Tiô tơdroăng pơkâ ki vâ mơnhông pêi lo liăn ngân, pơla sap ing hneăng honăm 2026-2030, Dak lak hiăng pơkâ hnoăng cheăng ki xiâm vâ pêi lo liăn ngân tâng vâ riân ngăn tung rêm hơnăm châ sap ing 11 troh 11,5%; tâi tâng GRDP 5 hơnăm tiô tối ahdrối ga vâ chê 700 rơpâu rơtal liăn. Tơdroăng kố rêm hơnăm pơrá châ a kơlo ki péa to kơxô̆, ing 10,2% a hơnăm 2026 tâk troh a 12% a hơnăm 2030. Mâu troăng hơlâ ki vâ thăm mơdêk pêi lo mê vêh mơnhên ai tá tơdroăng pêi chiâk pêi deăng châ mơnhông krá tơniăn, cheăng kơmăi kơmok cho kơvâ cheăng ki nhên khât.

Méluâ ti mê, 3 khế apoăng hơnăm 2026, kơlo ki pêi lo kế tơmeăm tâk tiô GRDP bu châ dâng 7,5%, iâ ó tâng vâ pơchông ngăn ƀă tơdroăng ki hiăng pơcháu ahdrối mê. Mâu kơpong ki ai ivá cheăng kâ rơdêi pơrá pêi lo iâ; tung mê, mơjiâng pro châ dâng 3,5%. Kơvâ ki pêi lo iâ ‘na liăn ngân tơkŭm hên a tơdroăng ki tê mơdró, mơjiâng tơmeăm khoăng, cheăng kơmăi kơmok. Tâi tâng kơxô̆ liăn ki mơ’no tung lâp pơlê pơla kơdroh hên tâng vâ pơchông ngăn ƀă rơnó kố dêi hơnăm nah. Mơnhên tối xiâm kối tơdroăng kố, pôa Cao Đình Huy, Ngế hnê ngăn ‘na Mơjiâng pro tơmeăm khoăng kong pơlê Dak Lak tối tiah kố, mâu troăng hơlâ ki ối trâm pá tung hnoăng rah xo tơnêi mê ƀă ivá ki vâ pêi pro mơjiâng dế ai tơdjâk jên troh tơdroăng pêi lo liăn ngân, kế tơmeăm:

“Ki ối krêa, tơvâ tơvân tung pơla pêi pro mâu tơmeăm khoăng, xuân trối tơdroăng pá tung ăm mung liăn ngân dêi hnoăng cheăng mơjiâng kế tơmeăm, mê cho tơdroăng ki vâ rah xo tơnêi ƀă athế tối nhên cho hrá ó má môi; ki má péa nếo, mê cho ivá dêi mâu khu ki pêi tơdroăng cheăng dế nôkố. Klêi kơ’nâi tí tăng hriăn plĕng ‘na mâu tơdroăng tơkêa bro dế nôkố mâu khu râ, kơvâ cheăng ki mơjiâng pro tơmeăm khoăng xuân ối hrá, pơkâ thế mâu khu ki mơ’no liăn cheăng athế mơ’no liăn tơdrêng hlối, athế kơhnâ khât, athế hnê tối ƀă hbrâ ăm tơdroăng ki vâ kĭ tơkêa nhên ƀă khu râ, kơvâ cheăng ki pêi pro ối hrá”.

Ƀă mâu kơpong ki pêi cheăng ƀă kơmăi kơmok, tơdroăng ki pơkal athế pê pro tơdrêng, mê cho athế lêi tah rĕng tơdroăng ki ối kreăng, tơvâ tơvân, malối tơdroăng tơkêa bro ki mơjiâng on tơhrik ƀă hnối rĕng pêi pro kêi mâu tơmeăm khoăng hngêi trăng, troăng klông, khu hngêi kơmăi vâ rĕng pêi lo kế tơmeăm, liăn ngân châ lối 13% tung la ngiâ kố. Jâ Nguyễn Thị Thu An, Kăn ngăn ‘na Khu pêi cheăng kơmăi kơmok-mơdró kâ tối ăm ngin ‘nâi, méluâ túa cheăng hiăng châ lêi tah lôi mâu tơdroăng ki apoăng, laga, tơdroăng pơkâ pêi pro mê xuân ối trâm hên xahpá xua ôh tá hâi ai troăng hơlâ hnê i nhên khât:

“Tơdroăng pơkâ kơxô̆ 253-254 dêi Kuô̆k hô̆i nếo pơkâ mơ’no hiăng lêi tah lôi ăm tơdroăng pơkâ pêi pro mơjiâng on tơhrik ki vêh mơjiâng nếo, ki rơhêng vâ tối a mâu pơlê cheăm ối a kơpong kơtiê xahpá. Méluâ ti mê, túa cheăng hiăng châ po mơjiâng la mâu troăng ki tơveăng gum ƀă mâu tơdroăng pơkâ ki nhên a mâu tơdroăng pơkâ kố troh nốkố xuân ta hâi teăm châ mơ’no pơkâ pêi pro, xua mê, mâu khu râ, kơvâ cheăng xuân ối trâm hên tơdroăng tung pơla pêi pro”.

Vâ tơ’lêi hlâu iâ tung hnoăng pơkuâ ngăn tiô tơrêm kơvâ cheăng, tơrêm 3 khế môi xoh vâ châ pơkuâ ngăn i krâu tơdroăng ki pêi lo liăn ngân, pôa Đào Mỹ, Phŏ Kăn hnê ngăn Vi ƀan kong pơlê Dak Lak tối tiah kố, pơkal athế pơcháu hnoăng cheăng ăm i nhên tâ:

“Túa ki châ mung liăn, pêi mơjiâng kế tơmeăm pơkal athế pêi pro tro rơhí rơhó tiô kơ tơrêm khế, tơrêm hơnăm tơrêm kơvâ cheăng. Tung tâi tâng ki kơnâ dêi kế tơmeăm ai 698 rơpâu rơtal liăn kố kal athế xing xoăng ăm hơnăm 2026 cho to lâi, ing mê, xing xoăng ăm kơvâ cheăng trối pêi chiâk pêi deăng ga ai to lâi, cheăng kơmăi kơmok ga ai to lâi, tê mơdró ga ai to lâi klêi mê, nếo xing xoăng tơrêm 3 khế mê, trối gum ‘na kơvâ chiâk deăng tung chiâk deăng mê ga ai nhên nếo túa cheăng ki lâi, kơvâ pêt mơjiâng, rak ngăn kong, păn tơnăng ká xixŏng mê ga ti lâi, ai tơdroăng tơkêa bro ki lâi, kế tơmeăm ki lâi vâ vêh mơnhên hnoăng cheăng tung pơla pơkuâ, hnê tơdjâ pêi cheăng”.

Drêng ai tơdroăng pơkal athế khŏm pêi lo liăn ngân châ 2 to kơxô̆ tung pơkla ai hên tơdroăng ki pro hrá mê, pôa Lương Nguyễn Minh Triết, Kăn pơkuâ hnê ngăn Đảng kong pơlê Dak Lak hiăng pơkâ thế athế ai troăng hơlâ ki pơhlêh nếo, ki rơhêng vâ tối cho tung pro hlá mơ-eá ƀă tơmot mơ’no liăn chreăng kâ ton xŏn a la ngiâ. Tơdrêng amê, pơkal athế mơjiâng troăng hơlâ pơkuâ cheăng ki châ kơjo gum athế pêi pro rĕng iâ hâi khế tung pơkâ pêi pro mâu tơdroăng tơkêa bro ki kân, vâ ing mê, khŏm pêi lo kế tơmeăm kiăn ngân ing mâu khế apoăng hơnăm 2026:

“Tơkŭm pêi pro pơhlêh ‘na chêh bro hlá mơ-eá, ‘mâi rơnêu túa ki vâ mơ’no liăn ngân pêi mơjiâng kế tơmeăm, kơdroh chôu phut, hâi khế, kơdroh tơdroăng ki mơ’no liăn ngân, kố cho hnoăng cheăng ki pơhlêh ki kân ki nếo tung hneăng ki nếo dêi kong pơlê. Mơjiâng túa cheăng “tơ’lêi hlâu” ăm mâu tơdroăng tơkêa bro ki kơjo gum ing mê khoh châ tơ’mot hên khu mơdró mơ’no liăn cheăng kâ krá tơniăn ton la ngiâ”.