Tơpui a rôh pơxiâm po hneăng hôp má Môi, Kuô̆k hô̆i hneăng XVI, pôa Tô Lâm, Kăn xiâm pơkuâ hnê ngăn Đảng tối nhên, kố cho hneăng hôp tơkŭm tâi tâng kơ koan Tơnêi têa tiô Luât; hlối cho hneăng hôp tơkŭm troăng hơlâ Pơkâ Hneăng hôp khu kăn lâp tơnêi têa rôh má XIV dêi Đảng, pro chiâng ivá luât, troăng hơlâ tŏng gum ƀă ivá tơdroăng cheăng tŏng gum vâ tơnêi têa mot tung chal ki mơnhông nếo, pơkâ thế rêm ngế kăn Kuô̆k hô̆i hneăng 16 athế đi đo hlê plĕng trâu hơngế tơná ôh ti xê to teăng mâ ăm tíu pêi cheăng pôk, ôh ti djâ vế hlá phĭu pôk dêi kuăn pơlê, mê ối pôu a kơxah hnoăng cheăng pơkuâ tơnêi têa, ƀă tơdroăng loi tơngah dêi kuăn pơlê, ƀă tơdroăng cheăng tung la ngiâ dêi mâu rơxông xo ah hmôi.

Tung tơdroăng kố, Kăn xiâm pơkuâ hnê ngăn cheăng Đảng pơkâ thế, Kuô̆k hô̆i hneăng XVI tơkŭm pêi pro tro 4 tơdroăng cheăng ki kân tung mê kal mơdêk tâ nếo ivá pơhlêh troăng hơlâ tŏng gum, pêi pro pơhlêh pơkâ dêi Đảng chiâng troăng hơlâ ƀă luât; pro chiâng tơdroăng luât krá rơdêi vâ pêi pro ƀlêi chiâng mâu hnoăng cheăng mơnhông cheăng kâ rêh ối pơlê pơla hneăng hơnăm 2026 – 2031 ƀă mâu hơnăm ki pơtối.

Môi xôh nếo tối nhên, ƀă tiah hmâ 80 hơnăm khên tơnôu dêi Kuô̆k hô̆i Việt Nam; xua tơdroăng pơkuâ khên tơnôu, tuăn ngoâ rơkê dêi Đảng; ƀă tơdroăng môi hiâm mơno; tơdroăng môi tuăn dêi Kuăn pơlê; ƀă tơdroăng tơrŭm krá tơniăn dêi Chin phuh ƀă khu pơkuâ cheăng kal kí; Kăn xiâm pơkuâ hnê ngăn cheăng Đảng loi tiah kố, Kuô̆k hô̆i hneăng XVI mơni kô pêi pro klêi rơkê hnoăng cheăng ki Đảng, Tơnêi têa ƀă Kuăn pơlê pơcháu; veăng gum rơtế ƀă tâi tâng Đảng, tâi tâng kuăn pơlê, tâi tâng lêng pêi pro pơhlêh rơhêng vâ mơjiâng môi Việt Nam hơniâp lĕm, tơniăn krê, kro mơdrŏng, rơkê plĕng, hơniâp ro, rá rơdêi prôk troh chuh nghiah xah hô̆i.