Tơdroăng tơkêa bro hngêi trăng troăng klông kơpong kuăn pơlê ối, vêh pro pơlê ối a cheăm Dă Huoai, kong pơlê Lâm Đồng cho môi tung mâu tơdroăng tơkêa bro ki kal vâ gum ăm tơdroăng ki pro pơlê ối dêi troăng kân Tân Phú – Bảo Lộc. Tơdroăng tơkêa kố ai tâi tâng kơxô̆ liăn ‘no pro lối 150 rơtal. Xua tơdjâk dêi hyôh kong prâi kong mê hên, mê tơdroăng ki pro dế tro pơtê xua xơpá tung cheăng xo tơnêi gu pro tơbăng. Pôa Lê Bảo Thi, ngế ki pơkuâ tơdroăng tơkêa bro troăng prôk, kơpong ki pro tíu kuăn pơlê ối kố ăm ‘nâi, tíu pêi cheăng cho khu ki xo pro hiăng hbrâ tŭm mâu kế tơmwăm, rơxế, kơmăi kơmok, ngế cheăng, hbrâ rơnáu mơdêk tơdroăng ki pro tơdrêng drêng mâu tơvâ tơvân châ tŏng gum.

“Nôkố kŏng nhân dế ối tơkôm a tíu pro ki iâ cho 60 ngế, pro tâi tâng mâu tơdroăng cheăng. Bu tơkôm to kong tôu lĕm ‘nôi, tâng châ pro mê khu ki xo pro kô tơbleăng thế pro tơdrêng hlối. Troh hâi lơ 31/12 mê kô klêi ƀă kô pơcháu ăm mâu rơpŏng kuăn pơlê lăm ối a tíu ki pro pơlê nếo”.

Hơnăm 2025, tâi tâng kơxô̆ liăn ‘no pro kế tơmeăm xúa tơdjuôm kố dêi kong pơlê Lâm Đồng cho 18.700 rơtal. Tung 7 khế, tung lâp kong pơlê ‘no liăn châ dâng 30% túa pơcháu. Maluâ ‘no liăn pêi cheăng hrá xua ki hên trâm pá tung tơdroăng ki xo tơnêi. Nôkố hên mâu tơdroăng tơkêa bro, kế tơmeăm hiăng chêh pro klêi hô sơ, mơéa, la tơnêi tá hâi hlo pêi.

Pôa Hồ Văn Mười, Kăn hnê ngăn Vi ƀan kong pơlê Lâm Đồng tối tiah kố, vâ pêi pro klêi túa pơkâ ‘no liăn pêi cheăng tơdjuôm hơnăm 2025 châ lối 95%, kong pơlê kal ai tơdroăng ki khŏm mơeăm hên. Tung mê, cheăng xo tơnêi cho môi tơdroăng cheăng ki kal, pâ thế tá khu pơkuâ tơdroăng kal kí rơtế veăng pêi.

“Ki rơkê plĕng dêi mâu kăn ƀô̆ xo tơnêi cho kal khât. Ngế ki lâi lăm troh pêi cheăng mê mơhno ăm ngiâ méa ki ti xo, túa pêi cheăng ôh ti tro mê gá kô ôh tá tơƀrê. Xua mê athế rah xo kuăn mơngế, xoăng kuăn mơngế môi tiah lâi, lăm pêi cheăng mơhnhôk gá cho kơbố. Drêng pêi cheăng hnê mơhnhôk ăm tơnêi cho athế tá khu pơkuâ tơdroăng kal kí veăng pêi”.