Tung Măng tĭng pơxiâm po Hơnăm ôm hyô Tơnêi têa 2026 tơkŭm po mơ’nui khế 3 pơla kố nah, Gia Lai koh tơdah chât rơpâu tơmối tung tơnêi têa ƀă kong têa ê troh lăm ngăn ƀă châ hlo châ tâ. Tíu trâm mâ tơpui tơno ƀă leh sôk ro pêng păm mơngiơk ƀă tơdroăng ki hên hĭn: ing Hôp tơpui tơno Mơnhông cheăng kâ Ôm hyô Gia Lai hơnăm 2026, hôp mơhnhôk mơ’no liăn cheăng, mâu tơdroăng trâm mâ lâp plâi tơnêi, troh mâu tơdroăng ngê̆ thuât ƀă po nhak tơkŭm xah hêi ro kơdrâm phiu ro.

Mâu tơdroăng châ hlo châ tâ kố lôi ăm hên tơdroăng ki lĕm ƀă tơmối, gum djâ Gia Lai chiâng mâu tíu troh ki má môi dêi Hơnăm Ôm hyô Tơnêi têa. Mâu hơnăm ối nếo veăng gum djâ Gia Lai chiâng tíu troh ki má môi dêi Hơnăm Ôm hyô Tơnêi têa. Ngế droh Lê Thanh Phương Hạ, tơmối troh ing pơlê kong kơdrâm Nha Trang, kong pơlê Khánh Hòa, tối:

‘’Á ối a Nha Trang troh, cho roh apoăng hlo kơpong peăng Tơdế tơnêi têa pin sap ing hdrối nah troh nôkố ai môi concert kân môi tiah kố, xua mê á kô thế prôk. Á prôk to rơxế honđa ing Nha Trang troh a kố lối 4 chôu tơdế, laga hâk vâ ‘nâng ƀă sôk ro drêng troh Gia Lai.’’

Tung tơdroăng prôk ti tăng plĕng Việt Nam, pôa Roman, tơmối troh ing Rusi, mê kơdrâ ai mot tung tơdroăng kơdrâm phiu ro dêi Măng tĭng leh pơxiâm po Hơnăm ôm hyô Tơnêi têa 2026 a Gia Lai. Tung tíu têa kơxĭ – kơpong kân rơdâ pêng păm khôi túa lĕm tro pơlê, pôa Roman tối ăm ‘nâi, roh lăm kố hiăng lôi ăm tung pôa rơtế khu tơmối Rusi mâu tơdroăng ki tơbâ vế ki lĕm tung ngôa krê: “Á hiăng troh hên tíu dêi Việt Nam môi tiah Đà Nẵng, Nha Trang, laga a mê cho kơdrâm phiu ro. Roh kố troh Gia Lai, á tâ tíu kố cho lĕm, tơniăn lĕm ƀă ối ai ki ối tiah ton. Ki rơhêng vâ tối, troh drêng roh Hơnăm Ôm hyô tơnêi têa pro roh prôk lăm thăm kơnâ tâ’’.

Pơtối tơdroăng ki pơhlêh ing pơxiâm po, tung pơla khế 4 troh khế 6 hơnăm 2026, kong pơlê Gia Lai pơtối mơdêk mơhnhôk tơbleăng a mâu roh kơchơ kân a Hà Nội ƀă Pơlê kong kân Hồ Chí Minh. Tơdrêng amê, Gia Lai xuân kô tơkŭm po hên tơdroăng ki kal troh tơdroăng ki rơdêi ăm Hơnăm ôm hyô tơnêi têa 2026, tơtrŏng má môi kô ai Roh po nhak kân hâi tơkŭm xah hêi ro lâp plâi tơnêi (K-Pop), mơjiâng tíu ki rơdêi nếo, tiô rơxông nếo ăm kơtâ um ôm hyô.

Rơtế amê, Festival lâp plâi tơnêi chêng koăng Tây Nguyên kô cho tơdroăng kal ki má môi, djâ pêng păm khôi túa lĕm tro kân rơdâ. Pôa Nguyễn Văn Hùng, Ngế xiâm Khu xiâm khôi túa lĕm tro, Tơ’noăng ivá ƀă Ôm hyô mơnhên tơdroăng po ƀă pói tơngah mơnhông Hơnăm Ôm hyô Tơnêi têa kô mơjiâng tơdroăng ki mơnhông ăm Ôm hyô kong pơlê Gia Lai.

‘’Ƀă 244 tơdroăng châ tơkŭm po đi đo plâ hơnăm 2026. Vâ Hơnăm Ôm hyô tơnêi têa kô chiâng môi tơdroăng ki mơhnhôk mơdêk tơbleăng ‘na môi um méa Gia Lai nếo, ƀeăn ƀĕng, lĕm, pêng păm khôi túa lĕm, thăm tơdjêp kơpong ki kơnâ, mơhnhôk mơ’no liăn cheăng ton xŏn a hơnăm ôm hyô, mơjiâng mâu tơmeăm ôm hyô ki phá tơ-ê, dâi lĕm ƀă ai ivá tơbriât lâp plâi tơnêi’’.

Kong pơlê Gia Lai châ pơkâ tơdah dâng 15 rơtuh roh tơmối, ƀă pêi lo liăn ôm hyô dâng 35.000 rơtal liăn tung Hơnăm ôm hyô tơnêi têa 2026. Kố xuân cho roh tơ’lêi vâ Gia Lai vêh mơnhên tíu um ôm hyô, mơdêk tơdjêp kơpong ƀă mơnhông tiô troăng krá tơniăn. Pôa Phạm Anh Tuấn, Kăn hnê ngăn Vi ƀan kong pơlê Gia Lai mơnhên tơdroăng khŏm mơ-eăm dêi kong pơlê:

“Kong pơlê Gia Lai tơkêa kô tơkŭm po châ tơƀrê Hơnăm Ôm hyô Tơnêi têa ƀă 2026 ƀă ‘na tuăn ihiâm mơno rơkê, tơniăn, lĕm, pêng păm khôi túa lĕm vâ rêm tơmối ôm hyô troh pơrá tâ tơdroăng ki tá ihiâm mơno, phá ƀă tơxâng pâ. Ngin loi tơngah khât ing tơdroăng kal hâi kố, kong pơlê Gia Lai nếo kô mơ-eăm chiâng tíu troh ki lĕm, tíu tơkŭm, tơdjêp, troh lâp lu ki kơnâ khôi túa lĕm tro ƀă ôm hyô ki má môi dêi Việt Nam ƀă tung kơpong.’’

Hơnăm Ôm hyô Tơnêi têa 2026 a kong pơlê Gia Lai tâi tâng tơdroăng po kơdrâm phiu ro ton plâ hơnăm. Ing mâu tơdroăng khôi túa lĕm tro pêng păm khôi túa lĕm kơpong kân rơdâ troh mâu tơdroăng ki kal idrâp tơdrá, ôm hyô tiô rơxông nếo râ lâp plâi tơnêi, kong pơlê dế chôa ‘lâng mơjiâng um méa môi tíu troh nếo, pêng păm tơdroăng ki châ tâ châ hlo. Ƀă tơdroăng ki veăng dêi khu râ kăn pơkuâ, khu tê mơdró ƀă pơlê pơla, Gia Lai pói tơngah châ tơbrê tung mơhnhôk tơmối ôm hyô, tơdrêng amê, mơjiâng xiâm kối vâ ôm hyô chiâng kơvâ cheăng kâ ki kal, gum djâ kơpong tơnêi tơkŭm kơpong kân rơdâ – têa kơxĭ chiâng tíu troh ki lĕm tung lơgât ôm hyô Việt Nam ƀă lâp plâi tơnêi.