Peăng kơxo, Kuô̆k hô̆i po hôp hbrâ, tơmâng tối mâu tơdroăng:   Ngế cheăng tung Vi ƀan pơkuâ Kuô̆k hô̆i, Kăn xiâm chêh tôm xo rơkong dêi Kuô̆k hô̆i - Ngế pơkuâ  Ƀơrô Kuô̆k hô̆i Bùi Văn Cường tối tơbleăng tơmâng xo, tối nhên, ‘mâi rơnêu tơdroăng vâ pơtroh ăm rôh hôp. Kơ’nâi mê, Kuô̆k hô̆i tơpui tơno ƀă têk kŏng tiâ vâ tơbleăng tơdroăng a Rôh hôp.

Pơtối mê, Ngế cheăng tung Vi ƀan pơkuâ Kuô̆k hô̆i, Ngế xiâm ngăn tơdroăng cheăng ‘na mâu kăn dêi Vi ƀan pơkuâ Kuô̆k hô̆i  Nguyễn Thị Thanh tối tơbleăng dêi Vi ƀan pơkuâ Kuô̆k hô̆i ‘na tơdroăng ăm pơtê pêi tơdroăng cheăng mâu kăn Kuô̆k hô̆i heăng 15 ƀă pôa Nguyễn Văn Thạnh dêi khu kăn Kuô̆k hô̆i kong pơlê An Giang.

Ai 4 tơdroăng kal pêi tơdrêng châ Kuô̆k hô̆i séa ngăn a rôh hôp kố: mê cho hlá mơ-éa luât tơnêi (‘mâi hơ’lêh), hlá mơ-éa luât ăm  mung liăn (‘mâi hơ’lêh) hlá mơ éa luât pơkâ mâu tơdroăng luât tŏng kum vâ tah ki xahpá, tơvâ tơvân, mơdêk rĕng pêi mâu tơdroăng  pơkâ dêi tơnêi têa.

Mơ’nui cho tơ’nôm Pơkâ ‘no liăn mơjiâng tơmeăm khoăng ton hơnăm liăn ngân xiâm tơnêi têa pơla hơnăm 2021-2025 ing liăn ‘măn tơdjuôm ƀă liăn xo ing liăn ngân xiâm tơnêi têa hơnăm 2022 ăm mâu tơdroăng cheăng pêi, tơdroăng ‘no liăn mơjiâng tơmeăm khoăng ƀă tơ’nôm pơkâ ‘no liăn mơjiâng tơmeăm khoăng ton hơnăm ăm grup  ngăn on tơhrik Việt Nam ing liăn ‘măn kơdĭng dêi pơkâ ‘no liăn cheăng ton hơnăm.