A kơpong kong ngo peăng mâ hâi Lâ kong pơlê Gia Lai, tíu ki ai hên kơdrâm kuăn pơlê hdroâng kuăn ngo rêh ối, mâu tơdroăng mơnhông cheăng kâ, mơdêk tơdroăng rêh kâ ối ƀă mơjiâng pro hngêi trăng troăng klông châ kuăn pơlê kal vâ ‘nâi plĕng khât. Tung mâu rôh trâm mâ kuăn pơlê ki vâ to pro kăn Kuô̆k hô̆i, hên rơkong tơpui tối pâ thế pơtối kơjo gum ‘no liăn pro tơmeăm khoăng ăm kơpong hngế hngo vâ pro kơdroh kơtăn mơnhông. Nâ Plai, a pơlê Tơ Bla, cheăm Kon Chiêng tối tiah kố, rơtế ƀă tơdroăng ki ‘no liăn pro troăng klông, kal ai troăng hơlâ tŏng gum mơjiâng pro, tăng cheăng pêi krá tơniăn vâ kuăn pơlê pơhlêh tơdroăng rêh kâ ối.

"Klêi kơ’nâi hmâng tơdroăng tơpui tối dêi mâu ngế ki tơbriât to pro kăn mê á hlo mâu tơdroăng gá hiăng tro ƀă tơdroăng ki ai khât, tro achê ƀă vâi krâ nhŏng o môi tiah mâu tơdroăng ‘na on tơhrik, troăng prôk, hngêi trung hriâm, hngêi pơkeăng pơlât. Tâng châ kuăn pơlê pôk xo dêi tơná mê rơhêng vâ pó tơmâng ngăn tâ nếo troh cheăm Kon Chiêng ƀă mâu cheăm kơpong hngế hngo ki ê”.

Kuăn pơlê kơpong hngế hngo kong pơlê Gia Lai xuân tơngah a mâu kăn klêi kơ’nâi châ pôk kô pơtối tơmâng ngăn lêi tah mâu tơdroăng ki xơpá tung mơnhông cheăng kâ rêh ối pơlê pơla, malối cho tŏng gum vâi krâ kuăn pơlê pơhlêh túa pêi pêt tơmeăm khoăng, mơnhông ăm kế tơmeăm pêt plâi kơtóu hên ƀă tăng cheăng pêi ăm droh rơtăm kơpong kuăn pơlê hdroâng kuăn ngo. Kuăn pơlê Hlây, a pơlê Đak Yă, cheăm ‘Mang Yang pâ thế:

“Mâu ngế ki tơbriât vâ to pro kăn Kuô̆k hô̆i tâng châ kuăn pơlê pôk mê pơtối tơmâng ngăn chêh pro hên túa pơkâ pêi mơnhông cheăng kâ, mê nếo mơjiâng pro mâu tơdroăng tơrŭm pro kơnía, pro tơ’lêi hlâu ăm vâi krâ nhŏng o mơnhông cheăng kâ ƀă túa ki hnê hriâm ăm khoa hok kih thuât vâ thăm mơnhông ki lĕm plâi kơtóu hên mâu kế tơmeăm pêt, mơnhông cheăng kâ”.

A kơpong peăng mâ hâi Lo kong pơlê Gia Lai, kuăn pơlê tơmâng ngăn khât troh tơdroăng ki mơ’no têa ƀă ivá mơnhông dêi kong pơlê tung hneăng la ngiâ. A cheăm Tuy Phước, kuăn pơlê Man Đức Thuận, ăm ‘nâi, cheăm kố châ ngăn cho kơpong tíu ki têa tơkŭm dêi rôh kong mê khía mơhot dêi Gia Lai. Klêi kơ’nâi rôh kong mê têa kân lân lu a mơ’nui hơnăm nah, tơdroăng rêh kâ ối kuăn pơlê hoăng rế hía rế tơniăn, la mơni kô ối lân trâu rêm rơnó kong mê. Kuăn pơlê Man Đức Thuận pâ thế:

“Cheăm Tuy Phước ối a má mơ’nui têa kroăng Kôn ƀă kroăng Hà Thanh, rêm hơnăm mê tro têa kân lân lu trâu. Hneăng pêi cheăng nếo kố, á rơhêng vâ ngế ki lâi châ kuăn pơlê pôk mê pâ thế ƀă Kuô̆k hô̆i xoăng liăn vâ pro ‘noăng tíu kơdoăng mơ’no, vâ pôi tá pro tro lŭp tơmeăm khoăng xua kong mê têa kân lân lu ăm vâi krâ nhŏng o”.

Xuân cho vâ mơnhông cheăng kâ kơpong kĭng têa kơxĭ, kuăn pơlê Nguyễn Thanh Phương, kơpong kơphô̆ 5, bêng Quy Nhơn Bắc, tối tiah kố, kong pơlê kal ai ivá thăm mơnhông cho mâu kơvâ cheăng kâ rơkê plĕng nôkố ƀă mơnhông cheăng kâ têa kơxĭ tiô troăng trâu hngế, krá tơniăn.

“Á tơmiât tiah kố ôh gti xê mơnhông ‘na tíu xiâm pêi cheăng ƀă tuăn ngoâ rơkê xúa kuăn pơlê mơjiâng pro mê akố kal mơnhông ‘na kơmăi kơmok bán dẫn, chip vâ pro tiah lâi ăm mơnhông rơdêi tâ. Má péa cho mơnhông cheăng kâ têa kơxĭ cho môi tung mâu ki rơdêi dêi Gia Lai mê xuân kal mơnhông tiô túa ki tŭm têk ôh ti xê tơnăng ká xi xŏng, păn roăng, pêi pêt tơmeăm mê ối mơnhông ‘na mâu kơvâ cheăng ki ai tơdjâk troh a têa kơxĭ”.

Tung hneăng tâ phĭu rôh kố, kong pơlê Gia Lai ai 28 ngế tobriât to pro kăn vâ pôk xo 16 ngế kăn cheăng tung Kuô̆k hô̆i hneăng XVI. Ing mâu rôh trâm mâ kuăn pơlê hdrối hâi tâ phĭu, hên kuăn pơlê tối, loi tung tơdroăng pêi pro dêi mâu ngế ki tơbriât to pro kăn. Pôa Siu Trung, Phŏ Kăn hnê ngăn Vi ƀan Măt trâ̆n Tơnêi têa Việt Nam kong pơlê Gia Lai ăm ‘nâi, kuăn pơlê pơkâ hên tơdroăng tơngah, rơhêng vâ mâu kăn Kuô̆k hô̆i hneăng XVI klêi kơ’nâi châ kuăn pơlê pôk kô veăng gum mơnhông cheăng kâ rêh ối pơlê pơla ƀă mơdêk tơdroăng rêh kâ ối ăm kuăn pơlê.

“Klêi kơ’nâi mâu rôh trâm mâ kuăn pơlê, ki hên kuăn pơlê vâi môi tuăn khât xuân môi tiah loi khât tung mâu tơdroăng tơhrâ mê ƀă rơhêng vâ ngế tơbriât to pro kăn klêi kơ’nâi châ kuăn pơlê pôk pro kăn Kuô̆k hô̆i kô pêi pro tơdroăng tơná tơhrâ, achê tŏng gum kuăn pơlê, tơmâng kuăn pơlê xuân môi tiah pơkâ pêi châ tơƀrê ƀă Kuô̆k hô̆i, Chin phuh vâ tŏng gum mâu tơdroăng ki kuăn pơlê púi rơhêng vâ”.

Hâi lơ 15/3, rơtế ƀă kuăn pơlê tung lâp tơnêi têa, kuăn pơlê kong pơlê Gia Lai hiăng veăng tung hâi leh kân dêi tâi tâng kuăn pơlê lăm tâ phĭu, rak xo ngế kăn ki ai tŭm kuăn ngo rơkê, hiâm mơno lĕm ƀă pôu râng dêi hnoăng, teăng mâ ăm rơkong tơpui tối, hiâm mơno tơchĕng tơmiât ƀă tơdroăng púi rơhêng vâ dêi Kuăn pơlê a tíu cheăng Kuô̆k hô̆i. Kố xuân cho rôh vâ kuăn pơlê mơhno hnoăng ƀă tơdroăng cheăng dêi kuăn pơlê, veăng gum mơjiâng kơ koan cheăng tơnêi têa kuăn pơlê pôk rế hía rế krá rơdêi, pêi châ tơdroăng kuăn pơlê vâ mơnhông dêi tơnêi têa ƀă dêi kong pơlê tung hneăng nếo.