Tơdroăng séa ngăn tơkŭm po sap hâi lơ 1 troh lơ 4/4, ƀă tơdroăng ki veăng dêi mâu khu mơdró djâ tơmối lăm ôm hyô, kơ koan rơ’jíu, um tơvi, khu chêh hlá tơbeăng ƀă mâu ngế ki rơkê, ngế ki châ ô eăng, ngế ki djâ tơpui mơnhên tung kơvâ ôm hyô tung tơnêi têa ƀă kong têa ê veăng pêi pro. Khu râ kăn hiăng châ tâ, châ hlo tơdrêng hên tíu troh, tơmeăm ôm hyô ki má môi ƀă khôi túa lĕm tro, kong kế ƀă tơmeăm ki kơnía dêi kong pơlê Dak Lak, ing mê, mơnhên ki dâi lĕm pêi mơdró ôm hyô, hngêi trăng, troăng klông ƀă ivá pêi tơdroăng djâ lăm ôm hyô.

Hên rơkong tơpui tối, vâ xúa châ tơƀrê tơmeăm ki hiăng ai hlâu, Dak Lak kal pơtối kêi đeăng hngêi trăng, troăng klông, mơdêk ki rơkê hôm ‘na pêi ôm hyô, mơnhông mâu tơmeăm ki phá tơ-ê djâ tơdjêp kơpong, tơdrêng amê pơhlêh xúa kŏng ngê̆ tung tơbleăng, pơkuâ ôm hyô. Pôa Trần Hữu Phước, kăn pơkuâ Kŏng ti THP (Thra-vồ Thuồl) Travel Tour ƀă (Khe-rờ-vèn Xen-thờr) Caravan Center, a Quảng Trị tối:

‘’Nôkố mâu troăng tơdjêp pơla kơpong kân rơdâ kơpong tơdế ƀă mâu kong pơlê peăng Tơdế Tơnêi têa ối ‘mêi ‘nâng. Tiô á tơmiât thế ai pơkâ ƀă mơnhông pro troăng klông kân krá. Tâng mơjiâng troăng kân kố mê tiô á mâu khu mơngế ôm hyô ing Dak Lak, mâu kong pơlê kơpong kân rơdâ a pêa tơdế kong tơbăng ƀă mâu kong pơlê peăng Tơdế Tơnêi têa, tá Đà Nẵng ƀă Quảng Trị mê mơjiâng môi kơpong tơdjêp cho ‘ló ‘nâng tung troăng pêi ôm hyô (khe-rờ-vèn) Caravan’’.

Hên kăn teăng mâ xuân hmâ hiăng tối, Dak Lak kal xúa mâu tơmeăm ki ai hlâu vâ kô mơjiâng mâu tơmeăm ôm hyô nếo, ki má lối cho tơmeăm ki ai phá krê, tơmeăm ‘na kơmăng vâ mơdêk hâi khế châ tâ, châ hlo, tíu ối a kong pơlê. Pakĭng mê, Dak Lak kal thăm tơdjêp mơđah tơbleăng ƀă mơhnhôk pêi ôm hyô tung tơnêi têa ƀă kong têa ê, pro tíu ki má môi vâ mơhnhôk tơmối lâp plâi tơnêi troh ƀă pơlê.

Tiô Khu ngăn ‘na Túa lĕm tro, Tơ’noăng Ivá ƀă Ôm hyô kong pơlê Dak Lak ăm ‘nâi, klêi kơ’nâi po rơdâ tíu mơnhông mơdêk, ôm hyô a kong pơlê ai hên tơmeăm vâ mơjiâng mâu tơmeăm ki tơdjêp pơla kơpong kân rơdâ ƀă kong tơbăng âchê têa kơxĭ. Krê pái khế apoăng hơnăm 2026, lâp kong pơlê tơdah dâng 2 rơtuh 300 rơpâu  roh tơmối, pêi lo liăn châ lối 4.100 rơtal liăn, pơtối rak tơdroăng ki tơtêk. Pôa Lê Phúc Long, Phŏ Kăn ngăn ‘na túa lĕm tro, Tơ’noăng Ivá ƀă Ôm hyô kong pơlê Dak Lak tối ăm ‘nâi, kong pơlê mơnhên troăng prôk la ngiâ djâ ôm hyô chiâng kơvâ cheăng kâ ki xiâm, chôa ‘lâng mơjiâng inâi ‘’Dak Lak – Vêh a kơpong ai tơmeăm kơnía’’ chiâng tíu troh ki má môi dêi tơmối ôm hyô tung tơnêi têa ƀă kong têa ê.

“Hôp roh kố kô gum kơvâ Túa lĕm tro, Tơ’noăng Ivá - Ôm hyô hên tơdroăng ki xiâm, ing troăng pơkâ pêi, troăng hơlâ, mơnhông tơmeăm ôm hyô, mơnhên troăng pơtâng tối, mơđah tơbleăng, pro rơdêi ƀă ki rơhêng vâ tối cho pêi ki klâi vâ mơhnhôk châ tơmối ôm hyô troh ƀă Dak Lak, xúa tơmeăm khoăng ƀă tơdroăng nốkố dêi Dak Lak’’.