3 khế apoăng hơnăm, tơmối lâp plâi tơnêi troh a Gia Lai châ vâ chê 65.000 ngế, tâk 72%; tơmối tung tơnêi têa châ lối 4,1 rơtuh ngế, tâk vâ chê 14%. Tâi tâng kơxô̆ liăn châ xo ing ôm hyô tung 3 khế châ dâng 8.700 rơtal liăn, tâk 17% tâng vâ pơchông ƀă hơnăm nah.

Krê tung khế 3, kơxô̆ tơmối ƀă kơxô̆ liăn châ xo vâ chê tơdế ƀă lối 2 rơtuh ngế ƀă kơxô̆ châ xo vâ chê 4.000 rơtal liăn. Tíu vâ tối tung măng tĭng pơxiâm po hơnăm ôm hyô Tơnêi têa Gia Lai hơnăm 2026 po sap hâi lơ 23 troh hâi lơ 30/3 ƀă hên tơdroăng cheăng pêi môi tiah Ôm hyô Gia Lai 2026, Hôp mơhnhôk ‘no liăn cheăng ƀă tơdah tuk ôm hyô lâp plâi tơnêi troh a kơno tuk Quy Nhơn.

Tung khế pŭn troh khế tơdrốu hơnăm 2026, kong pơlê Gia Lai pơtối mơdêk ôm hyô ƀă hên tơdroăng pêi pro. Hâi leh túa lĕm tro mâu hdroâng kuăn ngo tung kong pơlê roh má 5; Hneăng tơ’noăng ivá mâu hdroâng kuăn ngo; leh mơdĭng Ôm hyô  rơnó mơdrăng “Gia Lai - Tíu troh ki lĕm ro”; tơdrêng ƀă mâu tơdroăng tơbleăng tíu troh a kong têa ê ƀă tơmeăm ki krê “Chêng koăng mơ’nui măng tĭng - kâ ƀă tăng ngăn hlo ‘nâi”.

Ing tơdroăng tơkŭm po mâu rôh leh mê, kong pơlê Gia Lai púi vâ pro môi tíu troh ngăn tơmot tơmối tung tơnêi têa ƀă lâp plâi tơnêi.