Mâu kăn hiăng môi tuăn ƀă tơdroăng ki kal ‘mâi pơhlêh, mơjiâng bro ‘mot tơ’nôm mâu luât vâ chêh pro klêi troăng hơlâ luât, pêi châ tơdroăng rơhêng vâ tung tơdroăng ki kal khât, malối cho tung pơla mơdêk rơdêi xúa pơhlêh kơxô̆, pơhlêh chêh pro hlá mơ-éa ƀă mơjiâng kăn pơkuâ kong pơlê péa râ.

Veăng tơpui ‘na kơxop hlá mơéa Luât Tơdah xo ‘nâi tơdroăng nếo ai, pôa Bùi Thanh Toàn, Kăn pơkuâ Khu ngăn Khoa hok ƀă Kong ngê̆ kong pơlê Dak Lak tối tiah kố, kal pêi pro nhên tơdroăng ki ‘mâi pơhlêh dêi luât, malối cho túa tơmiât “kơ koan tơnêi têa” ƀă mâu ngế ki hnoăng cheăng pôu râng tối tơbleăng tơdroăng kal, ki nếo ai. Ki khât nôkố xuân ối ai tơdroăng ki pro pơxúa ing hnoăng pơkuâ lơ ví tối tơbleăng tơdroăng kal. Pôa Bùi Thanh Toàn tối tơdroăng ƀă pâ thế ‘mot tơ’nôm pơkâ nhên troăng hơlâ pơxâu phâk khu ngế pro xôi, xuân môi tiah hnoăng cheăng pôu râng dêi ngế ki xúa tơdroăng tối tơbleăng klêi kơ’nâi châ tối tơbleăng.

“Tơdroăng pro xôi mơni kô hiăng châ chêh tung mâu luât, mâu tơdroăng pơkâ ki ê. Laga tiô á xuân ối kal tối nhên tung Luât ki kố. Ƀă tung kố mê ki hên cho hlo tâi tâng tối tơbleăng tơdroăng. Mê ngế ki châ tối tơbleăng tơdroăng kal gá tiah lâi? Pơtih á châ kơ koan ki lâi ‘lo tối tơbleăng ăm tơdroăng, la klêi mê á pro xôi tơdroăng tơbleăng tối mê á tro pơxâu phâk môi tiah lâi? Maluâ tung luât kố mê ôh tá chiâng pơkâ nhên vâ pơxâu phâk, la kal athế ai môi tơdroăng ki tối nhên kô ai luât ki ê pơxâu phâk”.

Rơtế ƀă tơdroăng ki kố, ai mâu kăn ki ‘nâ pâ thế kal pơkâ nhên tâ mâu ngế ki ôh tá châ tối tơbleăng tơdroăng vâ ví pro pơxúa ăm dêi tơná krê ing luât xua “tơdroăng tơnêi têa kơtoâ”. Hlối kal pơklât thế tối tơbleăng tơdroăng kal ing troăng kơxô̆ ƀă thăm mơnhông tối tơbleăng mâu tơdroăng ki kal dêi tơnêi têa pơla mâu kơ koan. Nôkố xuân ối ai tơdroăng ki “ki ôh tá tối” tơdroăng kal pơla mâu kơvâ cheăng, pro chiâng ôh tá châ ‘nâi tơdroăng dêi kuăn pơlê vâ tối tơbleăng .

Ƀă Luât Tŏng gum ‘na luât, jâ Lê Thị Thu Thanh Thủy, Phŏ pơkuâ Khu mơjiâng luât kong pơlê Dak Lak tối tiah kố, kal po rơdâ mâu ngế ki châ pơxúa ƀă mơdêk ki rơkê plĕng tung tơdroăng cheăng. Xua mê Luât kal ‘mot tơ’nôm khu ngế hơnăm hiăng hên ki ôh tá ai kơbố păn roăng rak ngăn, mâu ngế ki tro rơpŏng hngêi xiăn pâm, mot tung mâu ngế ki châ tŏng gum tiô ‘na luât, hlối ‘mâi pơhlêh troăng hơlâ tŏng gum ‘na liăn ngân vâ tơ’mot luât sư-cho ngế thái tơleăng khu ngế ki rơkê veăng pêi cheăng.

“Tâng ối rak môi tiah pơkâ ki ton mê pá vâ mơhnhôk mâu khu luât sư ki rơkê lơ khu ki rơkê ‘na luât tá hiâm mơno veăng pêi cheăng tŏng gum ‘na luât, malối cho a mâu cheăm bêng ki xơpá, chiâng tơdjâk troh ki rơkê dêi tơdroăng cheăng xuân môi tiah tơdroăng ki châ xúa ki tơdâng tơ’mô dêi luât ăm kuăn pơlê. Khu mơjiâng luât pâ thế chêh pro môi troăng hơlâ liăn ngân vâ ai tŭm kơxô̆ liăn ăm tơdroăng cheăng tŏng gum ‘na luât, malối cho a mâu kơpong hngế hngo, kơpong xơpá tro ƀă troăng hơlâ tŏng gum tơxâng ăm ngế ki pêi dêi hnoăng cheăng ‘na luât”.

Tơpui mơgêi rôh hôp, jâ Nguyễn Thị Thu Nguyệt, Phŏ pơkuâ khu kăn Kuô̆k hô̆i kong pơlê Dak Lak mơnhên tối khât hiâm mơno pôu râng, tơdroăng cheăng ki rơkê tung rơkong veăng tơpui. Khu kăn Kuô̆k hô̆i kong pơlê Dak Lak kô chêh xo tŭm mâu rơkong tơpui tối, hriăn ngăn, chêh pro klêi tơdroăng ki kal veăng tơpui a hneăng hôp Kuô̆k hô̆i kố, vâ mơnhông ki rơkê tro dêi mâu kơxop mơ-éa luât, rak vế tŭm drêng pơkâ kô rĕng xúa, mơdêk ki tơƀrê.