Ôh tá ‘nhó kal ai vĕ mot, bu ai to tơnêi tơníu dêi hmốu ƀă hmốu xo, mâu ngế ki lâi drêng troh akố ngăn hmốu vâi krâ ‘măn khê̆n cho Đá Đĩa kô prôk tơkâ luâ pơlê dêi hmốu ai inâi Phú Hạnh. Achê kố pơlê kố kơdrâ châ vâi ô eăng tung măng ƀă tơ’mot hên tơmối achê hngế troh a pơlê kố ôm hyô tí tăng ngăn mâu tơnêi tơníu lĕm dêi hmốu. Tíu kố ôh ti xê to kong kế lĕm tơdrŏm, mê ối rak vế hên tơmeăm ton nah. Tơdroăng ki tơviah má môi a pơlê kố mê cho ối rak mâu klôh têa pro ƀă hmốu ton nah đi đo hơtôu ƀă rơngiâp lĕm. Pôa Nguyễn Danh Hạnh, Ngế ki hriăn ngăn ‘na tơdroăng ton nah drêng lăm troh akố ngăn ‘na mâu kế tơmeăm ton nah dêi hmốu a pơlê Phú Hạnh mơnhên tối ‘na klôh têa ki ton nah kố:

"Klêi kơ’nâi lăm ngăn ngin hlo tiah kố mâu klôh têa ki kố hiăng châ dâng 200 hơnăm. Á tơtơmiât tiah kố ki mê kal châ rak vâ xo ah hmôi ôh ti xê pin tăng ‘nâi tơ’nôm ‘na môi rôh ki sap nah hâi chói ai dêi pâ pôa mê ối vâ xúa tung tơdroăng mơjiâng pro ôm hyô”.

Pakĭng mê klôh têa hmốu, pơlê Phú Hạnh ối tơ’mot xua mâu troăng prôk pro ƀă hmốu ki ton prôk tiô pơlê ai xiâm loăng kân hiăng ton châ hrĭng hơnăm pro chiâng prôk ki lĕm má môi hdró khế hơnăm. Rơtế amê, cho mâu kơnâng pro ƀă hmốu châ krâ mâu kơ’lo reăng ki hên mơngiơk, reăng sống đời, xương rồng ƀă hên ki ê mâu hdrê loăng ki hmâ ƀă hyôh kong prâi ki tôu akố. Troh a Phú Hạnh, hên ngế chiâng kơdrâ drêng hlo ƀă mâ mâu toăng hngêi châ pro ƀă hmốu, mâu kơdroăng rông í peâp kơpôu ro chu châ pro ƀă hmốu ƀă tá mâu tơnâp kiâ xuân châ pro ƀă hmốu. Tâi tâng tơkŭm ƀă dêi rơpó chiâng tơnêi tơníu dêi pơlê kế tơmeăm kơnía.

A pơlê Phú Hạnh ai môi to troăng hmốu ki hiăng ton tâ tá mâu loăng ki kân hiăng ton hơnăm a ngo Cổ Thạch. Sap ing púi ngo kố ngăn troh a têa kơxĭ ngăn hlo chuăn Hòn Yến, kung king Xuân Đài ƀă ‘núa prêi têa kơxĭ ngo Cổ Thạch. Tơmối troh akố châ ngăn hlo mâu tơdroăng ki ôh tá kâi piu. Xuân môi tiah hên tơmối rôh apoăng troh a pơlê hmốu Phú Hạnh ƀă tâk a ngo Cổ Thạch, ngoh Nguyễn Chí Tường, tơmối lo ing kong pơlê Đồng Nai, hâk ro tối:

"Ngo Cổ Thạch lĕm khât, môi tiah a châu Âu, á hâk vâ khât ƀă mâu hmốu ki châ vâi krâ pơtăng tơrêm râ pro ăm á ngăn lĕm khât, á troh akố tơxâng khât ivá á ‘no dêi”.

Tơkâ luâ hên tơdroăng ki kong tôu, kong mêi, mâu kế tơmeăm ki châ pro ƀă hmốu a pơlê Phú Hạnh xuân u ối ƀă hâi khế, pro chiâng tơdroăng lĕm krê ăm pơlê. Pôa Nguyễn Lâu, thôn Phú Hạnh, cheăm Tuy An Đông, kong pơlê Dak Lak hâk tơngăm ‘na kế tơmeăm kơnía git hmốu xuân ối rak a pơlê tơná ƀă nôkố pôa dế xúa tung cheăng ăm tơmối ôm hyô a tíu kố.

"Tơmối troh akố hmâ thế á djâ vâi lăm a ngo cổ thạch, vâi êng á hmốu ki kố gá tiah lâi, mê á xuân tối ăm vâi kố cho hmốu ki ton sap ing nah, nah vâi ‘măn chôi pơtăng ôh tá ai xi moong mê xuân ối krá lĕm. Sap ing mê pro chiâng troh nôkố xuân ối môi tiah mê”.

Hên mâu tíu tung pơlê Phú Hạnh nôkố xuân ối rak mâu tơmeăm pro ƀă hmốu hmâ ƀă tơdroăng rêh ối kuăn pơlê. Kố ôh ti xê cho môi tíu ‘măn rak hmốu ki chiâng xêh ƀă mâu kế tơmeăm ki lối hrĭng hơnăm mê ối cho um kơchuâ kong kế ki lĕm tơviah, pro ăm tơmối ôm hyô tơdjêp tơdroăng ton nah ƀă ki lĕm dêi môi kơpong – môi kơpong tơnêi dêi mâu kế tơmeăm kơnía.