Sap apoăng hơnăm troh nôkố, Kŏng an kong pơlê Lâm Đồng tơkŭm pêi cheăng khu lăm séa ngăn, lăm séa ngăn mâu troăng kân ki xiâm, ki ôh tá tơniăn, châ hlo, pro mơ-éa pơxâu phâk lối 2.700 ngế xôi ai pló drôu tung châ.

Tiô đăi tă Lê Văn Xuyên, Kăn pơkuâ ƀơrô gâk kring kal kí tung khu, Kŏng an kong pơlê Lâm Đồng, ƀă troăng pêi ôh tá ai pakong, ôh tá ai kơpong mơdât, khu kan sát rak tơniăn troăng klông mâu kơ koan tung kong pơlê hiăng kơtăng pơxâu phâk mâu ngế ki xôi. Khu pơkuâ hnê ngăn cheăng Đảng kong pơlê, Vi ƀan kong pơlê xuân hiăng tơbleăng hên mơ-éa hnê mơhno, pơkâ pơxâu phâk kơtăng ‘na Đảng ƀă Khu râ kăn pơkuâ ƀă mâu ngế ki pro xôi cho kăn ƀô̆, đảng viên, kŏng chưk, viên chưk, ngế pêi cheăng dêi kơ koan, tíu cheăng, tơring tung kong pơlê.

Tơdroăng pơxâu phâk kơtăng mâu ngế hiăng ôu drôu ƀier laga xuân ối vê rơxế kơtâu drô troăng klông, apoăng hiăng mơdêk tơdroăng hlê plĕng pêi pro mâu pơkâ ƀă luât troăng klông dêi pơlê pơla, kum kơdroh 15% kơxô̆ roh tơklâm rơxế ai tơdjâk troh drôu ƀier a kong pơlê Lâm Đồng.