Pơla hdrối mê hía nah, rêm hdroh ai roh ki mơhnhôk pơtroh liăn kơdĭng vâ veăng kum mơngế kơtiê, mê jâ Nguyễn Thị Xuân An, ối a bêng 3, pơlê kong kơdrâm Đà Lạt, kong pơlê Lâm Đồng pơrá veăng tơlo dêi liăn ngân vâ kum mơngế xahpá. Ƀă jâ, maluâ kơxô̆ liăn pơtroh mê ôh tá ‘nhó hên laga ai pơxúa, veăng ‘no dêi hnoăng rơtế ƀă khu râ, pơlê pơla tơmiât troh mơngế kơtiê, mơngế xahpá, kum ăm vâi ai kơxô̆ liăn châ mung vâ mơ’no pêi cheăng kâ, mơnhông tơdroăng rêh ối dêi rơpŏng hngêi. Jâ Nguyễn Thị Xuân An ai tối:

’Rêm hơnăm á pơrá veăng ‘no dêi iăn kơdĭng. Hơnăm nah, á pơtroh iâ mê hơnăm kố á kơdo mơ-eăm pơtroh hên tâ, hmôu pơ pro ti mê. Hơnăm kố, á pơtroh liăn vâ kơdĭng châ 20 rơtuh liăn, hâi lơ 14/3 kố ah, á pơtối lăm troh a bêng vâ pơtroh dêi liăn nếo’’.

Kố cho hơnăm má 4 Hngêi rak liăn kum mơngế kơtiê a kong pơlê Lâm Đồng tơrŭm cheăng ƀă Vi ƀan hnê ngăn Măt trâ̆n tơnêi têa Việt Nam ƀă mâu khu râ dêi kong pơlê tơkŭm po mơhnhôk rêm khu râ cheăng, kuăn pơlê veăng tơlo dêi liăn rơtế veăng kum mơngế kơtiê. Tiah mê, kơxô̆ mơngế ki vâ, ki pơtroh dêi liăn kơdĭng kum mê rế hía rế kơdrâm, kơxô̆ liăn ki châ xo ing tơdroăng kố rế hía rế tâk hên. Ing 24 rơtal liăn châ xo klêi kơ’nâi roh ki po mơhnhôk apoăng nah, troh roh má 3 mê kơxô̆ liăn kố hiăng tâk troh 130 rơtal liăn ing kơxô̆ liăn ki kơdĭng rơtế veăng kum mơngế kơtiê.

Tiô pôa Nguyễn Hữu Quang, Kăn phŏ ngăn Hngêi rak liăn kum mơngế kơtiê kong pơlê Lâm Đồng tối, hnoăng pêi pro ki veăng kơdĭng liăn vâ kum mơngế kơtiê hiăng tơdjâ chiâng tơdroăng ki rơdâ troh a rêm khu râ, mâu kuăn pơlê tung kong pơlê kố. Roh má 4 kố, hneăng ki pơtroh liăn kơdĭng rơtế veăng kum mơngế kơtiê kô pro ton châ 1 khế, pói tơngah tơ’mot hên ngế veăng pêi, veăng pro.

‘’Hơnăm kố, pơtroh liăn kơdĭng rơtế veăng kum mơngế kơtiê ton châ 1 khế. Ngin xuân pói tơngah, hneăng pêi pro kố pơtối cho pro mơdon hên tâ vâ kuăn pơlê ‘nâi ƀă veăng pêi pro tŭm, kơdrâm hên tâ. Pakĭng tơdroăng ki po mơhnhôk a tíu pêi cheăng, mê a mâu hâi ki pêi cheăng ăm mung liăn a mâu cheăm, bêng, pơlê kân kô pơtối mơhnhôk kuăn pơlê, khu mơdró kâ a pơlê cheăm tơná rơtế veăng tơlo liăn kum ăm hnoăng cheăng ki kố’’.

Troh a chôu phut kố, klêi kơ’nâi lối 1 măng tĭng po mơhnhôk, hnoăng ki pơtroh liăn kơdĭng rơtế tŏng kum mơngế kơtiê a Lâm Đồng hiăng tơ’mot lối 1 rơpâu 400 ngế đảng viên, kăn ƀô̆, mơngế pơkuâ, mơngế cheăng, khu râ mơngế pêi cheăng ƀă kuăn pơlê ki pêi chiâk deăng veăng pêi pro, po vâ chê 1 rơpâu 600 phĭu kơdĭng liăn, tâi tâng kơxô̆ liăn mê tâk châ lối 67 rơtal liăn.

Pôa Võ Ngọc Hiệp-Ngế cheăng tung Khu pơkuâ hnê ngăn Đảng, Kăn phŏ hnê ngăn Vi ƀan kong pơlê Lâm Đồng, Kăn teăng mâ Hô̆i đong Pơkuâ Hngêi rak liăn kum mơngế xahpá kong pơlê Lâm Đồng  ai tối: ‘’Tơdroăng ki po mơhnhôk ‘’Khế pơtroh  liăn kơdĭng rơtế veăng kum mơngế kơtiê’’ ai pơxúa kal kân khât, vâ ai kơxô̆ liăn kum tơ’lêi iâ, rế hía rế tơniăn ăm kuăn pơlê kơtiê châ mung liăn, mâu khu ngế ki xahpá ki ê xuân hlâu châ mung ha, ing mê, veăng kum rak vế, pêi pro hnoăng cheăng xiâm vâ kơdroh kơtiê tơniăn dêi kong pơlê. Tơdrêng amê, mơjiâng chiâng tơdroăng ki hlê plĕng ƀă pêi pro dêi rêm khu râ, rêm kơvâ cheăng ƀă tâi tâng pơlê pơla tung hnoăng mơjiâng tíu kơdĭng liăn kum mơngế ki kơtiê xahpá tung pơlê pơla; mơhnhôk mâu  khu mơdró kâ, kơ koan, đông lêng, kăn ƀô̆, mơngế pơkuâ, mơngế pêi cheăng ƀă mâu khu kuăn pơlê ki pêi rêm kơvâ cheăng dêi kong pơlê Lâm Đồng mơhno dêi tuăn hiâm ki lĕm tro, ai tuăn hơ-ui pâ, pơtối mơdêk hiâm tuăn tŏng kum, tơveăng kơ mâu ngế kơtiê ƀă mâu ngế ki pá puât xêh tung rêh ối tiô hnoăng ki pơtroh liăn ngân kơdĭng a Hngêi rak liăn kum mơngế kơtiê xahpá, mơhno tối ‘’Pêi pro kŭn ai pơxúa kân’’ vâ mơjiâng ivá cheăng ‘’Rơtế tơdjuôm ivá mơno xua vâ kum mơngế kơtiê ƀă  mâu xahpá ki ê’’.

Kơdroh kơtiê tơniăn ton cho troăng tơdjâ dêi Đảng, Tơnêi têa ƀă xuân cho hnoăng cheăng pêi pro dêi tâi tâng kuăn pơlê, mơhno tối hiâm tuăn ki lĕm tro pá kâi tối, cho hiâm mơno ki pơkâ sap ing nah, krá kâk dêi Đảng, Tơnêi têa tung pơla mơjiâng troăng hơlâ pêi cheăng kâ tiô troăng xah hô̆i chuh ngiah. Kơxô̆ liăn xua Hngêi rak liăn kum mơngế kơtiê pêi pro mê cho môi tung mâu khu ki vâ kum kơdroh kơtiê, xua Đảng, Tơnêi têa pêi pro a kong pơlê Lâm Đồng tơdroăng ki ăm mung liăn mê hiăng pơtối châ mơdêk ki tơbrê kân, veăng kum rak vế, pêi pro tơdroăng kơdroh kơtiê tơniăn, mơjiâng thôn pơlê nếo, kring vế tơniăn ăm tơdroăng rêh kâ ối pơlê pơla a kong pơlê kố.

Rak vế, pêi pro hnoăng ‘’Lâp tơnêi têa veăng tŏng kum mơngế kơtiê-Ôh tá lôi ai ngế ki lâi pá rŏng’’ xua Ngế pro xiâm hnê ngăn Chin phuh mơhnhôk, mê tung 3 hơnăm hiăng luâ ‘’pơtroh liăn kơdĭng rơtế veăng kum mơngế kơtiê’’ hiăng châ Hngêi rak liăn kum mơngế kơtiê a kong pơlê Lâm Đồng tơrŭm ƀă 4 khu pơkuâ cheăng kal kí-pơlê pơla rơdah xo-pơcháu cheăng châ ƀlê chiâng kơnôm ai tơdroăng veăng vâ môi tuăn dêi mâu ngế tung khu ƀă kuăn pơlê tung lâp kong pơlê veăng ‘no dêi hnoăng cheăng kơhnâ tung mơjiâng kơxô̆ liăn kum ăm Hngêi rak liăn kum mơngế kơtiê ƀă mâu ngế ki xahpá ki ê.