Nôkố tung lâp kong pơlê Lâm Đồng ai troh 93 to cheăm, bêng tá hâi ai kong chưk pêi cheăng ‘na kong ngê̆ thong tin, 60 to cheăm ối kal mâu ngế cheăng tung kơvâ kong kế - kong prâi, 33 to cheăm ối kal kăn ƀô̆ pêi cheăng mơjiâng pro tơmeăm khoăng, ƀă hên tíu ối kal mâu ngế cheăng tung mâu kơvâ cheăng ki kal môi tiah pêi cheăng kơvâ chêh pro mơ-éa ‘na pơ’leăng mâ mơngế, ‘na rak liăn ngân, pơkuâ ngăn tơnêi tíu ƀă hên ki ê.

Ki rơhêng vâ tối, ối ai mâu cheăm bêng troh nôkố xuân tá hâi ai tŭm mâu kăn pơkuâ, tơdjâk troh tơdroăng cheăng dêi kơ koan a cheăm bêng. Tiô pôa Hồ Văn Mười, Kăn hnê ngăn Vi ƀan kong pơlê Lâm Đồng, tơdroăng ki ối kal mâu ngế pêi cheăng a râ cheăm hiăng chiâng tơdroăng kal pêi tơdrêng, tâng ôh tá châ rĕng tăng mâu ngế pêi cheăng mê kô pro pá tung tơdroăng pơkuâ ngăn tơnêi têa, pro hrá tơdroăng ki chêh pro, mơdrếo mâu mơ-éa ƀă kô ôh ti ai tơdroăng loi dêi kuăn pơlê, khu mơdró kâ tung kơ koan cheăng tơnêi têa.