Pơtối mâu tơdroăng cheăng tung rôh lăm pôu râ Tơnêi têa Troh Hàn Quốc, kơxê hâi lơ 11/8, a pơlê kong xiâm Seoul, pôa Tô Lâm - Kăn xiâm pơkuâ hnê ngăn Đảng hiăng ai rôh hôp ƀă pôa Kim Min Seok - Ngế pro xiâm hnê ngăn kong têa Hàn Quốc. A rôh hôp tơpui tơno, pôa Tô Lâm tối nhên, Việt Nam đi đo ngăn tơdroăng kal tơrŭm cheăng ƀă Hàn Quốc ƀă púi vâ rơtế ƀă Hàn Quốc pêi trâu hơngế tâ nếo ‘na tơrŭm cheăng tung tŭm tơdroăng pơla Việt Nam - Hàn Quốc.

Pôa Tô Lâm pơkâ thế péa pâ mơ-eăm tơrŭm krá tâ, ton pơla péa tơnêi têa; hâk mơnê péa pâ kĭ tơhrâ tung hlá mơ-éa chôu vế ‘na tơdroăng ăm phêp mơngế pêi cheăng dêi kong têa ê pơla Việt Nam ƀă Hàn Quốc; mơdêk tơrŭm cheăng hnê hriâm, pâ thế Hàn Quốc kơjo kum hnê mơngế pêi cheăng rơkê pro trếo ki chiâng hrik xup xo, rơxế kơtâu ƀă hmốu on tơhrik, kŏng ngê̆ sinh hok, kơmăi kơmok pro tuk, tuăn ngôa rơkê.

Pôa Kim Min Seok tối kô pơtối tơmâng tơrŭm cheăng ƀă Việt Nam mơdêk hnê mơngế pêi cheăng rơkê vâ pơxúa mơnhông cheăng kâ péa tơnêi têa tung la ngiâ.