Tiô tối tơbleăng a rôh hôp, GRDP pái khế apoăng hơnăm kong pơlê Dak Lak tâk 7,47%, iâ tâ tiô tơdroăng tối hdrối. Mâu tơdroăng mơhnhôk pêi tâk mê cho cheăng kơmăi kơmok - mơjiâng tơmeăm khoăng, xo liăn ngân pêi pro tơmeăm khoăng ăm tơnêi têa, tơ’mot khu ‘no liăn pro tơmeăm khoăng ki hâi pêi lĕm. Mâu kăn ăm ‘nâi, nôkố, kơxô̆ liăn ‘no pêi tâk tiô yă têa châu, dế pro tơdjâk troh tơdroăng pêi cheăng, tê mơdró.

Kơvâ mơjiâng tơmeăm khoăng tâk iâ xua yă tơmeăm vâ mơjiâng pro to kơnâ ƀă hlối hrá chêl thiăn liăn ‘mâi xĕn tơnêi tíu dêi hên tơdroăng tơkêa bro. Hlo hên pơloăng mơnúa ƀă mâu pơkâ pêi tâk, pôa Đỗ Hữu Huy, Kăn hnê ngăn Vi ƀan kong pơlê Dak Lak pơkâ thế mâu tíu pêi cheăng thâ tăng ngăn tâi tâng mâu pơkâ, tơkŭm tơkâ luâ xơpá ki tâk iâ, mơdêk xo liăn ngân vâ pro tơmeăm khoăng tơnêi têa, tah ki ối pá tơvâ tơvân ăm mâu tơdroăng tơkêa bro. Ngế ối a ko thế hnê mơhno ƀă pôu râng hnoăng cheăng ‘na tơdroăng hiăng pêi pro.