A Đà Lạt, tíu ki pơkâ pro tíu pêi cheăng xiâm dêi kong pơlê Lâm Đồng nôkố ai lối 1.300 ngế kong chưk, viên chưk lo ing kong pơlê Dak Nông prế Bình Thuận. Lối 8 rơpâu ngế ki u ối xuân châ xing xoăng pêi cheăng a tíu ki ton vâ pơtối tơdah xo pro mâu mơ-éa, pro tơ’lêi hlâu tung chêh pro mơ-éa ăm kuăn pơlê. Ƀă 124 to cheăm, bêng, kơpong pêi cheăng klêi kơ’nâi ‘mot tơkŭm, cheăng chêh pro mơ-éa rế châ tơniăn lĕm tâ.

Kơxô̆ hô sơ châ chêh pro klêi hdrối tâ hâi khế pơkâ châ lối 97% tung tâi tâng kơxô̆ lối 18.500 hô sơ. Phŏ Ngế pro xiâm hnê ngăn tơnêi têa tơmâng xo ƀă mơnhên tối khât mâu tơdroăng pêi tơƀrê apoăng ki kong pơlê Lâm Đồng hiăng pêi châ tung pơla xúa kăn pơkuâ kong pơlê 2 râ, rak pêi pro tro tơdroăng mơnhông cheăng kâ rêh ối pơlê pơla dêi kong pơlê.

Krê cheăng hbrâ rơnáu Hneăng hôp, kong pơlê ƀă cheăm pơrá pêi pro tro ƀă túa pơkâ ƀă hnoăng cheăng hiăng mơ’no. Pôa Nguyễn Hòa Bình, Phŏ Ngế pro xiâm hnê ngăn tơnêi têa tối tiah kố mơdêk cheăng kâ dêi Lâm Đồng nôkố tá hâi tơxâng ƀă ki ai hlâu, bu nếo châ 5%. Pakĭng mê, tơdroăng ki pêi pro mâu tơdroăng tơkêa, kế tơmeăm pro ki kal ối hrá châ pro tá hâi châ tiô pơkâ; cheăng pơkuâ ngăn kong kế, tơmeăm khoăng ối ‘ro; ai mâu kuăn pơlê kơpong hdroâng kuăn ngo ối xơpá ƀă hên ki ê.

Mâu tơdroăng kố kong pơlê kal thăm mơnhông tơdroăng pơkuâ hnê mơhno, malối tơmâng ngăn troh tŏng gum ƀă pơkâ tơleăng tung la ngiâ.