Kong pơlê pơkâ pêi troh hơnăm 2030 ai iâ má môi cho 80% kơxô̆ hngêi trung châ tiô tơdroăng pơkâ tơnêi têa; rêm ngế hok tro châ hriâm tâp tơdâng tơ’mô rơkê plĕng a hngêi trung. Mâu cheăm bêng ki châ kơjo ‘no liăn pro hngêi trung mê cho kơpong tíu ki hmâ trâm kong mê khía mơhot têa kân lân lu, kơpong ki ai tơdroăng cheăng kâ rêh ối pơlê pơla xơpá ƀă mâu hngêi trung hriâm tung tơdroăng pơkâ pêi châ tiô pơkâ dêi tơnêi têa. Rơtế ƀă mơjiâng pro nếo lối rơpâu kơbong lâm hriâm a tâi tâng mâu râ sap ing râ mầm non troh râ má pái trung hok phôh thong, Gia Lai xuân tơtrŏng hnê mâu môn môi tiah Âm nhạc, Mỹ Thuật, Ngoại ngữ, Tin học ƀă malối cho kơbong hriâm STEM, pro châ tiô tơdroăng púi vâ dêi Tơdroăng hnê hriâm phôh thong nếo ƀă thăm mơdêk pơhlêh kơxô̆ tung hnê hriâm.

Vâ rak tơniăn tơƀrê tơdroăng pơkâ, Vi ƀan hnê ngăn kong pơlê Gia Lai pơcháu nhên hnoăng cheăng kố ăm mâu khu râ, kơvâ cheăng ƀă kong pơlê tung tơdroăng séa ngăn tơnêi, séa ngăn tơdroăng kơchuâ, tơdrêng amê hlối tŏng gum mâu kơxô̆ liăn sap ing tơdroăng pơkâ pêi dêi tơnêi têa.