháu ăm mâu khu ki mơjiâng pro.

Vâ pêi pro tơdroăng tơkêa bro troăng kân ăm phêp rơxế kơtâu têi Quy Nhơn – Pleiku kal xo tơnêi lối 942 hectar, ƀă kơxô̆ liăn chêl thiê̆n, tŏng gum tiô tối hdrối lối 4.700 rơtal liăn.