Tung hơnăm kố hía nah, Mố đô̆i gak tơkăng kong Gia Lai hiăng pê klêi tơdroăng xing xoăng tơkŭm pêi pro tro tiô pơkâ tơdroăng cheăng pêi ton hơnăm ƀă pêi tro mâu tơdroăng hiăng pơcháu.

A rôh pêi cheăng, pôa Nguyễn Trọng Nghiã khĕn kơdeăn mâu tơdroăng hiăng châ pêi pro; pơkâ thế tâi tâng mâu ngế pơtối ‘no ivá, môi tuăn, mơ-eăm; pêi tro tơdroăng cheăng rak tơniăn, hnoăng pơkuâ tíu tơkăng kong, pơtối rak hyôh kong prâi tơniăn; pơtối rak um méa “Mố đô̆i Pôa Hồ”, rơtế hmâ ƀă kuăn pơlê, malối cho kuăn pơlê kơpong tíu tơkăng kong; hbrâ tăng ‘nâi plĕng, teăm tơdrêng vâ tối tơbleăng ăm khu râ Đảng, mâu kăn kong pơlê; hbrâ rơnáu kring gak tơkăng kong rơtế ƀă kring tíu tơkăng kong; hlối rak tơniăn tro tơdroăng tơpui kâ, pêi tro mâu tơdroăng ‘na kring vế tơniăn tiah hmâ ing nah, tung mê ai xôi tơkâ luâ tơkăng kong ƀă xôi a têa kơxĭ.