Tơpui tơno achê ƀă kơdrâm mâu ngế kăn ƀô̆, giảng viên, sinh viên, mâu lêng tung Hok viê̆n, pôa Tô Lâm, Kăn xiâm pơkuâ hnê ngăn Đảng kheăn kơdeăn mâu tơdroăng châ tơƀrê dêi Hok viê̆n Kih thuât cheăng lêng tung vâ chê 60 hơnăm hdrối mê hía nah; ki má môi cho hiăng hnê mơjiâng ăm Khu lêng ƀă tơnêi têa mơngế pêi cheăng rơkê ối tung hên kơvâ cheăng, ƀă lối 200 ngế tiê̆n sih, 1.500 thak sih, 3.000 kih sư cheăng lêng ƀă cheăng xivil. Dế kố hngêi trung dế pơtối hnê mơjiâng lối 6.000 ngế mơhriâm, sinh viên.

Klêi kơ’nâi mơnhên tơdroăng tung tơnêi têa ƀă lâp plâi tơnêi, Kăn xiâm pơkuâ hnê ngăn Đảng tối nhên, Tơdroăng pơkâ Hneăng hôp má XIV dêi Đảng ăm hlo: Mơjiâng Khu lêng kuăn pơlê kăch măng, rơkê păng ‘nâng, ƀeăn ƀĕng, rơxông nếo tung hneăng cheăng 2025 – 2030, xua mê ƀă hnoăng hnê mơjiâng mơngế pêi cheăng ki rơkê, Hok viê̆n kal tơkŭm pêi pro 5 troăng prôk la ngiâ ki kal tơxâng pơkâ hnoăng cheăng tung rơxông nếo.

Tung mê, kal athế pơhlêh nếo ó rơdêi hnoăng cheăng xiâm, tơdroăng hnê mơjiâng tiô troăng rơxông nếo, păng ‘nâng ƀă tơrŭm, tơdjêp krá tơniăn ƀă tơdroăng nôkố, mơdêk mot tơrŭm lâp plâi tơnêi. Kăn xiâm pơkuâ hnê ngăn Đảng pơkâ thế, Hok viê̆n mơdêk pơhlêh xúa kŏng ngê̆; mơjiâng hngêi trung đăi hok hriăn plĕng tơdroăng ki xiâm tơnêi têa, ai hnoăng chông djâ tung mâu kơvâ hriăn plĕng khoa hok kih thuât cheăng lêng, cho tíu xiâm pơhlêh nếo tơmiât pêi rơkê má môi dêi tơnêi têa.