Khu râ kăn pêi cheăng dêi Kuân khu 5 hiăng séa ngăn a mâu tơmeăm ki pro, mê cho: đông lêng Khu pơkuâ cheăng lêng hbrâ mơdât kơpong 4 – Đô Vinh, Trung đoân 896, Đăi đô̆i Trinh sát cơ giới ƀă tíu ki pơtâp lêng Khánh Vĩnh ối tung Khu xiâm pơkuâ lêng kong pơlê Khánh Hòa.

Klêi kơ’nâi tơmâng mâu tíu pêi cheăng ƀă khu ki châ rah xo mơjiâng pro tơmeăm tơbleăng tơdroăng mơjiâng pro, mâu tơdroăng tơ'lêi hlâu, pá puât tung tơdroăng pêi pro, Trung tươ̆ng Lê Ngọc Hải, Kăn pơkuâ Kuân khu 5 pơkâ mâu tíu pêi cheăng mơjiâng pro tơkŭm mơngế pêi cheăng vâ pro, mơdêk tơdroăng pro vâ rĕng kêi đeăng, pơcháu tơmeăm tiô pơkâ; tơdrêng amê, tơtrŏng ki dâi lĕm, ki mơnâ mâ ngăn, tơniăn chính quy, môi tuăn ‘na mâu tơdroăng ki ai tơdjâk dêi a đông.

Khu xiâm pơkuâ Mô đô̆i kong pơlê Khánh Hòa đi đo séa ngăn tơdroăng mơjiâng pro rêm hâi, teăm tơdrêng tơkŭm tâi tâng, tơbleăng a Kuân khu 5 vâ tơniăn mâu tơdroăng tơkêa bro kêi đeăng tro tơdroăng ki vâ châ, tơdroăng hiăng pơkâ.