Tiô tơbleăng, roh tâ phĭu tơkŭm po mê kuăn pơlê châ pêi dêi hnoăng cheăng tơná, tro luât, tơniăn lĕm ƀă păng ‘nâng cho hâi tơkŭm tơdroăng phiu ro dêi tâi tâng kuăn pơlê. Lâp kong pơlê ai 2.120 kơpong tâ phĭu ƀă 2.118 tôh tâ phĭu; tung mê, ai 11 kơpong tâ phĭu ahdrối tâ, sap ing hâi lơ 14/3. Kơxô̆ mơngế tâ phĭu a Dak Lak lăm tâ phĭu châ 99,96%.

Tơdroăng ki châ tơƀrê apoăng ăm hlo, kong pơlê Dak Lak hiăng rah xo tŭm 15 ngế kăn teăng mâ Kuô̆k hô̆i hneăng má XVI tiô kơxô̆ châ xing xoăng. Ƀă Hô̆i đong hnê ngăn kuăn dêi râ kong pơlê hneăng hơnăm 2026 – 2031, ai 84 kăn teăng mâ châ rah xo, tơniăn tro tơdroăng vâ rah xo tiô pơkâ. A râ cheăm, lâp kong pơlê ai 2.443 ngế châ rah xo pro kăn teăng mâ Hô̆i đong hnê ngăn kuăn pơlê (tá hâi tŭm 1 ngế tâng pơchông ƀă tơdroăng vâ rah xo).

A roh hôp, Vi ƀan Tâ phĭu kong pơlê Dak Lak xuân tơbleăng inâi mâu ngế ki châ rah xo pro kăn teăng mâ Hô̆i đong hnê ngăn kuăn pơlê kong pơlê hhneăng hơnăm 2026 – 2031 tiô rêm tíu tâ phĭu. Tơdroăng tơbleăng tơdroăng châ tơƀrê châ pêi pro tơbleăng, tơdrăng lĕm tro tiô pơkâ dêi luât ‘na tâ phĭu rah xo.

Klêi kơ’nâi tơbleăng tơdroăng châ tơƀrê hneăng tâ phĭu, Vi ƀan tâ phĭu kong pơlê Dak Lak kô pêi kêi đeăng mâu hô sơ, ‘noăng chư chêh vâ pơtroh mâu kơ koan Tơnêi têa tiô tro hnoăng pơcháu.