Kơxo lơ 5/1, a Hngêi Kuô̆k hô̆i, ai pôa Vương Đình Huệ Kăn xiâm hnê ngăn Kuô̆k hô̆i pơkuâ hneăng hôp, Kuô̆k hô̆i hiăng pơxiâm po hneăng hôp kân ôh tá xê tiah hmâ roh má Péa. Tơbleăng a hâi pơxiâm po rôh hôp, pôa Vương Đình Huệ, Kăn xiâm hnê ngăn Kuô̆k hô̆i ăm ‘nâi, ing tơdroăng pơkâ thế pêi hlối, ngăn a tơdroăng pơkâ dêi Luât, Luât Tơkŭm po dêi Kuô̆k hô̆i ƀă Tơdroăng pơkâ dêi rôh hôp, Kuô̆k hô̆i hôp tơpui tơno a rôh hôp mê kô séa ngăn, pơkâ mâu tơdroăng ki kân, ki kal ƀă thế pêi tơdrêng mê cho: Pơkâ tâi tâng tơdroăng dêi tơnêi têa tung pơla hơnăm 2021-2030.

Hvái ngăn mâu tơdroăng vâ pêi troh hơnăm 2050; tơdroăng tơkêa Luât khăm, pơlât (‘mâi hơ’lêh); mơgêi tâi tâng, tối todroăng pêi pro mâu pơkâ ki pêi môi tơdroăng ăm ‘na hbrâ, mơdât pơreăng COVID-19 ki ai pơkâ a tơdroăng pơkâ kơxô̆ 30 dêi Kuô̆k hô̆i; tơdroăng ‘na liăn ngân, liăn ngân tơnêi têa. Malối a rôh hôp ôh tá xê tiah hmâ rôh má péa mê, Kuô̆k hô̆i kô séa ngăn, thế pơtê pêi tơdroăng cheăng dêi mâu kăn ƀă mâu kăn Kuô̆k hô̆i, rah xo pôk mâu kăn cheăng tung Chin phuh.