A rôh hôp, mâu ngế cheăng tung Vi ƀan hiăng môi tuăn khât ƀă mâu tơdroăng ki kal xua Vi ƀan pơkuâ chêh pro mơ-éa Luât hbrâ rơnáu ƀă tối tiah kố tơdroăng kal dêi mâu hlá mơ-éa hiăng tơniăn tro tiô pơkâ thế. Tối nhên ki pơxúa, ki kal dêi tơdroăng ‘mâi pơhlêh Luât, Kăn xiâm hnê ngăn Kuô̆k hô̆i pơkâ thế kal rĕng tơbleăng pêi pro túa Pơkâ tơkŭm po xo rơkong tơpui tối, tơkŭm mâu rơkong tơpui tối dêi kuăn pơlê, mâu kơvâ cheăng, rêm râ ‘na kơxop mơ-éa Pơkâ ‘mâi pơhlêh, ‘mot tơ’nôm mâu tơdroăng dêi luât hơnăm 2013.

Kăn xiâm hnê ngăn Kuô̆k hô̆i pơkâ thế pơxiâm sap ing hâi lơ 6/5 kô tơkŭm po tơbleăng xo rơkong tơpui tối kuăn pơlê ‘na tâi tâng mơ-éa Pơkâ ‘mâi pơhlêh, ‘mot tơ’nôm mâu tơdroăng dêi Luât hơnăm 2013 ƀă mâu hlá mơ-éa ki ê a Cổng thông tin điê̆n tưh Chin phuh, Cổng thông tin điê̆n tưh Kuô̆k hô̆i, mâu kơ koan chêh hlá tơbeăng: Rơ’jiu, Um Tơvi Việt Nam (VTV), Rơ’jíu Việt Nam (VOV), Thŏng tâ̆n xah Việt Nam ƀă Cổng thông tin điê̆n tưh dêi Vi ƀan hnê ngăn mâu kong pơlê, pơlê kong kân ối tung tơnêi têa.