Tung hâi pêi cheăng apoăng dêi Roh hôp má Môi, Kuô̆k hô̆i hneăng má 16, kơxo lơ 6/4, Kuô̆k hô̆i hiăng tơkŭm po rah xo Kăn xiâm hnê ngăn Kuô̆k hô̆i Kŏng hoa xah hô̆i chuh ngiah Việt Nam hneăng má XVI, hneăng hơnăm 2026 – 2031. Pôa Trần Thanh Mẫn, Kăn xiâm hnê ngăn Kuô̆k hô̆i hneăng má XVI hiăng châ Kuô̆k hô̆i pơtối rak Kăn xiâm hnê ngăn Kuô̆k hô̆i hneăng má XVI. Tơdroăng pơkâ ‘na rah xo pôa Trần Thanh Mẫn to pro Kăn xiâm hnê ngăn Kuô̆k hô̆i hiăng châ mâu kăn teăng mâ Kuô̆k hô̆i têk kŏng môi tuăn ƀă 491/491 kăn teăng mâ têk kŏng môi tuăn.

Xông tơpui klêi kơ’nâi to pro kăn, pôa Trần Thanh Mẫn, Kăn xiâm hnê ngăn Kuô̆k hô̆i mơnê mơngế ki tâ phĭu Pơlê kong kân Hồ Chí Minh hiăng loi tơngah rah xo pro kăn teăng mâ Kuô̆k hô̆i hneăng má 16; mâu kăn teăng mâ Kuô̆k hô̆i hiăng loi tơngah rah xo Kăn xiâm hnê ngăn Kuô̆k hô̆i tơnêi têa Kŏng hoa xah hô̆i chuh ngiah Việt Nam hneăng má 16; tối kố, cho tơdroăng phiu ro kân, tơdrêng amê cho hnoăng kân a ngiâ Đảng, Tơnêi têa, mơngế tâ phĭu ƀă Kuăn pơlê lâp tơnêi têa.

Pôa Trần Thanh Mẫn, Kăn xiâm hnê ngăn Kuô̆k hô̆i pleăng tâi ivá tơná, gum ăm Tơnêi têa, gum kuăn pơlê; rơtế Kuô̆k hô̆i, Vi ƀan pơkuâ Kuô̆k hô̆i, mâu kơ koan dêi Kuô̆k hô̆i ƀă mâu kăn teăng mâ Kuô̆k hô̆i pơtối pơhlêh nếo, mơdêk xúa khoa hok kŏng ngê̆ pơhlêh nếo, Kuô̆k hô̆i, tuăn ngôa rơkê, mơdêk ki dâi lĕm ƀă châ tơƀrê, tối thế pêi, pêi tơdrêng hlối, pêi tro, châ tơƀrê, pêi troh tá tui lui.