Troh a Tíu pêi cheăng chêh pro hlá mơ-éa cheăm Nhân Cơ, kong pơlê Lâm Đồng tung mâu hâi ki kố, kuăn pơlê tối hâk vâ khât ƀă tíu pêi cheăng lĕm, tơdroăng cheăng tơdah xo, chêh pro hlá mơ-éa rơkê. Cheăng xúa kơmăi tiê kơxô̆ ki chiâng tiâ xêh pro ăm tơniăn tiô rêm ngế, tơdâng, ôh tá ai tơdroăng ki tơbriât dêi rơpó, tơkôm môi tiah hdrối nah. Pro hlá mơ-éa khai sinh ăm dêi kuăn, ngoh Trần Đình Khương, cheăm Nhân Cơ tối:

“Hâi kố á troh akố pro mơ-éa mê hlo tíu pêi cheăng akố gá krúa lĕm, phuâng, ai tŭm kơmăi kơmok ki dâi tiô chal nôkố, tơdroăng cheăng mê vâi chêh pro kĭ rĕng khât”.

Xuân môi tiah mê, a cheăm Quảng Tín, kơnôm ing roê tŭm mâu kơmăi kơmok rêm khế Tíu pêi cheăng tơdah xo chêh pro klêi tâng 600 hồ sơ, tâi tâng tơdah xo, mơdrếo mâu hlá mơ-éa pơrá ing troăng internet, mâu hlá mơ-éa chêh pro mơdrếo tro hâi khế châ lối 99%. Tiô pôa Lưu Văn Gia, Kăn pơkuâ Tíu pêi cheăng cheăm Quảng Tín, sap ing khế 2 hơnăm kố, cheăm hiăng xing xoăng liăn ngân roê tâi tâng mâu kơmăi kơmok xúa, ing mê, chiâng pêi cheăng châ tiô tơdroăng púi vâ ‘na chêh pro mơ-éa tơdah xo, mơdrếo hlá mơ-éa ăm kuăn pơlê:

“Cheăm hiăng ‘no liăn roê mâu kơmăi kơmok, ‘mêng pro tíu pêi cheăng ăm gá krúa, phuâng rơdâ tâ, môi tiah roê kơmăi ki tiê kơxô̆, kơmăi ki tí tăng mâu tơdroăng ki kal tâng, kơmăi tĭnh, kơmăi in, kơmăi scan ƀă ‘mêng pro troăng internet ăm gá tơniăn tâ drêng pêi cheăng”

Ƀă a cheăm Kiến Đức, cheăng tơdah xo, chêh pro klêi mâu hồ sơ ing măng rế hía rế tơ’lêi hlâu kơnôm ing mâu tơdroăng xúa kơmăi kơmok kơxô̆ thăm rế châ mơnhông. Tiô pôa Phạm Xuân Anh, Phŏ pơkuâ Tíu xiâm chêh pro mơ-éa cheăm Kiến Đức, kơmăi tĭnh, camera séa ngăn, kơmăi kơmok tí tăng mâu hlá mơ-éa chêh tối tơdroăng kal châ xúa tơdâng tơ’mô, gum cheăng tơƀrê ăm kăn ƀô̆, kong chưk tung pêi dêi tơdroăng cheăng.

“Tíu ki tí tăng, mâu tơdroăng kal ƀă măng châ ‘mêng pro lĕm mê cheăng ki tơdah xo, chêh pro kĭ pơkâ mâu hlá mơ-éa hlo tơniăn rĕng”.

Tung lâp kong pơlê Lâm Đồng nôkố ai tâi tâng kơ koan, cheăm bêng tơdjêp măng, tơbleăng 2.310 hlá mơéa. Kơxô̆ hlá mơéa ki hiăng chêh pro kĭ pơkâ hồ sơ râ cheăm tro pơkâ châ 98,38%, chiâng “tíu rơkê má môi” tung pơhlêh pro hlá mơ-éa.

Cheăng ‘no liăn roê tŭm mâu kơmăi kơmok, tro ƀă tơdroăng mơdêk rơdêi pơhlêh kơxô̆ dế gum ăm mâu cheăm dêi kong pơlê Lâm Đồng chiâng tíu tŏng gum krâu má môi, achê kuăn pơlê, tơtro ƀă tơdroăng cheăng, gum kuăn pơlê rế hía rế rĕng, tơdrăng ƀă tơƀrê khât tung chêh pro hlá mơ-éa.